yut i stap klinim wan wol

13–19 Novemba

Jemes

“Yufala I Mekem Wanem Tok i Talem, Yufala I No Lisin Nomo”

Bifo yu ridim aotlaen ia, ridim Buk blong Jemes mo lisin gud long smol voes blong spirit we yu stap kasem. ?Wanem ol prinsipol we yu faenem we i save blesem mo mekem ol memba blong klas blong yu oli glad?

serem pikja aekon

Invaetem Ol Memba blong Serem Wanem Oli Gat

Invaetem ol memba blong klas blong serem ol ves long Jemes we i givim insperesen long olgeta blong oli “mekem wanem toktok i talem” (Jemes 1:22). Sapos i oraet long olgetawan, oli save serem tu wanem oli filim se oli nid blong wok long hem, olgetawan o wetem famli.

tijing aekon

Stap Tijim Doktrin

Jemes 1:5–6

Taem yumi askem wetem fet, God i givim fri nomo.

• Prinsipol we oli tijim long Jemes 1:5–6 i bin lidim Josef Smit i go kasem wan eksperiens long saed blong spirit we i jenisim laef, mo oli save blesem wanwan long yumi long sam wei. Maet bae yu save raetem ol kwestin olsem olgeta ia long bod, mo askem ol memba blong klas blong wanwan i tingting hevi long olgetawan: ?Wanem nao Jemes 1:5–6 i lidim tingting blong yu blong mekem long laef blong yu? ?Wanem we Josef Smit i eksperiensem wetem ol ves ia, i tijim yu abaot olsem wanem blong lukaotem waes, blong ol kwestin blong yuwan? (luk long Josef Smit—Histri 1:10–17). ?Wanem eksperiens i bin tijim yu se “testemoni blong Jemes [i] tru”? (Josef Smit—Histri 1:26). Invaetem ol memba blong klas blong serem ol tingting we oli gat, afta we oli tingting hevi long ol kwestin ia.

• Maet ol memba blong klas oli save talem ol toktok long Jemes 1:5–6 long toktok blong olgetawan blong oli save andastanem. ?Olsem wanem nao hemia i helpem olgeta i andastanem moa ol ves ia? Maet bae yu wantem blong tokbaot tugeta sam long ol toktok long ves ia i minim.

Jemes 1:2–4; 5:7–11

Sapos yumi stanap strong oltaem, Lod bae i lidim yumi i go long laef we i stret evriwan.

• Blong statem wan storian abaot ol tijing blong Jemes, long saed blong fasin blong gat longfala tingting long ol ves ia, maet yu save invaetem ol memba blong klas blong serem ol eksperiens taem oli gat longfala tingting, mo wanem oli lanem aot long eksperiens ia. Afta oli save lukaotem long Jemes 1:2–4; 5:7–11 ol prinsipol we i go wetem ol eksperiens blong olgeta. Maet oli save faenem ol prinsipol long vidio ia “gohed blong gat longfala tingting” (ChurchofJesusChrist.org) o mesej Presiden Dieter F. Uchtdorf “Continue in Patience” (Liahona, May 2010, 56–59). Ol memba blong klas oli save serem wanem oli bin lanem abaot fasin blong gat longfala tingting, taem oli kam blong save Papa long Heven mo Sevya. ?Wanem nao i helpem yumi developem fasin blong gat longfala tingting?

Jemes 1:3–8, 21–25; 2:14–26

“Fet we i no gat wok i go wetem, i wan ded samting.”

• Wan wei blong tokbaot ol tijing blong Jemes abaot fet mo wok, yu save seraotem klas blong yu long tu grup—wan i blong lukaotem from wanem fet i nidim aksen mo narawan i lukaotem from wanem aksen i nidim fet. Blong mekem hemia, oli save rid long Matiu 7:21–23; Jemes 1:6–8, 21–25; 2:14–26; mo Josef Smit—Histri 1:19. Afta wanwan grup oli save serem wanem oli faenem mo tokbaot from wanem tugeta fet mo wok oli nid blong wok tugeta.

  Ebraham i stap prea aotsaed long tenet blong hem

  “Ebraham i bin bilif long God, mo from hemia, God i bin kaontem hem se hem i wan stret mo gud man” (Jemes 2:23). Ebraham long Ol Flat Eria blong Mamre, i kam long Grant Romney Clawson

• Blong helpem ol memba blong klas oli tingting hevi moa long sentens ia “Fet we i no gat wok i go wetem, i wan ded samting” (Jemes 2:26), yu save raetem nara sentens ia long bod: Fet we i no gat wok i go wetem i olsem i no gat . Invaetem ol memba blong klas blong tingting long sam wei blong finisim sentens ia, mo letem oli raetem aedia blong olgeta long bod. ?Wanem nao yumi save mekem blong stap gohed blong wok wetem fet blong yumi long Jisas Kraes?

Jemes 2:1–9

Olsem ol disaepol blong Jisas Kraes, yumi lavem evri pipol, i nomata wanem kaen laef oli stap long hem.

• Blong helpem ol memba blong klas blong klas oli gat insperesen ia blong soemaot lav blong Kraes long evriwan nomata wanem situesen o bodi blong olgeta i olsem wanem, yu save askem ol memba blong klas blong tekem taem blong rid long Jemes 1:9–11; 2:1–9; 5:1–6. Tokbaot ol kwestin olsem olgeta ia: ?wanem i minim blong “gat respek long man”? (Jemes 2:9). ?From wanem samtaem yumi tritim olgeta we oli gat mane, popula, o gat paoa defren long olgeta we oli no gat? ?Olsem wanem yu save kamaot long fasin ia blong tritim ol narawan i defren folem wanem oli gat? ?Long wanem wei, olgeta we oli fetful blong folem Sevya, olgeta nao oli moa rij long evriwan? (luk long Jemes 2:5).

Jemes 3

Ol toktok we yumi yusum oli gat paoa blong blesem o mekem man i harem nogud.

• Ol pikja we Jemes i yusum oli gat paoa blong rimaenem mo pusum yumi blong yusum ol toktok—tugeta blong toktok mo raet—blong leftemap ol narafala man. Tingting blong invaetem ol memba blong klas blong lukluk tru long Jemes 3, mo faenem wanem Jemes i yusum blong komperem olsem wanem yumi yusum ol toktok, we i save blesem o mekem man i harem nogud; sam memba blong klas oli save glad blong droem sam pikja blong ol samting we oli faenem. ?Olsem wanem fasin ia blong komperem samting, i soemaot ol instraksen blong Jemes long japta ia? Eksampol, ?olsem wanem nao ol toktok blong yumi bae i olsem wan faea? Maet ol memba blong klas oli save serem ol eksperiens we i soemaot paoa we lanwis i save gat. Yu save invaetem ol memba blong klas blong tingting hevi long olsem wanem oli save yusum long ol toktok blong Jemes.

Stap Kam Antap long Fasin blong Yumi blong Stap Tij

Leftemap tingting blong gat wan ples we i gat respek long hem. “Helpem ol memba blong klas blong oli andastanem se wanwan long olgeta i tekpat long spirit insaed long klas. Leftemap tingting blong olgeta blong helpem yu stanemap wan ples we i open, man i filim lav, mo wan ples blong respek blong mekem se evriwan oli filim sef blong save serem ol eksperiens, kwestin, mo ol testemoni blong olgeta” (Teaching in the Savior’s Way, 15).