Melkesedek i stap givim wan blesing long Abraham

Melkesedek i Blesem Abraham, i kam long Walter Rane. Presen blong artis

6–12 Novemba

Hibrus 7–13

“Hibrus 7–13: Wan Hae Pris blong Ol Gud Samting we Bae Oli Kam”

Taem yu rid long Hibrus 7–13, tingting hevi long wanem mesej Lod i gat blong ol Sent blong Hibrus. Tingting hevi tu long mesej blong Hem long yu mo long olgeta we yu tijim.

serem pikja aekon

Invaetem Ol Memba blong Serem Wanem Oli Gat

Bifo klas i stat, invaetem sam memba blong klas blong stap rere blong kam serem ol ves long Hibrus 7–13 we i helpem olgeta “go kolosap [long God] wetem wan tru hat we fulap gud wetem fet” (Hibrus 10:22).

tijing aekon

Stap Tijim Doktrin

Hibrus 7–10

Ol odinens blong bifo mo tedei oli poen i go long Jisas Kraes.

• Aotlaen blong wik ia long Kam Folem Mi—blong Wanwan Man, Woman mo Famli i givim tingting blong lukaotem long Hibrus 7 ol ves we oli tij abaot Melkesedek Prishud mo oli testifae abaot Jisas Kraes. Invaetem ol memba blong klas blong serem wanem oli faenemaot. O yu save givim taem long olgeta long klas, blong luklukbak long japta 7 mo faenem ol ves we oli tijim prishud ia mo testifae abaot Sevya. ?Olsem wanem nao Melkesedek i olsem Jisas Kraes? (luk ol taetol blong Melkesedek long ves 1–2). ?Olsem wanem nao ol odinens blong Melkesedek Prishud oli helpem yumi kam long Kraes? Maet ol memba blong klas oli save faenem ol gudfala ansa long Gaed long Ol Skripja “Melkesedek Prishud” (ChurchofJesusChrist.org).

• Nomata se yumi nomo mekem sakrifaes long ol animol, tedei yumi tekpat long ol odinens we, long sem fasin, i poenem sol blong yumi i go long Kraes mo i givim “givim raet long ol rod blong ol blesing mo ol paoa blong heven oli kam insaed long wanwan laef blong yumi” (David A. Bednar, “Always Retain a Remission of Your Sins,” Liahona, May 2016, 60). Maet bae yu save storian abaot olsem wanem ol odinens blong bifo we oli tokbaot long Hibrus 8–10 oli ol simbol blong sakrifaes blong Sevya we i pemaot praes blong sin. Eksampol, blad blong buluk mo nanigot i ripresentem wanem? (luk long Hibrus 9:13–14). ?Hae pris i ripresentem huia? (luk long Hibrus 9:24–26). Vidio ia “Sacrifice and Sacrament” (ChurchofJesusChrist.org) i save help. ?Olsem wanem ol odinens long taem blong yumi tedei oli blesem yumi mo i poenem yumi i go long Jisas Kraes? ?Wanem bae yumi mekem, blong mekem ol odinens ia oli gat moa mining mo stap lukluk nomo long Sevya?

Hibrus 10:34–38; 11

Fet i nidim blong i mas gat tras long ol promes blong God.

• Blong helpem ol memba blong klas blong andastanem tijing blong Pol abaot fet, yu save stat blong askem olgeta blong stap tingting, abaot olsem wanem bae oli eksplenem fet long wan sentens. Afta, ridim mo toktok raon olsem wan klas, mining we Pol i givim long Hibrus 11:1. Yu save givim wok long wanwan blong jusum wan long ol pipol we oli tokbaot insaed long Hibrus 11 blong stadi long olgeta. Ol memba blong klas oli save yusum ol futnot o Gaed long Ol Skripja (ChurchofJesusChrist.org) blong lukluk long eksperiens blong man ia long OlTesteman mo afta serem long klas wanem oli fanem. ?Olsem wanem ol pipol ia oli soem se oli filim wan “kamfot long ol samting blong hop from”? (Josef Smit Translesen, Hibrus 11:1 [long Hibrus 11:1, futnot b]). Ol memba blong klas oli save serem ol narafala eksampol blong ol fetful pipol. ?Wetaem nao yumi praktisim fet long ol promes we oli no bin hapen yet?

• Toktok we i go long ol man Hibrus we oli stap tingting blong go bak long olfala laef blong olgeta, i save stap olsem wan gudfala toktok tu blong ol memba blong klas we oli faenem i had blong gat wan testemoni. I save helpem olgeta tu we oli stap traem blong helpem olgeta we oli lavem blong olgeta we oli stap long nid blong fet. Blong faenemaot toktok ia, ol memba blong klas oli save ridim Hibrus 10:34–38 mo sot toktok blong Elda Jeffrey R. Holland we i stap long “Sam Moa Risos.” ?From wanem samtaem yumi gat temtesen ia blong sakemaot bilif blong yumi (luk long Hibrus 10:35) long Lod mo gospel blong Hem? Wanem yumi save mekem blong bildimap mo holem strong i stap blong “kasem promes blong [God]”? (Hibrus 10:36). Ol vidio ia “Good Things to Come” mo “An High Priest of Good Things to Come” (ChurchofJesusChrist.org) oli save givim moa help long toktok raon we i stap.

risos pikja bokis

Sam Moa Risos

“Nao from samting, yufala i mas stanap strong.”

Taem hem i stap tokbaot Hibrus 10:32–39, Elda Jeffrey R. Holland i talem:

“I tru se i had—bifo yu joen long Jos ia, taem yu stap traem blong joen long Jos ia, mo afta we yu bin joenem. Hemia i wei we i stap oltaem, Pol i taem se, yufala i mas stanap strong. Yu no fraet mo no go bak. Yu no lusum bilif o tras blong yu. Yu no fogetem filing we yu gat long wan taem ia. Yu aotem tras we yu bin gat long wan taem. …

“Blong mekem wan bigfala desisen, man i mas skelem gud evri tingting bifo i save mekem bigfala desisen ia. Taem we yu kasem moa laet, lukaot long temtesen ia blong i kamaot long wan gudfala samting. Sapos i bin raet taem yu bin prea abaot wan samting, mo yu bin trastem laet ia, mo yu bin laef from, nao hem i raet tu naoia. Yu no givap taem we evri samting oli kam strong moa. Fesem ol tu tingting blong yu. Kontrolem ol fraet blong yu. ‘From samting ia, yufala i mas stanap strong.’ Stap long rod ia mo luk ol naes samting blong laef oli stap open blong yu” (“Cast Not Away Therefore Your Confidence,” Ensign, Mar. 2000, 8–9).

Stap Kam Antap long Fasin blong Yumi blong Stap Tij

Go long ol skripja faswan. Ol skripja oli fas samting blong yu stadi mo rere from. Ol toktok blong ol profet blong tedei oli save sapotem ol skripja (luk long Teaching in the Savior’s Way, 17).