9–15 Oktoba

Filipae; Kolosi

“Mi Save Mekem Evri Samting long Paoa blong Kraes Ya we I Stap Mekem Mi Mi Strong”

Blong stat, rid long Filipae mo Kolosi, mo tingting hevi wetem prea, abaot doktrin we Lod i wantem yu blong tijim. Letem Spirit i lidim yu blong tingting long ol kwestin mo risos we yu save yusum blong tijim doktrin ia.

Invaetem Ol Memba blong Serem Wanem Oli Gat

Invaetem ol memba blong klas blong talem wan toktok o sentens we i givim wan sot toktok blong wanem oli lanem long Filipae mo Kolosi mo afta eksplenem from wanem oli jusum toktok ia o sentens ia. Leftemap tingting blong olgeta blong serem ol ves blong skripja olsem pat eksplenem hemia.

Stap Tijim Doktrin

Filipae 2:1–5, 14–18; 4:1–9; Kolosi 3:1–17

Yumi kam “niu” taem yumi laef folem gospel blong Jisas Kraes.

• Maet yu wantem blong helpem ol memba blong klas blong yu oli luk wanem i minim blong “sakemaot olfala laef” mo “putum niufala laef” tru long Jisas Kraes (Kolosi 3:9–10). Blong mekem hemia, maet bae yu soem wan pikja blong bifo mo afta blong wan olfala samting we oli bin mekem i kam niu (olsem wan pis blong fenija, wan haos, o wan baeskel). Ol memba blong klas oli save toktok raon long olsem wanem yumi kam “niu” tru long fet blong yumi long Jisas Kraes mo hamas yumi wantem blong laef folem gospel blong Hem. Olsem pat blong toktok raon ia, yu save askem haf pat blong klas blong stadi long Filipae 2:1–5, 14–18; 4:1–9 mo nara haf blong stadi long Kolosi 3:1–17, mo save talemaot ol fasin blong “olfala laef” mo “niufala laef.” Yu save invaetem tu sam memba blong klas blong save serem olsem wanem oli gat fet long Jisas Kraes, mo laef folem gospel blong Hem, i helpem olgeta blong gat wan niufala laef.

Filipae 4:1–13

Yumi save faenem glad long Kraes, nomata wanem situesen yumi stap long hem.

• Nomata ol situesen blong yumi i defren long hemia blong Pol, yumi evriwan i save lanem samting long hamas i wantem tumas blong stap glad long evri situesen long laef blong hem. Blong statem wan storian long topik ia, yufala i save luklukbak long ol hadtaem we Pol i bin eksperiensem (olsem eksampol, luk long 2 Korin 11:23–28). Yu save askem ol memba blong klas blong lukluk bak long Filipae 4:1–13 blong faenem ol toktok blong Pol we i save helpem yumi stap glad, nomata long ol hadtaem.

• Maet ol memba blong klas oli save serem ol eksperiens taem oli filim pis we God i givim, i bigwan moa bitim save blong man (Filipae 4:7) o taem oli filim se oli gat paoa “tru long Kraes” (ves 13) blong save mekem wanem we oli no save mekem long paoa blong olgeta nomo.

• Sapos yu wantem blong tokbaot moa long topik ia, yu save askem ol memba blong klas blong serem sam toktok we i stap long toktok ia “Joy and Spiritual Survival” we i kam long Presiden Russell M. Nelson (Liahona, Nov. 2016, 81–84). O klas i save wajem vidio ia “Trial of Adversity” (ChurchofJesusChrist.org). ?Olsem wanem nao ol pipol long toktok blong Presiden Nelson o woman ia long vidio, oli faenem glad long ol hadtaem blong olgeta?

• From se fasin blong devel i stap gro bigwan long wol tedei, ol memba blong klas blong yu oli save gat blesing long toktok blong Pol blong “putum tingting i stap strong long ol fasin olsem” ol fasin ia tru, mo oli hae, mo oli stret, mo oli klin gud, mo oli save mekem yumi harem gud, mo ol man oli stap ona long olgeta we oli stap mekem ol fasin ia (Filipae 4:8). Maet bae yu givim wan wok long wanwan memba blong klas (o ol smol grup blong ol memba blong klas), wan long ol kwaliti we i stap long Filipae 4:8 o Ol Toktok blong Bilif 1:13. Wanwan long olgeta i save yusum Topical Guide blong faenem ol skripja abaot kwaliti we oli givim long olgeta mo serem wanem oli faenem long klas. Oli save serem eksampol blong kwaliti ia tu, we oli luk long laef blong ol pipol. ?Olsem wanem nao yumi “lukaotem ol samting ia.”?

Kolosi 1:12–23; 2:2–8

Taem yumi “holem strong” long Jisas Kraes, yumi save stanap strong agensem ol paoa blong wol.

• Testemoni blong Pol abaot Sevya we i stap long Kolosi 1:12–23; 2:2–8 i givim wan gudfala janis long ol memba blong klas blong tingting hevi mo mekem fet blong olgetawan i kam strong moa. Ol memba blong klas oli save lukaotem long ol ves we i stap ia blong faenemaot ol samting we i save mekem fet blong olgeta long Jisas Kraes i kam strong moa. ?Wanem i minim blong “holem strong long [Jisas Kraes], mo stanap strong long Hem”? (Kolosi 2:7). Pikja blong wan tri long Aotlaen blong wik ia long Kam Folem Mi—Blong Wanwan Man, Woman mo Famli mo vidio ia “Spiritual Whirlwinds” (ChurchofJesusChrist.org) i save helpem ol memba blong klas blong toktok raon long ves ia. ?Wanem i save mekem rus blong wan tri i kam strong o i kam slak? ?Olsem wanem nao taem yumi “holem mo stanap strong long [Jisas Kraes]” bae i givim paoa long yumi blong stanap agensem paoa blong wol? (luk long Kolosi 2:7–8; luk tu long Hileman 5:12; Ita 12:4).

• Maet yu save invaetem ol memba blong klas blong mekem wan lis blong ol samting we Kolosi 1:12–23; 2:2–8 i tijim yumi blong save mekem blong kamaot long giaman toktok blong man we i save spolem fet blong yumi long Kraes (Kolosi 2:8). Olsem wanem yumi save sapotem wanwan long yumi long hadwok blong yumi blong folem Sevya mo no folem giaman blong Setan?

Stap Kam Antap long Fasin blong Yumi blong Stap Tij

Yusum miusik. Tabu miusik i stap invaetem paoa blong Tabu Spirit. I save krietem wan ples we i gat respek long hem mo givim komitmen mo aksen. Tingbaot olsem wanem “taem yumi stap tijim mo wonem wanwan long yumi tru long ol singsing mo hym” i save stap olsem pat blong klas (Kolosi 3:16; luk tu long Teaching in the Savior’s Way, 22).