23–29 Oktoba

Fas mo Seken Timoti; Taetas; Filemon

“Yu Mas Soemaot Gudfala Eksampol blong ol Kristin Man”

Rid long 1 mo o Timoti; Taetas; mo Filemon mo stap tingting long ol memba blong klas. Ol tingting mo ol filing we bae i kam bae i helpem yu blong lidim ol memba blong klas i go long stret ves blong ol skripja, mo bae i karem Spirit i kam long klasrum.

Invaetem Ol Memba blong Serem Wanem Oli Gat

Bae i help plante blong harem ol memba blong klas oli tokbaot ol sakses mo ol jalenj blong olgeta taem oli stadi long ol skripja, olsem famli mo wanwan. Tingting blong statem klas taem yu invaetem ol memba blong klas blong tokbaot wanem i stap go gud long stadi blong olgeta blong skripja.

Stap Tijim Doktrin

1 mo 2 Timoti; Taetas

Taem yumi andastanem tru doktrin, bae i helpem yumi blong stap longwe long ol giaman blong devel.

• Ol memba blong klas blong yu oli stap laef long wan taem we i had, blong luksave wanem i tru mo wanem i no tru. Timoti mo Taetas tu oli laef long wan taem we i semmak, ating ol kaonsel blong Pol long olgeta, i save gat mining long taem tedei. Hemia sam long ol skripja we oli holem kaonsel blong Pol: 1 Timoti 1:1–7; 4:1–2, 6; 6:3–5, 20–21; 2 Timoti 3:13–17; 4:2–4; Taetas 1:7–9; 2:1, 7–8. Yu save givim wok long wanwan memba blong klas blong ridim wan long ol skripja ia mo serem wanem hem i lanem abaot impoten blong tru doktrin (luk tu long Alma 31:5). ?Olsem wanem nao doktrin blong Sevya i helpem yumi kamaot long ol giaman tingting? Ol memba blong klas oli save serem ol eksperiens, we paoa blong tru doktrin i blesem olgeta long hem.

“Yu yu wan yang man nomo, be i nogud yu letem ol man oli luklukdaon long yu from samting ya. Oltaem yu mas soemaot gudfala eksampol long ol Kristin man” (Fas Timoti 4:12

1 Timoti 4:10–16

“Yu mas soemaot gudfala eksampol blong ol kristin man”

• Hem i posibol blong ol memba blong klas blong yu oli no luk save paoa blong gudfala eksampol we oli stap soem. Tingting blong invaetem olgeta blong tokbaot olsem wanem ol pipol we oli save long olgeta, mo ol memba blong klas, oli stap olsem ol eksampol blong ol disaepol blong Kraes. Maet bae i help blong save toktok raon long hem sapos yu raetem wan lis long bod blong ol toktok insaed long ves 12 we i tokbaot olsem wanem yumi save stap olsem wan eksampol—long toktok, long storian (we i minim tu long ol fasin), jariti, spirit, fet, mo klin gud. Ol memba blong klas oli save tokbaot olsem wanem yumi save stap olsem ol eksampol blong blong ol kristin man long evri wei ia.

2 Timoti 1

“Spirit we God i givim long yumi, i no blong mekem yumi fraet… i blong mekem yumi gat paoa, blong mekem yumi lavem man, mo i blong mekem yumi naf blong blokem [ol nogud tingting].”

• Aotlaen blong wik ia long Kam Folem Mi—blong Wanwan Man, Woman mo Famli i givim tingting blong lukluk long 2 Timoti blong faenem kaonsel we Pol i givim blong leftemap tingting blong Timoti long seves blong hem. Askem ol memba blong klas blong serem eni niu tingting we oli faenem. O yu save givim smol taem long olgeta long klas, blong faenem mo serem sam long ol toktok blong Pol (japta 1 i gat sam gudfala eksampol). Oli save serem tu wan eksperiens we oli gat taem God i helpem olgeta blong winim fraet mo givim long olgeta “spirit blong … paoa, mo blong lav, mo blong wan maen we i klin gud” (2 Timoti 1:7).

2 Timoti 3

Taem yumi stap stadi skripja i save helpem yumi winim ol hadtaem blong ol las dei.

• Afta we hem i wonem Timoti abaot “ol hadtaem” we bae i kam, Pol i testifae abaot paoa mo impoten blong ol skripja (luk long 2 Timoti 3:1, 14–17). Blong statem wan toktok raon abaot olsem wanem ol skripja oli save givim paoa long yumi, blong winim ol hadtaem, yu save invaetem ol memba blong klas oli lukluk bak long wanem Pol i bin tokbaot abaot ol hadtaem blong ol las dei ia we oli save luk long 2 Timoti 3:1–7. Afta oli save lukaotem mo serem ol skripja we i bin helpem mo gaedem olgeta long ol hadtaem olsem (sam long ol eksampol oli stap long“Sam Moa Risos”). ?Olsem wanem taem yumi stap stadi blong ol skripja, oli protektem yumi long ol trabol blong wol tedei?

• Blong stap stadi long kaonsel blong Pol abaot paoa blong ol skripja, i save wan janis blong ol memba blong klas, blong leftemap tingting blong wanwan long olgeta blong wokhad moa blong stadi toktok blong God. Maet ol memba blong klas oli save rid long 2 Timoti 3:14–17 mo talemaot ol blesing mo proteksen we i kam tru long stadi blong skripja. Afta oli save serem eksperiens blong olgeta taem oli kasem ol blesing ia from se oli stadi long skripja. Yu save givim tu long ol memba blong klas sam taem blong tingting hevi long wanem oli save mekem, blong gat moa eksperiens we i gat mining wetem stadi blong olgeta long ol skripja, wetem famli mo olgetawan.

Sam Moa Risos

Ol trutok blong skripja we oli protektem yumi agensem ol hadtaem blong ol las dei (luk long 2 Timoti 3:2).

Ol Rabis Taem blong Ol Las Dei	Ol Trutok We Oli Protektem Yumi
Ol Rabis Taem blong Ol Las Dei Olgeta we oli lavlavem olgetawan nomo	Ol Trutok We Oli Protektem Yumi Jon 15:12–13
Ol Rabis Taem blong Ol Las Dei Fasin blong stap kavet	Ol Trutok We Oli Protektem Yumi Doktrin mo Ol Kavenan 88:123
Ol Rabis Taem blong Ol Las Dei Olgeta we oli stap tok flas	Ol Trutok We Oli Protektem Yumi Mosaea 2:24–25
Ol Rabis Taem blong Ol Las Dei Fasin blong gat hae tingting	Ol Trutok We Oli Protektem Yumi Alma 5:27–28
Ol Rabis Taem blong Ol Las Dei Olgeta we oli stap tok nogud	Ol Trutok We Oli Protektem Yumi Doktrin mo Ol Kavenan 63:64
Ol Rabis Taem blong Ol Las Dei No obei long ol papa mo mama	Ol Trutok We Oli Protektem Yumi Efesas 6:1-3
Ol Rabis Taem blong Ol Las Dei Fasin blong no stap talem tangkyu	Ol Trutok We Oli Protektem Yumi Doktrin mo Ol Kavenan 78:19
Ol Rabis Taem blong Ol Las Dei Fasin we i no tabu	Ol Trutok We Oli Protektem Yumi Dutronome 7:6.

Stap Kam Antap long Fasin blong Yumi blong Stap Tij

Fasin blong gro long saed blong spirit, i stap hapen insaed long hom. Yu stap wetem ol memba blong klas blong yu blong wan sot taem nomo, tu taem long wan manis. Plante long olgeta oli stap gat ol eksperiens long saed blong spirit wei gat plante mining, aotsaed long klas, mo ol eksperiens ia oli save mekem ol narafala memba blong klas oli save kam strong. Askem ol kwestin we i save leftemap tingting blong ol memba blong klas, blong serem wanem oli stap lanem taem oli stadi gospel long hom. (Luk long Teaching in the Savior’s Way, 18.)