Lav We I Stret Gud, i kam long Del Parson

27 Novemba–3 Disemba.

1–3 Jon; Jud

“God I Stamba blong Fasin Ya blong Lavem Man”

?Wanem ol topik mo prinsipol we i kamaot klia long yu taem yu stap rid long 1–3 Jon mo Jud? ?Olsem wanem nao bae yu yusum olgeta blong helpem ol memba blong klas blong yu?

Invaetem Ol Memba blong Serem Wanem Oli Gat

Invaetem sam memba blong klas blong serem ol topik o spesel trutok we i kamaot klia long olgeta taem oli stap stadi long Leta blong Jon mo Jud. ?Wanem ol mesej long ol leta ia we stret gud long olgeta mo ol famli?

Stap Tijim Doktrin

1 Jon 1:5–10; 2:3–11; 3:1–3; 4:7–21; 5:1–3

Papa long heven mo Jisas Kraes oli stret eksampol blong laet mo lav we i stret evriwan.

• ?Olsem wanem bae yu save helpem olgeta we yu stap tijim olgeta, blong oli luksave laet mo lav blong God long laef blong olgeta? Maet yu save stat blong raetem ol toktok ia laet mo lav long bod. Askem ol memba blong klas blong serem ol nara toktok we i kam long maen, taem oli tingting long tufala toktok ia. Wanwan memba blong klas oli save stadi long wan long ol skripja ia, mo faenem wan samting we ol ves ia oli tijim abaot laet o lav: 1 Jon 1:5–10; 2:3–11; 3:1–3; 4:7–12; 4:16–21; 5:1–3. Askem long sam long olgeta blong serem wetem klas, wanem oli faenem. Yu save invaetem ol memba blong klas blong serem ol eksperiens, taem oli bin filim laet mo lav blong God.

• Yu save invaetem ol memba blong klas blong luk long laet long siling o laet i kam tru long windo mo serem wanem oli save abaot laet blong wol ia. ?Olsem wanem nao laet blong wol ia i olsem laet long saed blong spirit? Ol memba blong klas oli save stadi long ol skripja we i stap ia, blong faenemaot moa tingting we oli tokbaot olsem wanem God mo Pikinini blong Hem oli stap givim laet long laef blong yumi: Ol Sam 27:1; Jon 1:4–5; 1 Jon 1:5–7; 3 Nifae 11:11; Doktrin mo Ol Kavenan 88:6–13; mo wan hym abaot laet olsem “The Lord Is My Light” (Hymns, no. 89). Ol memba blong klas oli save serem tu ol eksperiens we oli kasem, taem oli stap lukaotem blong kasem laet long saed blong spirit, insaed long laef blong olgeta.

1 Jon 2:18–28; 4:3; 2 Jon 1:7–11; 3 Jon 1:9–11; Jud

Yumi mas “[laef folem] doktrin blong Kraes.”

• Ol tijing blong Jon mo Jud abaot apostasi, i save helpem ol memba blong klas oli tingting blong olsem wanem oli save holemtaet fet blong olgeta long Jisas Kraes i strong Tingting blong invaetem haf blong klas blong lukaotem mining blong ol giaman tijing o apostasi long 1 Jon 2:18–23, 26–28; 4:3; 2 Jon 1:7–11; 3 Jon 1:9–11 mo nara haf blong lukaotem semmak samting long Jud. O oli save lukaotem blong faenem ol ansa blong ol kwestin olsem olgeta ia: ?Olsem wanem Jon mo Jud oli eksplenem wan Antae-Kraes? (luk tu long Gaed long Ol Skripja, “Antae-Kraes,” scriptures.ChurchofJesusChrist.org). ?I gat sam samting we i stap long ol ves ia we yumi save yusum long ol jalenj we yumi stap fesem tedei? ?Wanem i minim blong “[laef folem] doktrin blong Kraes”? (2 Jon 1:9).

• Jud i yusum ol pikja we i eksplenem gud moa ol giaman tija, o olgeta we oli “stap tok nogud long ol samting we oli no save mining blong hem” (Jud 1:10). Yu save invaetem sam memba blong blong klas blong dro long bod, sam long ol pikja we oli eksplenem long Jud 1:12–13 taem ol nara memba blong klas oli traem blong talemaot wanem sentens nao man ia i stap droem. ?Olsem wanem ol pikja oli ripresentem ol giaman tija mo ol Antae-Kraes? Eksampol, ?olsem wanem ol rabis praktis i olsem ol smol blak mak long gudfala fasin we i klin gud? ?Wanem bae yumi save mekem blong stanap strong agensem “ol man blong jikim man”? (luk long Jud 1:18–21). ?From wanem Jud i talem blong yumi “gat sore” (Jud 1:22) long olgeta we oli stap jikim gospel?

“Taem mi harem we oltaem ol pikinini blong mi oli stap folem ol tok we i tru, hemia i mekem mi mi harem gud moa, i winim we mi harem gud long ol narafala samting.” (3 Jon 1:4).

3 Jon 1:1–4

Glad i kam taem yumi helpem ol narawan oli “wokbaot long trutok.”

• Maet i gat olgeta ia long klas blong yu we oli save andastanem wanem Jon i filim taem hem i talem se, hem i gat “bigfala glad” blong harem se Gaius (wan long ol “pikinini” blong hem) i wokbaot long trutok. Ol memba blong klas oli save gat blesing blong harem wanwan long olgeta i serem eksperiens blong olgeta. Yu save statem, blong ridim tugeta long 3 Jon 1:1–4 mo ol skripja long “Sam Moa Risos.” ?Wanem nao ol skripja ia oli tijim yumi abaot stamba blong tru glad? Ol memba blong klas oli save toktok raon long olsem wanem oli bin filim olsem ol paren, ol misinari, ol lida blong Jos, o ol tija taem oli save se ol pipol we oli stap tijim oli stap wokbaot long trutok. Yu save askem long sam long ol memba blong klas, blong oli save karem i kam long klas pikja blong olgeta we oli bin helpem olgeta blong kam long Kraes mo talem abaot ol eksperiens blong olgeta .

Sam Moa Risos

Ol skripja abaot, stap helpem ol narawan oli wokbaot long trutok.

• Dutronome 6:6–7

• Ol Proveb 22:6

• Jon 4:36

• 1 Tesalonaeka 3:9

• Mosaea 4:14–15

• Alma 17:1–2; 26:11–37

• Doktrin mo Ol Kavenan 18:10–16; 50:22

Stap Kam Antap long Fasin blong Yumi blong Stap Tij

Prea from ol memba blong klas blong yu. Semmak olsem Sevya i bin prea from Pita (luk long Luk 22:32), yu mas prea yusum nem blong olgeta we yu stap tijim olgeta, lukaotem blong andastanem ol stret nid blong olgeta. Taem yu mekem olsem, Papa long Heven bae i “rere long hat blong olgeta” (Alma 16:16) mo helpem yu blong save wanem blong tijim blong save mitim nid blong olgeta (luk long Teaching in the Savior’s Way, 6).