“11–17 Disemba. Revelesen 6–14: ‘Oli Winim Hem Finis long Paoa blong Blad blong Smol Sipsip Ya,’” Kam Folem Mi—Blong Sandei Skul: Niu Testeman 2023 (2021)
“11–17 Disemba. Revelesen 6–14,” Kam Folem Mi—Blong Sandei Skul: 2023
Eric Johnson i putum tugeta art ia: Bigfala Miting long heven, i kam long Robert T. Barrett; pikja blong ol grup blong sta i kam long European Space Agency
11–17 Disemba
Revelesen 6–14
“Oli Winim Hem Finis long Paoa blong Blad blong Smol Sipsip Ya”
Josef Smit i talem se buk blong Revelesen “i wan long ol buk we i klia gud we God i letem blong oli raetem” (long Journal, December 1842–June 1844; Book 2, 10 March 1843–14 July 1843, 98, JosephSmithPapers.org). ?Olsem wanem yu save helpem ol memba blong klas blong faenemaot ol trutok we oli klia gud long ol japta ia?
Invaetem Ol Memba blong Serem Wanem Oli Gat
Blong helpem ol memba blong klas oli luklukbak long sam long ol tingting we oli faenem, taem oli stap stadi Revelesen 6–14, raetem namba 6 i go kasem namba 14 long bod. Ol memba blong klas oli save raetem long saed blong wan namba, eni niu tingting we oli faenem insaed long japta we i go wetem laef blong wan, we i stap laef long ol las dei ia.
Stap Tijim Doktrin
Jisas Kraes i openem sil blong buk.
-
Blong helpem ol memba blong klas blong save luk buk we i gat seven sil (luk long Revelesen 5:1), yu save eksplenem se ol skrol ia blong bifo oli stap silim olgeta wetem smol pis blong klei mo waks. Wan ring o wan stam bae oli prestem i go long klei o waks ia bifo i kam strong, i talemaot atoriti blong man we i silim skrol ia mo i mekem se man olbaot i no save openem skrol ia. Ol memba blong klas oli save serem eni tingting o filing oli gat taem oli stap rid abaot buk ia long Revelesen 6; Doktrin mo Ol Kavenan 77:6–7; mo aotlaen blong wik ia long Kam Folem Mi—Blong Wanwan Man, Woman mo Famli. ?From wanem yu ting se i impoten blong save ol mining blong ol simbol long buk ia? ?From wanem yu ting se i impoten blong save we Sevya nao, i man blong openem wanwan long ol sil blong buk ia? (luk long Revelesen 5:1–9).
“Ol kingdom blong wol ia oli kam ol kingdom blong Lod blong yumi.”
-
Revelesen 7–11 i save stap wan had samting blong andastanem. Wan blesing blong wan Sandei Skul klas i we, ol memba blong klas oli save helpem wanwan long olgeta andastanem ol skripja. Yu save mekem wan lis blong ol kwestin we ol memba blong klas oli gat abaot ol japta ia, mo invaetem olgeta blong serem ol niu tingting wetem wanwan long olgeta. Leftemap tingting blong ol memba blong klas—olgeta we oli filim se oli gat moa save mo olgeta we oli filim se oli no save gud—blong serem wanem oli lanem abaot ol japta ia.
-
Yu save statem klas wetem wan storian olsem, wanem topik we oli faenem i kamaot plante taem long Revelesen 7–11. Oli save serem wea ples oli faenem ol topik ia, mo eksplenem from wanem ol topik ia oli impoten. Sapos oli nidim help, yu save talem long olgeta blong ridim Revelesen 11:15–17. ?Wanem topik nao oli faenem long ol ves ia, mo olsem wanem oli tokbaot ol topik ia, long nara ves long Revelesen 7–11? Nomata we ol ves ia oli tokbaot ol wo mo ol sik, ?wanem yumi faenem we i givim yumi hop mo tras long Jisas Kraes?
Yumi winim Setan “tru long blad blong smol sipsip, mo tru long toktok blong testemoni blong [yumi].”
-
Taem yumi lanem moa abaot Wo long Heven, i save helpem yumi andastanem gud laef long wol ia. Ol memba blong klas oli save rid long Josef Smit Translesen, Revelesen 12:7–11 (long Bible appendix) mo faenemaot olsem wanem yumi winim Setan mo ol enjel blong hem. ?Wanem sam moa save we yumi kasem long wanem oli putum long Wo long Heven, we yumi save faenem long Bible Dictionary o Gospel Topics? (topics.ChurchofJesusChrist.org). ?Wanem yumi lanem we i save helpem yumi winim enemi?
-
Wo bitwin gud mo ivel oli tokbaot long Revelesen 13–14. ?Wanem nao japta 13 i tijim yumi abaot, olsem wanem dragon i faet long wo ia? ?Folem japta 14, olsem wanem smol sipsip i faet long wo ia? Bae i gud tumas blong mekem wan lis blong ol wei we tugeta saed i faet long wo ia, folem tufala japta ia. ?Wanem i semmak mo wanem i defren we yumi save luk?
-
?Wanem i minim smol sipsip ia oli bin “kilim ded Hem stat long stat blong wol”? (Revelesen 13:8; luk tu long Revelesen 5:6). Tingting blong helpem ol memba blong klas blong yu, blong oli faenem ansa blong kwestin ia taem oli rid long Mosaea 3:13 mo Moses 7:47 olsem wan klas. ?Wanem i minim blong winim Setan “tru long blad blong Smol Sipsip”? (Revelesen 12:11).
“Mi luk wan nara enjel … i holem gospel we i no gat en.”
-
Aotlaen blong wik ia long Kam Folem Mi—Blong Wanwan Man, Woman mo Famli i givim tingting blong lanem abaot plante defren enjel we oli putumbak “gospel we i no gat en long … olgeta we oli stap long wol” (Revelesen 14:6). Invaetem ol memba blong klas blong serem wanem oli lanem. ?Wanem nao Doktrin mo Ol Kavenan 133:36–40 i tijim yumi abaot Revelesen 14:6–7? ?Olsem wanem nao yumi tekpat long wok blong enjel we oli tokbaot long Revelesen 14:6–7? Yu save soem vidio ia “The Work of These Last Days” (ChurchofJesusChrist.org).
Kam Antap long Fasin blong Yumi blong Stap Tij
Hem i oraet nomo blong talem se: “mi no save.” “Hem i nomol blong wantem ansarem evri kwestin, long sam situesen i stret blong talem nomo se, ‘mi no save. Bae yumi stadi long kwestin ia blong yumiwan nomo long wik ia, mo yumi save toktok raon long hem nekis taem’” (Teaching in the Savior’s Way, 24). Afta askem ol memba blong klas blong lukaotem ol ansa long ol skripja mo ol nara risos blong Jos.