era sava lalaga na itabagone

13–19 ni Noveba

Jemesa

“Ia Dou Muria na Vosa, Ka Kakua ni Rogoca Walega”

Ni bera ni wiliki na ituvatuva oqo, wilika na iVola i Jemesa ka vakarorogo matua ki na veivakauqeti o ciqoma. Na ivakavuvuli cava o kunea rawa ena vakalougatataki iko ka tara cake na nomu lewe ni kalasi?

ivakatakilakila ni veiwasei

Sureta na Veiwasei

Sureta na lewe ni kalasi mera wasea na veitikina mai na Jemesa e vakauqeti ira kina mera “muria na vosa” (Jemesa 1:22). Ke sega soti ni nodra vakatabakidua, sa rawa mera wasea talega na nodra nanuma ena veika mera cakava, vakai ira yadua se vakamatavuale.

ivakatakilakila ni veivakavulici

Vakavulica na iVunau

Jemesa 1: 5–6

Ni da kerekere ena vakabauta, ena solia mai na Kalou ena galala.

• Na ivakavuvuli e vakavulici tiko ena Jemesa 1:5–6 a muataki Josefa Simici kina dua na veisau ni bula vakayalo, ka sa rawa ni vakalougatataki keda yadua ena so na sala. Sa rawa mo vola ena vava na mataqali taro vakaoqo ka kerea na lewe ni kalasi mera tugana e lomadra: Na veivakauqeti cava sa cakava na Jemesa 1:5–6 ki na nomu bula? Na cava e sotava o Josefa Simici ena veitikina oqo sa vakavulici iko mo vakasaqara na vuku me baleta na nomu vakatataro? (raica na Josefa Simici—Ai Tukutuku 1:10–17). Na cava soti o sa sotava sa vakavulica vei iko ni “dina na ivakadinadina nei Jemesa”? (Josefa Simici—Ai Tukutuku 1:26). Sureta na lewe ni kalasi mera wasea na nodra nanuma ni ra sa tugana oti tiko na taro oqo.

• Sa rawa kina lewe ni kalasi mera cakava na Jemesa 1:5-6 ena nodra vosa ga. Ena vukei ira vakacava oqo mera kila vinaka cake kina na veitikina oqo? Sa rawa ni veivosakitaka vata na cava na ibalebale ni veivosa oqo mai na veitikina oqo.

Jemesa 1:2–4; 5:7–11

Kevaka eda vosota vakadede, ena tuberi keda na Turaga kina vakataucokotaki.

• Me tekivu e dua na veivosaki baleta na ivakavuvuli i Jemesa baleta na vosota ena veitikina oqo, sa rawa mo sureta na lewe ni kalasi mera wasea na gauna era a vosota kina kei na veika era sa vulica mai kina. Mera qai vakasaqara ena Jemesa 1:2-4; 5:7-11 ena ivakavuvuli e semati ki na veika era sotava. Era na rawa ni kunea talega na ivakavuvuli taurivaki oqo ena vidio “Continue in Patience” (ChurchofJesusChrist.org) se ena vosa nei Peresitedi Dieter F. Uchtdorf “Vosota Tikoga” (Liaona, Me 2010, 56–59). Rawa ni ra wasea na lewe ni kalasi na veika era sa vulica me baleta na dauvosota ni ra sa mai kila na Tamada Vakalomalagi kei na iVakabula. Na cava soti sa vukei keda me da vakatorocaketaka na vosota?

Jemesa 1:3–8, 21–25; 2:14–26

“Sa mate vakakina na vakabauta ni sa takali na cakacaka.”

• Dua na sala me veivosakitaki kina na ivakavuvuli i Jemesa baleta na vakabauta kei na cakacaka me wasei na nomu kalasi ena rua na ilawalawa—dua me vakadikeva na vuna e gadrevi kina na cakacaka ena vakabauta kei na dua tale me dikeva na vuna e gadrevi kina na vakabauta ena noda cakacaka. Me caka oqo, mera na wilika na Maciu 7:21–23; Jemesa 1:6–8, 21–25; 2:14–26; kei na Josefa Simici—Ai Tukutuku 1:19. Mera wasea na ilawalawa yadua na veika era sa kunea ka me veivosakitaki na vuna sa gadrevi ruarua kina na vakabauta kei na kena cakacakataki.

  E masu o Eparama ena taudaku ni nona valelaca

  “E vakabauta na Kalou o Eparaama, ka sa wili kina me ivalavala dodonu” (James 2:23). Eparama ena Buca ko Mamire, mai vei Grant Romney Clawson

• Ni gadrevi mera vukei na lewe ni kalasi mera tugana vakatitobu na malanivosa taleitaki “Sa mate na vakabauta ni sa takali na cakacaka” (Jemesa 2:26), mo vola na yatuvosa oqo ena vava: Na vakabauta ke sega na cakacaka sa vaka ni sega na . Sureta na lewe ni kalasi mera vakasamataka na sala vou eso mera vakacavara kina na yatuvosa, ka mera vola ena vava na nodra vakasama. Na cava eda rawa ni cakava meda cakacakataka noda vakabauti Jisu Karisito?

Jemesa 2: 1–9

Ni da tisaipeli i Jisu Karisito, e dodonu meda lomani ira na tamata kecega, se cava ga na nodra ituvaki ni bula.

• Me vukea na lewe ni kalasi mera vakaraitaka na loloma Vakarisito kina tamata kecega se cava ga na nodra bula se irairai, sa rawa mo kerea na lewe ni kalasi mera wiliwili veitaravi mai na Jemesa 1:9-11; 2:1-9; 5:1-6. Me veivosakitaki na taro vakaoqo; Na cava na ibalebale ni “dou sa digitaki ira na tamata”? (Jemesa 2:9). Na cava na vuna eda raici ira kina vakaduidui o ira sa vakailavo, rogo, se kaukauwa maivei ira sa sega ni vakaoqo? Meda na kakua vakacava ni raici ira vakaduidui na tamata era sa yavutaki tu ena kedra dui ituvaki? Ena sala cava era sa vutuniyau duadua dina kina o ira sa daumuria na iVakabula ena yalodina? (raica na Jemesa 2:5).

Jemesa 3

Na vosa eda dau vakayagataka sa tu kina na kaukauwa me vakamavoataka se vakalougatataka na tamata.

• Na ivakatayaloyalo qaqa a vakayagataka o Jemesa sa rawa me veivakananumi ka vakauqeti keda me da vakayagataka na vosa—na kena a cavuti kei na kena e volai—me ra laveti na tamata. Sa rawa mo sureta na lewe ni kalasi mera vakadikeva na Jemesa 3, ka vaqara na ivakatautauvata a vakayagataka o Jemesa me vakamacalataka na ivakarau e rawa me vakamavoataka se vakalougatataka kina eso; sa rawa ni so na lewe ni kalasi mera droinitaka na iyaloyalo ni veika era raica. E ivakaraitaki vakacava ni nona veidusimaki o Jemesa ena iwase oqo na ivakatautauvata eso oqo? Me vakataka, na vosa ena yaco vakacava me vaka na bukawaqa? De rawa ni ra wasea na lewe ni kalasi na veika era sa sotava ka ivakaraitaki ni kaukauwa e tu ena vosa. Sa rawa mo sureta na lewe ni kalasi mera tugana na sala mera na bulataka kina na ivakasala i Jemesa.

Vakatoroicaketaki na Noda Veivakavulici

Vakayaloqaqataka na yalo ni veidokadokai. “Vukei ira nomu lewe ni kalasi mera kila vinaka ni o ira yadua era vakayaco-ka ki na yalo ni kalasi. Vakayaloqaqataka mera vukea na nomu tauyavutaka e dua na ituvaki rawarawa, veilomani, ka veidokai me ra vakila vakayadua ni rawa mera wasea na veika era sotava, taro, ka soli ivakadinadina”(Veivakavulici ena iVakarau ni iVakabula,, 15).