Sevya we i laef bakegen long ded i bin visitim Pol insaed long kalabus (luk long Ol Wok 23:11). Jisas Kraes i save mekem yumi go fri aot long “yok blong slef” (Galesia 5:1).

25 Septemba–1 Oktoba

Galesia

Wokbaot Folem Spirit

Taem yu prea, yu rid, mo ting hevi long Galesia, Lod bae i tijim yu wanem yu nidim blong serem wetem klas blong blong yu. Taem yu stap raetem daon ol tingting mo filing we yu kasem, i soemaot fasin blong stap talem tank yu long God from help blong Hem.

Invaetem Ol Memba blong Serem Wanem Oli Gat

Skripja stadi oltaem i lid i go long ol toktok storian blong gospel we i gat mining wetem famli mo ol fren. ?Hemia i hapen long ol memba blong klas blong yu long wik ia? Invaetem olgeta blong serem ol eksperiens blong olgeta.

Stap Tijim Doktrin

Galesia 1:6–7; 3:1–5; 4:8–21; 5:1, 13–14

Gospel blong Jisas Kraes i givim fridom.

• Blong stap stadi long eni buk blong skripja hem i isi, taem yumi kam blong save from wanem oli bin raetem. From risen ia, maet i gud blong statem storian blong yu abaot Galesia wetem wan kwestin olsem ”?Wanem tingting blong yu, long stamba tingting blong Pol blong raetem leta ia?” o “?Wanem problem nao Pol i stap traem blong stretem?” Invaetem ol memba blong klas blong lukaotem sam posibol tingting we i stap long Galesia 1:6–7; 3:1–5; 4:8–21. ?Olsem wanem nao mesej blong Pol i blong yumi tu tedei?

• ?Sam Sent long Galesia oli ting se i nid blong gohed blong laef folem loa blong Moses. Long Pol, hemia i olsem blong stap laef wetem wan “yok blong slef” komperem wetem “fridom” we Jisas Kraes i givim long yumi (Galesia 5:1). Blong helpem ol memba blong klas blong yu blong faenem moa long ol tijing blong Pol, abaot fridom mo slef, yu save askem olgeta blong talem wanem fasin mo wanem wok nao i limitim yumi long progres mo gro blong yumi long saed blong spirit (i olsem ol praktis blong ol kalja, ol nogud habit, ol giaman bilif, o stap fokas long ol aksen blong man be i no blong konvet we stap tekem ples blong had blong man). ?Folem wanem i stap long Galesia 5:1, 13–14, olsem wanem yumi faenem fridom long ol fasin mo aksen ia? ?Olsem wanem yumi eksperiensem fridom we yumi fanem tru long Jisas Kraes? ?Olsem wanem yumi save ansarem wan we i filim se blong laef folem gospel i limitim fridom blong hem?

Galesia 5:16–26

Sapos yumi “folem Spirit,” bae yumi kasem “frut blong Spirit.”

• Plante pipol oli stap traehad blong luksave wok blong Spirit. Galesia 5 i save help. Maet bae yu askem ol memba blong klas blong lukaotem long Galesia 5:22–25 blong fanem ol toktok we Pol i yusum blong tokbaot frut blong Spirit. ?Olsem wanem nao yumi save luksave fasin blong Spirit insaed long laef blong yumi? Maet ol memba blong klas oli save serem olsem wanem oli luk fasin blong blong Spirit i wok long laef blong olgeta o long laef blong wan narafala man we oli save long hem. Sam nara risos blong stadi abaot hem i Matiu:16–18; Jon 14:26–27; Moronae:13–17; Doktrin mo Ol Kavenan 11:12–13; mo toktok blong Presiden Gordon B. Hinckley long “Sam Moa Risos

Yumi save faenem ol “frut blong Spirit” taem yumi lukaotem.

Galesia 6:7–10

Taem yumi planem sid blong fasin we “Spirit i wantem,” ol blesing blong hem bae oli rere long taem blong hem blong save karem.

• Taem yufala i stadi long Galesia 6:7–10 i save helpem ol memba blong klas blong oli tingting moa abaot ol risal blong ol joes blong olgeta blong wan longfala taem. Blong helpem olgeta, yu save karem i kam long klas ol sid blong plante kaen, wetem plan blong olgeta, ol frut, o ol vejetebol we oli gro aot long wanwan long ol sid ia (o yu save karem ol pikja blong ol samting ia i kam long klas). Memba blong klas oli save wok tugeta blong majem wanwan sid ia wetem ol samting we oli prodiusum. Mo afta oli save rid long ves 7–10 mo tokbaot wanem i minim blong planem sid “blong fasin blong bodi” mo “fasin blong Spirit.” (Mesej blong Elda Ulisses Soares long “Sam Moa Risos” i maet help.) ?Wanem nao yumi karemaot we i rere blong kaekae, taem yumi planem sid blong fasin blong bodi? Yumi karemaot wanem taem yumi planem sid blong fasin blong Spirit? (Luk long Galesia 5:22–23).

• Sam memba blong klas maet oli filim se “oli kam slak blong mekem ol gudfala fasin” (Galesia 6:9)—maet from se oli no sua se ol hadwok blong olgeta i stap karem frut o no. Wan storian abaot Galesia 6:7–10 i save help. Blong introdiusum ol ves ia, yu save invaetem wan long klas blong save tokbaot smol nomo, abaot wan taem we hem i nidim blong gat longfala tingting blong traem tekem kea long wan samting blong i gro. Eksperiens blong man ia wetem wanem yumi lanem long Galesia 6:7–10, i tijim wanem abaot traehad blong yumi blong “wokbaot folem Spirit”? (Galesia 5:25).

Sam Moa Risos

Frut blong Spirit

Presiden Gordon B. Hinckley i bin tijim: “Yu save harem save smol voes blong Spirit tru long ol frut blong Spirit—we i givim save, we i bildimap yu, hemia we i givim ol gud tingting mo i raet mo i leftemap mo i lidim yumi i go long ol tingting we i moa gud mo ol toktok we i moa gud mo ol wok we i moa gud oli kam long Spirit blong God” (Teachings of Presidents of the Church: Gordon B. Hinckley [2016], 121).

Planem sid blong fasin blong Spirit.

Elda Ulisses Soares i eksplenem: “Blong planem sid blong fasin blong Spirit i minim se evri tingting blong yumi, ol toktok, mo ol aksen i mas leftemap yumi long level blong papa mo mama blong yumi we i tabu. Nomata long hemia, ol skripja oli tokabaot mit mo bun i folem fasin blong man blong wol, we i lidim pipol blong gat strong filing, ol tingting blong hat, fasin blong wantem tumas samting, mo wanem mit mo bun i wantem be oli no stap lukaotem insperesen we i kam long Tabu Spirit” (“Abide in the Lord’s Territory!,” Liahona, May 2012, 39).

Stap Kam Antap long Fasin blong Yumi blong Stap Tij

Helpem olgeta we oli stap lanem samting blong leftemap wanwan long olgeta bakegen. “Wanwan man o woman insaed long klas blong yu, i wan rij ples blong testemoni, niu tingting, mo eksperiens blong fasin blong laef folem gospel. Invaetem olgeta blong serem wetem mo leftemap tingting blong wanwan long olgeta” (Teaching in the Savior’s Way, 5).