E matadredredre tiko o Jisu Karisito ni dabe tiko kei ira na gone matadredredre

Perfect Love,, mai vei Del Parson

27 ni Noveba–3 ni Tiseba

1–3 Joni; Juta

“Sa Loloma na Kalou”

Na itoko kei na ivakavuvuli cava eso e votu vei iko ni ko wilika na 1–3 Joni kei na Juta? O na vakayagataka vakacava mo vukea kina na nomu lewe ni kalasi?

ivakatakilakila ni veiwasei

Sureta na Veiwasei

Sureta e vica na lewe ni kalasi mera wasea na itoko se dina eso e cecere vei ira ni ra vulica na iVola i Joni kei na Juta. Na itukutuku cava mai na ivola oqo a baleti ira vakalevu kei na nodra matavuvale?

ivakatakilakila ni veivakavulici

Vakavulica na iVunau

1 Joni 1:5–10; 2:3–11; 3:1–3; 4:7–21; 5:1–3

Na Tamada Vakalomalagi kei Jisu Karisito erau ivakaraitaki uasivi duadua ni rarama kei na loloma.

• O na vukei ira vakacava o vakavulica mera kila na rarama kei na loloma ni Kalou ena nodra bula? Ena rawa mo tekivu ena nomu vola na vosa rarama kei na loloma ena vava ni volavola Kerea na lewe ni kalasi mera wasea na imatai ni vosa e lako mai na nodra vakasama ni ra vakasamataka na rua na vosa oqo. Sa rawa kina lewe ni kalasi yadua me vulica e dua vei ira na malanivosa ni ivolanikalou oqo, ka vakaraica e dua na ka e vakavulica na veitikina me baleta na rarama se na loloma: 1 Joni1:5–10; 2:3–11; 3:1–3; 4:7–12; 4:16–21; 5:1–3. Kerea e vica vei ira mera wasea kina kalasi na veika era kunea. Sa rawa talega mo sureti ira na lewe ni kalasi mera wasea na gauna era a vakila kina na rarama kei na loloma i Tamada Vakalomalagi.

• Sa rawa mo sureta na lewe ni kalasi mera raica na rarama ni cina ena dokanivale e cake se na rarama ni cina mai na dua na rumu ka wasea na ka era kila baleta na rarama ni cina vakayago. E tautauvata vakacava na rarama ni cina kei na rarama vakayalo? Sa rawa mera vulica na lewe ni kalasi na veika oqo mera kunea kina na ikuri ni veivakararamataki ena sala e vakarautaka kina na Kalou kei na Luvena na rarama kina noda bula: Same 27:1; Joni 1:4–5; 1 Joni 1:5–7; 3 Nifai 11:11; Vunau kei na Veiyalayalati 88:6–13; kei na dua na serenilotu me baleta na rarama, me vaka na “Noqu Rarama na Turaga” (Sere ni Lotu, naba. 45). Sa rawa mera wasea talega na lewe ni kalasi na gauna era a vakasaqara ka ciqoma kina na rarama vakayalo ki na nodra bula.

1 Joni 2:18–28; 4:3; 2 Joni 1:7–11; 3 Joni 1:9–11; Juta

Sa dodonu me da “[tutaka] ena ivakavuvuli i Karisito.”

• Na ivakavuvuli i Joni kei Juta me baleta na vukitani e rawa ni vukei ira na lewe ni kalasi mera vakasamataka na sala mera vaqaqacotaka tiko kina na nodra vakabauti Jisu Karisito. Vakasamataka mo sureta e veimama ni kalasi mera vakasaqara na ivakamacala baleta na ivakavuvuli lasu se vukitani ena 1 Joni 2:18–23, 26–28; 4:3; 2 Joni 1:7–11; 3 Joni 1:7–11 kei na ikarua ni veimama me ra vakasaqara na ivakamacala vata o ya ena Juta. Se e rawa ni ra vaqara na isau ni taro vakaoqo: E vakamacalataka vakacava o Joni kei Juta e dua na meca i Karisito? (raica talega na iDusidusi ki na iVolanikalou,“Antichrist,” scriptures. ChurchofJesusChrist.org). E tiko beka e dua na ka ena veitiki ni ivolanikalou oqo e vaka me tautauvata kina bolebole eda sotava tiko nikua? Na cava na kena ibalebale me da “[tutaka] na ivunau i Karisito”? 2 Joni 1:9).

• E vakayagataka o Juta na raitayaloyalo taleitaki me vakamacalataki ira na qasenivuli lasu se o ira era “sa vosavakacacataka na ka era sa lecava” (Juta 1:10). Sa rawa mo sureta e vica na lewe ni kalasi mera droinitaka ena papa eso na raitayaloyalo e tukuni tiko ena Juta 1:12–13 ka mera vakilakila na vo ni kalasi na malanivosa cava e droinitaka tiko o lewenikalasi. Era matataka vakacava na iyaloyalo oqo na qasenivuli lasu kei na meca i Karisito? Me vakataka, era bulia vakacava na ivalavala butobuto na “duka e na [noda] kana veilomani”? Na cava e rawa ni da cakava me da taqomaki keda mai vei ira na “dauveivakasewasewani”? (raica na Juta 1:18–21). Na cava a rawa ni vakasalataka o Juta me rawa ni da “lomani ira sara” (Juta 1:22kina sa dauvakasewasewana na kosipeli?

marama e vukea tiko na gone me wilika na ivolanikalou

“Sa ka levu na noqu reki ena vuku ni ka e duabau ga oqo, niu sa rogoca era muria na dina ko ira na luvequ” (3 Joni 1:4).

3 Joni 1:1–4

Eda na kune reki ni da vukei ira na tamata mera “muria na dina.”

• Era tiko beka eso ena nomu kalasi era rawa ni tukuna na ka a vakila o Joni ni a kaya ni “ka levu na noqu reki” ni rogoca ni ko Keo (dua vei ira na “luvena”) sa muria voli na dina. Era na vuli vakalecu na lewe ni kalasi ena nodra rogoca na veika era dui lako curuma. Sa rawa mo tekivu ena nomuni wilika vata na 3 Joni 1:1–4 kei na ivolanikalou era tiko ena “iKuri ni iVurevure.” Na cava era vakavulica vei keda na ivolanikalou oqo me baleta na ivurevure ni reki dina? Sa rawa mera veivosakitaka na lewe ni kalasi na nodra nanuma vaka-itubutubu, daukaulotu, iluliu ni Lotu, se qasenivuli ni ra sa kila era sa muria tiko na dina o ira era sa vakavulica. Ni bera na kalasi sa rawa mo kerea e vica na lewe ni kalasi mera kauta mai eso na iyaloyalo ni tamata era sa vukea mera lako maivei Karisito ka tukuna na veika era sa sotava.

ivakatakilakila ni ivurevure

iKuri ni iVurevure

Na ivolanikalou sa baleta na nodra vukei na tamata mera muria na dina.

• Vakarua 6:6-7

• Vakaibalebale 22:6

• Joni 4:36

• 1 Cesalonaika 3:9

• Mosaia 4:14–15

• Alama 17:1–2; 26:11–37

• Vunau kei na Veiyalayalati 18:10–16; 50:22

Vakatoroicaketaki na Noda Veivakavulici

Masulaki ira na nomu lewe ni kalasi. Me vakataka ga na iVakabula ni a masulaki Pita (raica na Luke 22:32), e dodonu mo masulaka na yacadra o vakavulica tiko, ka vakasaqara mo kila na nodra gagadre yadua. Ni o vakayacora vakakina, na Tamada Vakalomalagi ena “vakarautaka na nodra vakasama” (Alama 16:16) ka vukei iko mo kila na veika mo vakavulica me rawa ni o sotava kina nodra gagadre (raica na Veivakavulici ena iVakarau ni iVakabula, 6).