lami e dabe tiko ena co

4–10 ni Tiseba

Ai Vakatakila 1–5

“Na Lagilagi, kei na Kaukauwa, Vua … na Lami ka Sega ni Mudu”

Na ciqomi ni veivakauqeti vakayalo ena vukei iko mo kila na nona veivakavulici na Yalo Tabu. Na nomu katona ka vakamuria na veivakauqeti oqori e vakaraitaka tiko ni ko mareqeta ka gadreva mo ciqoma vakalevu.

ivakatakilakila ni veiwasei

Sureta na Veiwasei

Ni o tekivuna e dua na veivosaki, ena veivuke mo sureti ira na lewe ni kalasi mera wasea e dua na itukutuku era a vulica baleta na ivola na Vakatakila ena nodra a vulica vakai ira yadua se vakamatavuvale. Me ivakaraitaki, na cava era sa vulica me baleta na ituvatuva i Tamada Vakalomalagi me vakabulai ira na Luvena? Na cava era sa vulica me baleta na iVakabula kei na Nona itavi ena ituvatuva oqo? Vakayaloqaqataki ira na lewe ni kalasi mera vakasaqara tikoga na itukutuku bibi baleti Jisu Karisito kei na ituvatuva ni veivakabulai ni ra tomana tiko na nodra wilika na Ai Vakatakila mai vale. Solia e dua nagauna ena loma ni kalasi mera wasea na veika era vulica.

ivakatakilakila ni veivakavulici

Vakavulica na iVunau

Ai Vakatakila 1

O Jisu Karisito na Luvena Bula na Kalou sa Bula.

• Na iyaloyalo kei na ivakatakarakara ena Ai Vakatakila 1 e vakadinadinataka vakamatata ni bula tiko o Jisu Karisito ka dusimaka tiko na Nona Lotu. Sa rawa mera vola ena vava na lewe ni kalasi e vica na malanivosa mai na Ai Vakatakila 1 oka kina na iyaloyalo se ivakatakilakila ka wasea na ka yadua era vakavulici kina baleti Jisu Karisito. Me vakataka, na cava eda vulica mai na ivakatakilakila oqo me baleta na Nona liutaka tiko o Karisito na Nona Lotu nikua? E vakatauvatani vakacava na nona vakamacalataka na iVakabula o Joni ki na kena ena Vunau kei na Veiyalayalati 110:1–4?

Ai Vakatakila 2–3

E kilai keda vakavinaka o Jisu Karisito ka na vukei keda meda vorata na veibolebole eda sotava.

• Na wiliki ni itukutuku ni Turaga ki na veitabana ni Lotu ena Ai Vakatakila 2–3 ena rawa ni vukea na nodra vakadeitaki na lewe ni kalasi ni sa kila tiko na iVakabula. Sa rawa mo sureti ira mera vakadikeva na veiwase oqo me ra kunea na ivakadinadina ni sa kila tu o Jisu Karisito na veivakatovolei kei na kaukauwa ni veitabana yadua. Sa rawa talega mera wasea na veika era sotava ka ra vakila kina ni sa kila vinaka tu na iVakabula na kedra ituvaki duatani. Na ivakasala cava a solia na Turaga vei ira na Yalododonu ena rawa talega me vukea noda ulabaleta na noda sasaga bula tiko?

• Ena veiwase vata oqo a yalayala veivakauqeti kina na Turaga kivei ira era na uabaleta rawa. Sa rawa mo sureta na lewe ni kalasi mera veisa ka vakasaqara ena Ai Vakatakila 2–3 na yalayala oqo ni Turaga. Sa rawa talega mera droinitaka eso na iyaloyalo e tukuna tiko na yalayala oqo, ka qai wasea ki na kalasi na veika era sa kunea. E vakauqeti keda vakacava na yalayala oqo mera saga tiko ga mera uabaleta yani na nodra veivakatovolei kei na malumalumu?

Ai Vakatakila 5

Ena rawata duadua ga o Jisu Karisito me vakavotukanataka na ituvatuva ni Tamada Vakalomalagi.

• Ena veivuke beka e dua na lesoni vakatakarakara mera kila vinaka kina na lewe ni kalasi na ivakatakilakila e tiko ena Ai Vakatakila 5 me baleta na iVakabula ni dolava na ivola sa dregati? Sa rawa mo kauta mai e dua na iloloma e lokataki tu ena koniteina ka wase ena kalasi. Ni bera na kalasi, mo solia vuni vua e dua natamata na ki ni kena loka. Tukuna kina kalasi na cava e tiko ena loma ni koniteina, ka me vica na lewe ni kalasi mera saga mera dolava na koniteina ni bera ni dolava o koya e tiko vua na kena ki. Mera qai vakatauvatana na kalasi na lesoni ivakatakarakara oqo ki na Ai Vakatakila 5. E rawa ni veivuke na taro vakaoqo: E tautauvata vakacava na nodra vakabulai na luvena na Tamada Vakalomalagi kina koniteina lokataki se na ivola dregati? Na cava na vuna o Jisu Karisito duadua ga kina e rawa ni dolava na idrega? (raica na vosacavuti ena “iKuri ni iVurevure”).

• Me vakataki ira ga na tamata mamarau era tukuni tiko ena Ai Vakatakila 5sa rawa talega vei keda nikua meda laveta cake na domoda meda vakacaucautaka na iVakabula ni sai Koya Ga sa kilikili kaya me vakabulai keda. De rawa ni ra lagata vata na lewe ni kalasi e dua na sere ni lotu ni vakacaucau taleitaki me baleta na iVakabula, me vaka “Me Laglagi Tu” (Sere ni Lotu, naba. 34). Sa rawa ki na lewe ni kalasi me ra raica na dina e vakavulica tiko na serenilotu me baleti Jisu Karisito. Na tautauvata cava eda sa raica kina nodrau itukutuku na noda serenilotu ni vakacaucau kei na ivakaro raraba ena Ai Vakatakila 5:9–14?

ivakatakilakila ni ivurevure

iKuri ni iVurevure

O Jisu Karisito duadua ga e rawa ni sorovaki keda.

Ni vakamacalataka tiko na bula taumada, a vakavulica kina o Elder Jeffrey R. Holland:

“A soli Koya na Karisito me rokova kina na nodra galala ni digidigi na kawatamata kecega ena Nona sorovaka na nodra ivalavala ca. Ni yaco oqo, ena vakalesua o Koya vei Tamana na lagilagi kece baleta na loloma veivueti vakaoqo.

“Na Veisorovaki tawamudu oqo i Karisito a rawa ena vuku ni (1) O Koya duadua ga na tamata e bau bula e vuravura oqo me tawacala ka sa sega ni oka me mate vakayalo ena vuku ni ivalavala ca, (2) O Koya Duadua ga na Luvena Duabau na Tamada ka sa tu Vua na ivakarau ni bulavakalou ka soli kina Vua na kaukauwa me rawa na mate vakayago, ka (3) sai Koya duadua ga sa yalomalua sara ka sa yalona dina mai na matabose taumada me lesi taumada mai ki na veiqaravi o ya” (The Atonement of Jesus Christ,”,” Liaona, Maj. 2008, 35).

Vakatorocaketaki Noda Veivakavulici

Vakayagataka na ivolanikalou kei na nodra vosa na parofita edaidai. “Sa vakaroti keda na Turaga me da “veivakavulici vakai [keda] ena ivakavuvuli ni matanitu” [Vunau kei na Veiyalayalati 88:77] ka vakayagataka na ivolanikalou me “vunautaki yani na [Nona] kosipeli” [Vunau kei na Veiyalayalati 42:12]. Na ivolanikalou kei na nodra malanivosa na parofita kei na apositolo ni gauna oqo era ivurevure ni dina eda vakavuvulitaka” (Veivakavulici ena iVakarau ni iVakabula, 21).