2–8 Oktoba

Efesas

“Blong Ol Sent Oli Kam Stret Gud Moa”

Ol tingting mo filing abaot olsem wanem mo wanem blong tijim bae i kam taem yu stadi wetem prea long Efesas, ol toktok blong jeneral konfrens we i jes pas, aotlaen ia, mo Kam Folem Mi—Blong Wanwan Man, Woman mo Famli.

Invaetem Ol Memba blong Serem Wanem Oli Gat

Tingting blong invaetem ol memba blong klas blong raetem long bod, wan sot sentens blong wanem oli lanem long stadi blong olgeta long wik ia. Jusum sam long ol sot sentens ia, mo askem ol memba blong klas we oli raetem blong oli serem ol tingting blong olgeta.

Stap Tijim Doktrin

Efesas 2:19–22; 4:4–8, 11–16

Ol profet mo ol aposol—mo evriwan long yumi—mekem Jos i kam moa strong mo kam wan.

• ?Yu mo ol memba blong klas blong yu, yufala i save bildim wan samting tugeta blong soemaot olsem wanem Jos oli “bildim antap long fandesen blong ol aposol mo ol profet” mo olsem wanem Sevya i “jif kona ston”? (Efesas 2:20). Maet ol memba blong klas oli save raet long sam smol blok o pepa kap mo putum tugeta blong mekem wan tolfala bilding o wan piramid, wetem Jisas Kraes mo ol aposol mo profet oli mekem stamba o fandesen. Afta yu save soem wanem bae i hapen sapos Kraes o ol aposol mo profet, oli karemaot olgeta. ?From wanem jif kona ston i wan gudfala simbol blong Jisas Kraes mo wok blong Hem insaed long Jos? (Blong tokbaot wan jif kona ston, luk long “Sam Moa Risos.”) Ol memba blong klas oli save lukaotem long Efesas 2:19–22; 4:11–16 ol blesing we yumi kasem tru long ol aposol, ol profet, mo ol nara lida blong Jos. ?Wanem yumi save mekem blong bildim laef blong yumi folem ol tijing blong olgeta?

Jisas Kraes i kona ston blong Jos.

• Sapos ol memba blong klas blong yu oli lisin long jeneral konfrens we i jes pas, yufala i bin mit las taem, invaetem olgeta blong serem olsem wanem nao ol samting we oli bin tijim long taem blong konfrens, i bin help blong mekem i hapen, stamba tingting we i stap long Efesas 4:11–16.

• Maet bae yu givim long ol memba blong klas wan smol taem blong raetem sam long ol “holidei” o ol responsabiliti we yumi gat olsem ol memba blong Jos blong Kraes (luk long Efesas 4:1)—eksampol, wan givhan brata o sista, wan gudfala paren, wan disaepol blong Kraes, mo sam moa. Afta oli save jenisim lis ia wetem ol narafala memba long klas, blong ridim Efesas 4:4–8, 11–16, mo serem olsem wanem taem oli mekem i hapen ol responsabiliti we i stap long lis blong olgeta, oli luksave mo andastanem bodi blong Kraes. ?Olsem wanem yumi save wok tugeta blong kam wan wetem “wan Lod, wan fet, wan fasin blong baptaes”?

Efesas 5:25–6:4

Folem eksampol blong Sevya, i save mekem rilesensip blong famli blong yumi i kam moa strong.

• Blong helpem ol memba blong klas blong praktisim ol tijing blong Pol abaot famli rilesensip, maet yu wantem raetem ol kwestin olsem olgeta ia long bod: ?Olsem wanem yumi save folem eksampol blong Sevya blong yumi long wei we yumi tritim ol memba blong famli blong yumi? (luk long Efesas 5:25). ?I minim wanem long yu blong givim ona long “papa mo mama blong yu”? (Efesas 6:1–3). ?Olsem wanem nao yumi mas tijim ol pikinini blong yumi “olsem we Masta blong yumi i stretem yumi, i stap tijim yumi”? (Efesas 6:4). Ol memba blong klas oli save toktok raon long ol kwestin ia, long ol grup o olsem wan klas, taem oli ridim ol skripja we i go wetem ol kwestin ia. Yu save invaetem ol memba blong klas blong serem ol eksampol we oli luk ol pipol we oli laef folem fasin we Pol i tokbaot.

Efesas 6:10–18

Klos blong faet blong God bae i help blong protektem yumi agensem ivel.

• ?Wanem bae i help blong givim insperesen long ol memba blong klas blong traehad blong putum ful klos blong faet blong God evri dei? Yu save rere long wan aktiviti we ol memba blong klas oli save majem ol pis blong klos blong faet wetem ol prinsipol o klin fasin we oli ripresentem, olsem we oli tokbaot long Efesas 6:14–17. ?Olsem wanem wanwan pis blong klos blong faet ia i save protektem yumi from ol rabis fasin? (Blong kasem sam help, luk long “Sam Moa Risos.”) ?Olsem wanem nao yumi werem klos blong faet ia? ?Wanem yumi save mekem blong luk save mo mekem i kam strong moa klos blong faet blong yumi sapos i gat sam ples we i no strong tumas?

Sam Moa Risos

?Wanem i jif kona ston?

Jif kona ston i fas ston we oli putum long wan fandesen. I stap olsem stamba ples blong makem mo putum ol narafala ston, we oli mas laen stret wetem jif kona ston. From se jif kona ston i holem evri weit blong evri pat blong bilding, hem i mas strong gud, hem i no muvmuv, mo ful bilding i hang long hem (luk long “The Cornerstone,” Ensign, Jan. 2016, 74–75).

Klos blong faet blong God.

Strapem yu wetem trutok:Pis blong klos ia i olsem wan strap we oli taetem raonem bel. Toktok ia strap i save minim se, blong mekem i kam strong moa.

Jesplet blong stret mo gud fasinWan jesplet i protektem hat mo ol narafala impoten pat insaed blong bodi.

Sus long leg i rere long gospel blong pisHemia i stap tokbaot samting blong kavremap mo protektem leg blong soldia.

Sil blong fet:Wan sil i save protektem kolosap eni pat nomo blong bodi long eni kaen atak we i kam.

Hat blong fasin blong sevem manWan hat i protektem hed.

Naef blong Spirit:Wan naef i letem yumi blong tekem aksen agensem enemi.

Stap Kam Antap long Fasin blong Yumi blong Stap Tij

Traehad blong gat lav olsem Kraes. Wanem yu stap mekem o tritmen blong yu long olgeta we yu stap tijim, yu mas mekem wetem lav. Yu mo ol studen blong yu bae i kasem blesing taem yufala i prea blong developem lav we i olsem blong Kraes, mo lukaotem ol wei blong soemaot lav ia (luk long Teaching in the Savior’s Way, 6; Moronae 7:48).