“11–17 ni Tiseba. Ai Vakatakila 6–14: ‘Era Uabaleta ‑‑‑ ena Dra ni Lami,’“ Lako Mai, Mo Muri Au—Me Baleta na Matawilivola ni Sigatabu: Veiyalayalati Vou 2023 (2021)
“11–17 ni Tiseba. Ai Vakatakila 6–14,” Lako Mai, Mo Muri Au—Me Baleta na Matawilivola ni Sigatabu: 2023
Droini vakasokumuni mai vei Eric Johnson: The Grand Council, mai vei Robert T. Barrett; star cluster iloloma ni European Space Agency
11–17 ni Tiseba
Ai Vakatakila 6–14
“Era sa Uabaleta ‑‑‑ ena Dra na Lami”
E kaya o Josefa Simici ni ivola ni Ai Vakatakila “sa dua vei ira na ivola talei sa lewa na Kalou me volai” (ena iVolaniveisiga, Tiseba 1842–June 1844; iVola 2, 10 ni Maji 1843–14 ni Julai 1843,98, JosephSmithPapers.org). O na vukei ira vakacava na lewe ni kalasi mera kunea na dina matata ena veiwase oqo?
Sureta na Veiwasei
Me vukei ira na lewe ni kalasi mera railesuva eso na veivakararamataki era sa vulica ena Ai Vakatakila 6–14, vola na naba 6 ki na 14 ena papa. Me ra vola na lewe ni kalasi e yasa ni dua na naba e dua na rai titobu era kunea ena wase veisemati ka veiganiti kivua e dua e bula tiko ena iotioti ni gauna.
Vakavulica na iVunau
E dolava o Jisu Karisito na drega ni ivola.
-
Me vukei ira na lewe ni kalasi mera raitayaloyalotaka na ivola ka vitu na kena drega (raica na Ai Vakatakila 5:1), sa rawa mo vakamacalataka ni ivivivi makawa e dau vauci vata kei na dua na qele se drega. Na mama se sitaba ena kau yani kina tete se soso, ka vakatakilai kina na lewa i koya a vauca na ivivivi kei na veivakayalolailaitaki vei ira na tamata sega ni vakadonui mera dolava. Mera qai wasea na lewe ni kalasi e dua na vakasama se veivakauqeti era a wilika tiko me baleta na ivola oqo ena Ai Vakatakila 6; Vunau kei na Veiyalayalati 77:6–7; kei na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Na cava na vuna o nanuma kina ni sa rui bibi mo kila na ibalebale ivakatakarakara ni ivola oqo? Na cava na vuna o nanuma kina ni sa rui bibi me da kila ni iVakabula sai koya me dolava na drega yadua ni ivola? (raica na Ai Vakatakila 5:1–9).
“Na matanitu ni vuravura oqo sa yaco me matanitu ni noda Turaga.”
-
Na iVakatakila 7–11 e rawa ni dredre me kilai. E dua na veivakalougatataki ni kalasi ni Matawilivola ni Sigatabu oya ni sa rawa vei ira na lewe ni kalasi mera veivukei vakai ira mera kila vakavinaka na ivolanikalou. E rawa nio cakava e dua na lisi ni taro eso e tu vei ira na lewe ni kalasi me baleta na veiwase oqo ka sureti ira me ra veiwaseitaka na veivakararamataki vakai ira. Vakayaloqaqataki ira taucoko na lewe ni kalasi—o ira era na vakila ni ra vuku cake vakalevu kei ira era nanuma nira sega soti ni kilaka vakalevu—me ra wasea na nodra veivakararamataki me baleta na veiwase oqo.
-
Sa rawa mo tekivuna e dua na veivosaki ena nomu tarogi ira na lewe ni kalasi ena veika era sa kunea ena Ai Vakatakila 7–11. Sa rawa mera wasea na veitikina e kunei kina na itoko oqo ka vakamacalataka na vuna e bibi kina na itoko. Kevaka era gadreva na veivuke, sa rawa mo vakatura mera wilika na Ai Vakatakila 11:15–17. Na itoko cava era kunea ena veitikina oqo, ka na vakaraitaki vakacava na itoko oqo ena veitikina tale eso ena Ai Vakatakila 7–11? E dina ga ni vakamacalataka na veiwase oqo na ivalu kei na mate veitauvi, na cava eda kunea ka solia vei keda na inuinui kei na yalodei vei Jisu Karisito?
Eda sa rawai Setani “ena vuku ni dra ni Lami, kei na vuku ni vosa ni [noda] ivakadinadina.”
-
Ni da vulica na ka e baleta na iValu mai Lomalagi ena rawa me vukea meda kila vinaka na bula ena vuravura oqo. Sa rawa kina lewe ni kalasi mera wilika na iVakadewa i Josefa Simici, Ai Vakatakila 12:7–11 (ena iituvatuva vakamatanivola ni iVolatabu) ka raica na sala eda rawai Setani kina kei na nona lewevuqa. Na veivakararamataki cava eso eda rawata mai na ivakamacala ni iValu mai Lomalagi e tiko ena Bible Dictionary se Gospel Topics? (topics.ChurchofJesusChrist.org). Na cava eda sa vulica ena vukei keda meda rawa na meca ena gauna ni noda bula oqo?
-
Na ivalu ena maliwa ni vinaka kei na ca e vakamacalataki ena Ai Vakatakila 13–14. Na cava e vakavulica vei keda na wase 13 me baleta na kena vala na drekoni ena ivalu oqo? Me vaka wase 14,, a valuta vakacava na Lami? E rawa ni taleitaki me caka e dua na lisi ni sala eso e vala kina na yasana yadua oqo me vaka ena rua na iwase oqo. Na cava eda kunea e tautauvata kei na cava e duidui?
-
Na cava na ibalebale ni Lami sa “vakamatei mai na ivakatekivu kei vuravura”? Ai Vakatakila 13:8; raica talega na Ai Vakatakila 5:6). Sa rawa mo vukea na nomu lewe ni kalasi mera raica na isaunitaro oqo ena nodra wilika na Mosaia 3:13 kei na Mosese 7:47 vakalasi. Na cava na ibalebale mo rawai Setani “ena dra ni Lami”? (Ai Vakatakila 12:11).
“Au a raica tale e dua na agilosi ‑‑‑ sa tu vei au na kosipeli tawavakaiyalayala.”
-
Na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale e vakatura na vulici ni veimataqali agilosi era a vakalesuya mai “na kosipeli tawamudu ki ‑‑‑ vei ira era sa tiko e vuravura” (Ai Vakatakila 14:6). Kerei ira na lewe ni kalasi me ra wasea na veika era sa vulica. Na cava e vakavulica vei keda na Vunau kei na Veiyalayalati 133:36–40 me baleta na Ai Vakatakila 14:6–7? Eda na vakaitavi vakacava ena cakacaka ni agilosi e tukuni tiko ena Ai Vakatakila 14:6–7? E rawa talega ni o vakaraitaka na vidio “The Work of These Last Days” (ChurchofJesusChrist.org).
Vakatorocaketaki Noda Veivakavulici
E dodonu vinaka me da kaya “Au sega ni kila.” “E dau itovonibula me da via sauma na taro kece sara, ena so na gauna ena ganita me da tukuna ga, “au sega ni kila. Me da vulica mai vakataki keda ena macawa oqo na taro oya, me da qai veivosakitaka ena gauna ka tarava.’” (Veivakavulici ena iVakarau ni iVakabula,, 24). Mo kerei ira na lewe ni kalasi mera vakasaqara ena ivolanikalou kei na ivurevure tale eso ni Lotu na kena isau.