4–10 Disemba

Revelesen 1–5

“Smol Sipsip Ya, Yumi Mas Presem, Yumi Mas Ona, Mo Yumi Mas Talemaot Paoa blong Hem Gogo I No Save Finis”

Blong stap kasem mo ol filing tingting long saed blong spirit, i helpem yu blong luksave se Tabu Spirit i wantem blong tijim yu. Taem yu raetemdaon ol filing ia mo ol toktok ia blong Spirit, i stap soemaot se yu tekem ol samting ia oli impoten mo yu wantem blong kasem moa long olgeta samting ia.

Invaetem Ol Memba blong Serem Wanem Oli Gat

Taem yu statem wan toktok raon, bae i gud blong invaetem ol memba blong klas, blong save serem sam long ol mesej we oli faenem insaed long buk blong Revelesen long taem blong stadi blong olgetawan o wetem famli. Eksampol, ?wanem oli lanem abaot plan blong Papa long Heven blong sevem ol pikinini blong Hem? ?Wanem nao oli bin lanem abaot Sevya mo wok blong Hem long plan ia? Leftemap tingting blong ol memba blong klas, blong gohed blong lukaotem ol impoten mesej abaot Jisas Kraes mo plan ia blong fasin blong sevem man, taem oli stap gohed blong ridim Revelesen long hom. Givim long olgeta wan janis long taem blong ol lesen we i stap kam yet, blong oli serem wanem oli faenem.

Stap Tijim Doktrin

Revelesen 1

Jisas Kraes I Pikinini blong God We I Stap Laef.

• Ol pikja mo simbol insaed long Revelesen 1 i stap testifae se Jisas Kraes i laef mo we Hem i stap lidim Jos blong Hem. Maet ol memba blong klas oli save raetem long bod sam sentens we i stap long Revelesen 1 we i gat insaed ol pikja mo simbol, mo serem wanem wanwan long ol sentens ia oli tijim olgeta abaot Jisas Kraes. Eksampol, ?wanem nao yumi lanem aot long ol simbol ia abaot olsem wanem Kraes i lidim Jos blong Hem tedei? ?Olsem wanem Jon i eksplenem Sevya long ples ia, we i defren long hemia we i stap long Doktrin mo Ol Kavenan 110:1–4?

Revelesen 2–3

Jisas Kraes i save yumi wanwan mo bae i helpem yumi winim ol jalenj blong yumi.

• Blong stap ridim mesej blong Lod, we i go long ol defdefren branj blong Jos we i stap long Revelesen 2–3 i save helpem ol memba blong klas blong save se Sevya i tingbaot olgeta. Maet yu save invaetem olgeta blong lukluk tru long ol japta ia, blong faenem se i tru Jisas Kraes i save wanwan hadtaem blong branj mo paoa blong wanwan branj we i stap. Oli save serem ol eksperiens tu we oli filim se, Sevya i save ol defdefren situesen blong olgeta wanwan. ?Wanem toktok we Lod i givim long ol Sent long taem ia, we i save helpem yumi blong winim ol hadtaem blong yumi?

• Long ol semfala Japta ia Lod i mekem ol promes long olgeta we oli winim ol hadtaem. Yu save invaetem ol memba blong klas blong oli wok tu tu blong lukaotem long Revelesen 2–3 blong faenem promes blong Lod. Maet bae oli save dro sam pikja blong ripresentem sam long ol promes ia, mo afta oli serem wetem klas wanem oli faenem. ?Olsem wanem ol promes ia oli givim insperesen long yumi blong gohed blong stap winim ol hadtaem mo ol samting we i yumi no strong long hem?

Revelesen 5

Jisas Kraes nomo i save mekem plan blong Papa long heven i wok.

• ?Yu ting se bae i gud blong yusum wan materiol samting long lesen, blong helpem klas blong yu i andastanem simbol long Revelesen 5 abaot Sevya we i openem buk ia we i sil? Maet bae yu tekem i kam long klas, sam frut we i lok long wan kontena blong serem wetem klas. Bifo klas i stat, olsem sikret, givim ki blong lok long wan man o woman. Eksplenem long klas wanem i stap insaed long kontena, mo letem sam memba blong klas blong traem openem kontena bifo hem we i gat ki i openem. Afta, klas bae i save komperem materiol lesen ia long Revelesen 5. Ol kwestin olsem, oli save help: ?Olsem wanem nao fasin blong sevem man blong Papa long heven, i olsem wan kontena we i gat lok long hem o wan buk we i sil? ?From wanem Jisas Kraes hemwan nomo i save openem sil ia? (luk kwot we i stap long “Sam Moa Risos”).

• Olsem ol pipol we oli stap glad tumas we oli tokbaot olgeta long Revelesen 5, tedei yumi save resemap ol voes blong yumi blong presem Sevya, olsem wan we i klin inaf blong sevem yumi. Maet ol memba blong klas oli save singsing tugeta long wan fevret hym blong wosip we i abaot Sevya, olsem “Glory to God on High” (Hymns, namba 67). Ol memba blong klas oli save faenemaot trutok we hym ia i tijim abaot Jisas Kraes. ?Wanem sam semmak samting we yumi luk long ol mesej blong ol hym blong wosip blong yumi mo toktok we i stap long Revelesen 5:9–14?

Sam Moa Risos

Jisas Kraes hem wan nomo i save mekem atonmen from yumi.

Eksplenem ol samting we i hapen long laef bifo laef ia, Elda Jeffrey R. Holland i tijim:

“Kraes i volontia blong respektem fridom blong mekem joes, blong evri man mo tu blong pemaot praes blong sin blong olgeta. Long fasin blong wok ia, bae Hem i givim i gobak long Papa, evri glori blong lav ia we i pemaot man wetem.

“Atonmen ia blong Kraes we i no gat en i kam posibol long yumi from (1) Hem i wan nomo we i nogat sin we i laef long wol ia, mekem se ded long saed blong spirit we i pat blong sin i no save winim Hem, (2) Hem i Stret Pikinini Ia Nomo blong Papa, mekem se, Hem i gat olgeta paoa olsem wan god i gat, we i givim long Hem paoa blong winim ded blong bodi, mo (3) Hem i kamaot hemwan i putum hem daon inaf mo wiling long bigfala miting long laef bifo laef ia blong oli odenem Hem blong givim seves ia” (“The Atonement of Jesus Christ,” Liahona, Mar. 2008, 35).

Kam Antap long Fasin blong Yumi blong Stap Tij

Yusum ol skripja mo ol toktok blong ol profet blong ol las dei. “Lod i bin givim komanmen long yumi blong ‘tijim wanwan long yumi doktrin blong kingdom’ [Doktrin mo Ol Kavenan 88:77] mo blong yusum skripja blong ‘tijim ol prinsipol blong gospel blong [Hem]’ [Doktrin mo Ol Kavenan 42:12]. Ol skripja mo ol toktok blong ol lata-dei profet mo aposol oli stamba blong ol trutok we yumi stap tijim” (Teaching in the Savior’s Way, 21).