Pomad blong Giliad, i kam long Annie Henrie

30 Oktoba–5 Novemba

Hibrus 1–6

Jisas Kraes, “I Prapa Man blong Sevem Man”

Tingting blong serem wetem ol memba blong klas blong yu, sam long ol filing mo tingting we yu kasem tru long Tabu Spirit abaot Hibrus 1–6. Taem yu mekem olsem i givim insperesen long olgeta blong mekem semmak samting taem oli stadi long ol skripja.

Invaetem Ol Memba blong Serem Wanem Oli Gat

Ol memba blong klas we oli no stap tekpat oltaem long klas, bae oli nidim wan taem we i stret, blong invaetem olgeta mo wan smol taem blong oli rere. Yu save kontaktem sam long olgeta, wan o tu dei bifo, mo askem olgeta blong kam rere blong serem wan ves insaed long Hibrus 1–6 we gat mining long olgeta.

Stap Tijim Doktrin

Hibrus 1–5

Jisas Kraes, “I Prapa Man blong Sevem Man”

• ?Olsem wanem nao yu save leftemap tingting blong ol memba blong klas blong serem ol skripja we oli gat mining abaot Jisas Kraes, we oli faenem long stadi blong olgetawan mo wetem famli blong olgeta? Raetem faef kolom long bod, wan blong wanwan long ol faef fas japta long Hibrus. Invaetem ol memba blong klas blong raet long stret kolom, ol sentens blong ol japta ia we i tijim olgeta abaot Jisas Kraes mo namba blong ves we wanwan sentens ia i stap long hem. ?Olsem wanem taem yumi save ol samting ia abaot Sevya i helpem fet blong yumi long Hem mo se, yumi wantem folem Hem?

Hibrus 2:9–18; 4:12–16; 5:7–8

Jisas Kraes i safa from evri samting, mekem se Hem i save andastanem mo helpem yumi taem yumi safa.

• Hibrus 2:9–18; 4:12–16; 5:7–8 i save helpem ol pipol we oli stap luk ol safaring long wol, mo oli stap tingting sapos God i stap o i iven kea long wanem i stap hapen. Maet ol memba blong klas oli save lukaotem ol trutok insaed long ol ves ia we i save helpem olgeta wetem kaen kwestin olsem. ?Wanem nao ol ves ia oli tijim abaot olsem wanem Sevya i ansa long safaring blong ol man? Maet bae i help tu blong invaetem ol memba blong klas blong serem ol eksampol we i stap long skripja abaot Jisas Kraes, we i bin sapotem mo kamfotem ol pipol long safaring blong olgeta (luk long “Sam Moa Risos”) o soem vidio ia “Mountains to Climb” (ChurchofJesusChrist.org). Ol memba blong klas oli save tokbaot wanem we oli lanem abaot Sevya, we i save helpem yumi taem yumi fesem ol jalenj we oli had.

Hibrus 3:7–4:2

Ol blesing blong God i stap rere blong olgeta we “oli no mekem hat blong olgeta i kam strong.”

• Hibrus 3 mo 4 i holem ol toktok we oli stap askem strong long ol Sent blong no stap mekem hat blong olgeta i kam strong we bae mekem oli sakemaot ol blesing we God i wantem blong givim long olgeta. Taem yu mo klas blong yu i rid long Hibrus 3:7–4:2, tokbaot ol wei we ol eksperiens blong ol laen blong Isrel oli save yusum long taem blong yumi tedei, semmak olsem we i ol man Hibrus oli bin yusum taem we Jos i stap long ples blong olgeta (luk long ol tul blong stadi abaot ol ves ia insaed long Aotlaen blong wik ia long Kam Folem Mi—Blong Wanwan Man, Woman mo Famli). ?Wanem yumi save mekem blong mekem hat blong yumi i sofsof mo i save akseptem tingting blong Lod? (luk long Ol Proveb 3:5–6; Alma 5:14–15; Ita 4:15). Ol memba blong klas oli save serem olsem wanem olgeta o ol narawan we oli save oli bin kasem blesing from se oli gat wan sopsop hat mo wan hat we i wantem sakem sin.

Hibrus 5:1–5

Olgeta we oli wok insaed long kingdom blong God, God nao i mas singaotem olgeta.

• Mesej we i stap long Hibrus 5 abaot olgeta we God i singaotem olgeta blong holem prishud, oli save yusum long olgeta we oli set apat wetem prishud atoriti blong givim seves long ol koling blong Jos. Blong helpem ol memba blong klas blong lanem wanem i minim blong “God i singaotem wan, olsem we i mekem long Eron,” invaetem olgeta blong luklukbak long stori blong Eron taem hem i kasem koling blong hem long Eksodas 4:10–16, 27–31; 28:1. ?Wanem infomesen insaed long stori ia i helpem yumi andastanem Hibrus 5:1–5? Ol memba blong klas oli save serem olsem wanem oli kasem konfemesen abaot wan we God i singaotem hem blong fulfilim wan spesel koling—oli save serem abaot olgeta tu sapos oli gat. ?Olsem wanem nao konfemesen ia i helpem olgeta blong sapotem gud man ia o woman ia long koling blong hem?

“I nogat man we hem nomo i save jusumaot hae nem ya, se hem bambae i hae pris. God nomo i save singaot man blong i tekem wok blong hae pris, olsem we hem i singaotem Eron bifo” (Hibrus 5:4). Moses I Singaotem Eron long Wok blong Givhan, i kam long Harry Anderson

Sam Moa Risos

Ol skripja we oli givim eksampol blong pipol we Jisas Kraes i kamfotem olgeta.

• Jon 8:1–11: Lod i givim kamfot long woman ia we i komitim adaltri.

• Jon 11:1–46: Lod i givim kamfot long Meri mo Mata afta long ded blong brata blong tufala, Lasaros.

• Inos 1:4–6: Lod i bin fogivim ol sin blong Inos mo i karemaot filing blong gilti we i stap long hem.

• Mosaea 21:5–15: Lod i mekem ol hat blong ol man blong Leman i kam sofsof blong mekem se oli no givim tumas hadtaem long pipol blong Limhae.

• Mosaea 24:14–15: Lod i mekem pipol blong Alma i kam strong blong oli save winim ol hadtaem blong olgeta.

• Ita 12:23–29: Ol toktok blong Lod i givim kamfot long Moronae.

• 3 Nifae 17:6–7: Sevya i bin hilim Ol Man blong Nifae long ol sik blong blong olgeta.

• Doktrin mo Ol Kavenan 121:7–10: Lod i kamfotem Josef Smit (luk tu long Doktrin mo Ol Kavenan 123:17).

Kam Antap long Fasin blong Yumi blong Stap Tij

Krietem wan envaeromen we spirit i stap long hem. Taem yu mekem klasrum blong yu i kam wan ples we pis mo lav i stap, bae i moa isi blong Spirit i tajem hat blong olgeta we yu stap tijim olgeta. ?Wanem yu mas mekem blong invaetem paoa blong Spirit i kam insaed long klas blong yu? ?Yu save setemap gud jea bakegen blong sidaon o yusum pikja o miusik blong invaetem Spirit? (Luk long Teaching in the Savior’s Way, 15.)