“20–26 Novemba. Fas mo Seken Pita: ‘Yufala I Stap Bilif long Hem, Nao Yufala I Stap Harem Gud Tumas, we Yufala I Glad we I Glad, we I No blong Talem,’” Kam Folem Mi—Blong Sandei Skul: Niu Testeman 2023 (2021)
“20–26 Novemba. Fas mo Seken Pita,” Kam Folem Mi—Blong Sandei Skul: 2023
Kraes I Stap Prij long Spirit Wol, i kam long Robert T. Barrett
20-26 Novemba
Fas mo Seken Pita
“Yufala I Stap Bilif long Hem, Nao Yufala I Stap Harem Gud Tumas, we Yufala I Glad we I Glad, we I No blong Talem”
Tingbaot se stamba tingting blong yu i blong tijim ol pipol be i no blong tijim lesen nomo. Taem yu rid long Leta blong Pita, tingting long wanwan memba blong klas. ?Wanem prinsipol bae i bildimap fet blong olgeta?
Invaetem Ol Memba blong Serem Wanem Oli Gat
Raetem ol taetel ia Fas Pita mo Seken Pita long bod. Givim taem long ol memba blong klas blong lukluk bak long ol leta ia mo raetem ol toktok o ol sentens we oli faenem se oli gat mining andanit long ol taetel we i stap ia. Mo afta yusum lis ia blong invaetem pipol blong serem ol tingting blong olgeta.
Stap Tijim Doktrin
1 Pita 1:3–9; 2:19–24; 3:14–17; 4:12–19
Mi save faenem glad long ol taem blong hadtaem mo safaring.
-
Wan wei blong lukluk bak long toktok blong Pita long 1 Pita 1:3–9; 2:19–24; 3:14–17; mo 4:12–19 hem i blong invaetem ol memba blong klas, blong tingabaot wan we oli save long hem, we i stap eksperiensem wan hadtaem. Givim taem long olgeta long klas blong raetem wan leta i go long man ia, mo tu, raetem ol trutok we i stap long ol ves ia long leta ia, blong leftemap tingting blong man ia (luk tu long Doktrin mo Ol Kavenan 121:1–8; 123:17). Afta ol memba blong klas oli save tokbaot ol trutok we oli bin jusum.
Oli singaotem yumi blong stap olsem ol “pipol blong God.”
-
Tijing blong Pita long 1 Pita 1:13–20 mo 2:1–12 i save stap olsem wan insperesen blong helpem yumi tingbaot olsem wanem Lod i luk long yumi—ol pipol blong Hem—mo wanem Hem i wantem long yumi. Maet bae yu invaetem ol memba blong klas blong lukaotem ol ves ia blong faenem ol eksplenesen blong wanem i minim blong stap olsem “pipol blong God” (1 Pita 2:10) mo afta, tokbaot wanem oli faenem. Yu save eksplenem toktok ia “peculiar” long 1 Pita 2:9 i minim blong “pemaot” o “kipim i sef” (luk long futnot f). Wanem nao hemia i tijim yumi abaot wei we God we i stap filim abaot yumi mo olsem wanem Hem i wantem yumi blong laef?
Oli prijim gospel long olgeta we oli ded, blong mekem se oli save jajem olgeta i fea.
-
Fas leta blong Pita i holem sam toktok long Baebol we Jisas Kraes i bin visit i go long spirit wol afta long ded blong Hem—wan samting we i hapen, we revelesen blong tedei i helpem yumi blong andastanem moa. Blong helpem ol memba blong klas blong oli mekem andastaning blong olgeta abaot spirit wol i kam mo bigwan, yu save invaetem olgeta blong rid long ol skripja ia mo raetem wanem oli lanem long bod: Jon 5:25; 1 Pita 3:18–20; 4:6; Alma 40:7–14, 21; Doktrin mo Kavenan 138:11–32 (luk tu long “Sam Moa Risos.”) ?From wanem hem i impoten blong save abaot visit blong Sevya we i go long spirit wol? ?Olsem wanem nao save ia i mekem yumi filim abaot God mo plan blong Hem blong sevem man?
Tru long paoa blong Jisas Kraes, yumi save developem tabu fasin blong yumi.
-
Blong leftemap tingting blong olgeta we yu stap tijim blong oli traehad blong kam olsem Jisas Kraes, yu save invaetem olgeta blong oli lukaotem ol kwaliti blong Jisas Kraes we oli tokbaot long 2 Pita 1:1–11. Tingting blong raetem ol kwaliti ia long bod mo askem ol memba blong klas blong oli talem ol mining blong olgeta. Ol memba blong klas oli save tokbaot olsem wanem taem yumi developem wan kwaliti, i lidim olgeta blong developem ol narafala kwaliti. Givim taem long olgeta blong tingting hevi long wanem kwaliti bae oli laekem blong wok from fulwan.
Wanwan kwaliti blong Kraes we yumi developem i olsem yumi wivim insaed long yumi fasin blong stap olsem wan tru disaepol.
Sam Moa Risos
Wok blong pemaot olgeta we oli ded i stap testifae long misin blong Kraes.
Elda D. Todd Christofferson i tijim:
?“Wanem ples nao bilian blong olgeta we oli ded mo oli no gat save abaot Jisas? Wetem gospel blong Jisas Kraes we i bin kambak yumi kam blong save olsem wanem oli pemaot olgeta we oli ded mo no kasem baptaes, mo tu olsem wanem God i wan God we i ‘stret mo i gat sore tu’ [Alma 42:15].
“Taem Hem i stap laef yet, Jisas i bin profesae se bae Hem tu bae i prijim gospel long olgeta we oli ded [luk long Jon 5:25]. Pita i talem long yumi se hemia i hapen bitwin taem we oli hangem Sevya long kros, mo taem Hem i Laef Bakegen long Ded [luk long 1 Pita 3:18–19]. Presiden Joseph F. Smith witnesem visen ia we Sevya i visitim spirit wol [luk long Doktrin mo Ol Kavenan 138:30, 33]. …
“Glad blong yumi blong pemaot ol ded, mo taem mo ol paoa we yumi putum biaen long komitmen ia i bitim evri samting, we i soem witnes blong yumi long saed blong Jisas Kraes. Hemia i fomem wan stetmen we i gat moa paoa, taem yumi mekem folem tabu fasin mo misin blong Hem. I testifae faswan, long Laef Bakegen long Ded blong Kraes, namba tu, Atonmen blong Hem we i no gat en, namba tri, we i Hemwan ia nomo i stamba blong plan blong sevem man, namba fo, Hem nao i givim ol kondisen blong plan blong sevem man” (“The Redemption of the Dead and the Testimony of Jesus,” Ensign, Nov. 2000, 9–10).
Stap Kam Antap long Fasin blong Yumi blong Stap Tij
Tijim poen ia: “from wanem.” “Samtaem, olgeta we oli stap lan—speseli ol yut—oli stap askem olgetawan olsem wanem nao ol prinsipol blong gospel oli abaot olgeta, o from wanem oli mas obei long samfala impoten komanmen. Be, sapos oli andastanem plan blong hapines blong ol pikinini blong Papa long Heven, risen blong ol gospel prinsipol mo komanmen, oli kam moa klia mo invitesen blong stap obei bae i kam moa antap” (Teaching in the Savior’s Way, 20).