Niu Testeman 2023
11–17 Disemba. Revelesen 6–14: “Oli Winim Hem Finis long Paoa blong Blad blong Smol Sipsip Ya”

“11–17 Disemba. Revelesen 6–14: ‘Oli Winim Hem Finis long Paoa blong Blad blong Smol Sipsip Ya,’” Kam Folem Mi—Blong Wanwan Man, Woman mo Famli: Niu Testeman 2023 (2022)

“11–17 Disemba. Revelesen 6–14,” Kam Folem Mi—Blong Wanwan Man, Woman mo Famli: 2023

Jisas i stanap long medel blong ol sta

Art we i kam long Eric Johnson: Bigfala Kaonsel long Heven, i kam long Robert T. Barrett; European Space Agency i glad blong givim hemia i kam

11–17 Disemba

Revelesen 6–14

“Oli Winim Hem Finis long Paoa blong Blad blong Smol Sipsip Ya”

Presiden Boyd K. Packer i bin givim kaonsel ia: “Sapos lanwis blong ol skripja, long fas taem, oli strenj smol long yu, gohed blong ridim nomo. I no longtaem bae yu kam blong luksave ol naes samting insaed long hem, mo tu bae yu kam blong luksave paoa we i stap insaed long ol pej ia (“Ki blong Gat Proteksen long saed blong Spirit,” Jeneral Konfrens, Okt 2013, ChurchofJesusChrist.org/general-conference/conferences?lang=bis).

Raetemdaon Ol Filing mo Tingting blong Yu

Traem gat pikja long maen blong “woman ya, kolosap hem i bonem pikinini, nao i stap singaot from we bak blong hem i soa, mo hem i harem nogud tumas from.” Nao traem gat pikja long maen blong “wan bigfala algita i stap we i red olsem faea, mo we i bigwan we i bigwan olgeta. Algita ya i gat seven hed mo ten hon, mo i gat smol hat blong king i stap long ol seven hed ya wanwan;” algita ia i stap ova long woman ia, i rere blong “kakae pikinini ya” (Revelesen 12:2–4). Blong andastanem ol ves ia long revelesen blong Jon, tingbaot se ol pikja ia oli ripresentem Jos mo kingdom blong God mo denja we bae oli fesem. Blong Ol Sent we oli bin gotru long bigfala agens long taem blong Jon, viktri ova long devel bae i no save hapen yet. Viktri, bae i had tu blong luk long ol taem olsem hemia blong yumi tedei, taem we enemi i stap mekem faet wetem ol sent, mo i “bos long olgeta man blong olgeta kala, mo kantri, mo laen, mo lanwis” (Revelesen 13:7). Be en blong revelesen blong Jon i soem, wetem glori, se gud fasin i win ova long nogud fasin. Babilon bae i foldaon. Mo Ol Sent bae oli kamaot long bigfala hadtaem wetem ol klos we oli waet—i no from se klos blong olgeta i neva gat mak, be from se “oli wasem ol klos blong olgeta finis long blad blong Smol Sipsip ya we i ded, blong mekem ol klos ya oli waet” (Revelesen 7:14).

stadi blong yuwan pikja aekon

Sam Aedia blong Skripja Stadi blong Yuwan

Revelesen 6–11

Jon i bin luk plante samting finis i hapen long histri blong wol, speseli long ol las dei.

Long ol japta ia, bae yu ridim abaot wan buk we i gat seven sil. Sapos yu stap askem yuwan se hemia i minim wanem, i no yuwan nomo. Profet Josef Smit tu i bin askem. Lod i talemaot long Josef se buk ia, mo ol sil blong hem, oli ripresentem stori blong “wol ia we i stap blong ol man,” mo wanwan sil i ripresentem wan taosen yia (luk long Doktrin mo Ol Kavenan 77:6–7). Bae yu gat intres blong save se ol samting we oli hapen long taem blong ol fo sil, oli talem sot olgeta long visen blong Jon, long eit ves nomo (Revelesen 6:1–8). Ol nekis tri, oli tokbaot nambafaef sil (ol ves 9–11). Ol samting we bae oli hapen long ol las tufala sil, oli raetem long kolosap haf blong Buk blong Revelesen. Long nara toktok, visen blong Jon i lukluk moa long ol las dei—taem blong yumi tedei. Taem yu stap ridim, tingting hevi long from wanem i gud tumas blong save wanem we Jon i bin raetem abaot ol las dei.

Taem yu stap rid abaot ol samting we bae oli hapen we Jon i bin talem profesi from, tingting blong folem ol tingting mo ol kwestin ia:

Revelesen 12–13

Wo ia long Heven, i stap gohed long wol ia.

Yumi no save tumas samting abaot Wo ia long Heven, be i gat wan sot ples we oli tokbaot hemia long Revelesen 12:7–11. Taem yu stap ridim ol ves ia, traem putum yu olsem pat blong raorao ia long laef bifo laef long wol ia. ?Wanem nao yu lanem abaot wei we oli winim Setan? (luk long ves 11).

Wo ia we i bin stat long heven i gohed long wol ia taem we Setan i gohed blong “go faet agens … olgeta ya we oli stap obei long ol tok blong God, mo we oli stap holem ol tok we Jisas i talemaot se i tru” (Revelesen 12:17). ?Wanem nao yu yu lanem aot long Revelesen 13 abaot wei we hem i stap mekem wo ia tedei? ?Olsem wanem nao “blad blong Smol Sipsip” mo toktok blong testemoni blong yu (Revelesen 12:11) i gohed blong helpem yu long wo ia?

Luk tu long 1 Nifae 14:12–14; Moronae 7:12–13; Moses 4:1–4; Doktrin mo Ol Kavenan 29:36–37; Gospel Topics, “War in Heaven,” topics.ChurchofJesusChrist.org.

Revelesen 14:6–7

“Nao mi luk we wan narafala enjel … i stap talemaot gud nius ya we i blong stap oltaem nomo, gogo i no save finis.”

Profesi we i stap long ol ves ia i bin kamtru taem we Moronae i bin kamkamaot long Josef Smit, mo i bin lidim hem i go long ol histri we hem i bin transletem mo pablisim olsem Buk blong Momon. Buk ia, insaed long hem i gat gud nius ia we i blong stap oltaem, we yumi gat wok ia blong prijim i go long “olgeta man long wol, long olgeta blong evri kala, mo kantri, mo laen, mo lanwis” (Revelesen 14:6).

Blong lanem moa abaot ol nara enjel we oli bin tekpat long wok ia blong putumbak gospel ia we i blong stap oltaem, luk long Doktrin mo Ol Kavenan 13; 27:5–13; 110:11–16; 128:20–21.

Luk tu long “Restoresen blong Gospel blong Jisas Kraes we I Fulwan: Tu Handred Yia Ofisol Toktok I Go long Wol,” ChurchofJesusChrist.org/study?lang=bis.

famli stadi pikja aekon

Ol Aedia blong Famli Skripja Stadi mo Haos Naet

Revelesen 7:9, 13–15.?Wanem nao ol ves ia oli save tijim yumi abaot from wanem yumi stap wetem ol waet klos blong mekem ol odinens blong baptaes mo blong tempol.

Revelesen 7:14–17.Tingting blong invaetem ol memba blong klas blong oli save serem ol filing blong olgeta abaot ol promes blong Lod insaed long ol ves ia. ?Olsem wanem nao ol promes ia oli stap helpem yumi taem yumi stap long ol taem blong bigfala trabol? (ves 14).

Revelesen 12:7–11; 14:6.Sam memba blong famli oli save stap glad blong droem ol pikja blong ol visen we oli tokbaot insaed long Revelesen. Eksampol, sapos yu stap droem ol pikja folem wanem i stap long Revelesen 12 i save lidim ol storian i go long Wo long Heven (luk long ol ves 7–11). Ol pikja we oli stanap long Revelesen 14:6 oli save lidim i go long ol storian abaot Restoresen blong gospel.

Afta we yufala i ridim Revelesen 14:6 tugeta, tingting blong soem ol pikja blong enjel Moronae mo ol nara enjel we oli bin help blong putumbak gospel long taem blong yumi tedei (luk ol pikja long en blong aotlaen ia.) Maet ol memba blong famli oli save gat wanwan janis blong oli holem wan pikja ia antap mo serem ol risen from wanem oli talem tangkyu se ol enjel ia oli kam blong prijim gospel ia we i no save en long yumi.

Revelesen 12:11.?Wanem nao, sentens ia, toktok blong testemoni blong olgeta, i save minim? ?Olsem wanem ol testemoni blong yumi abaot Jisas Kraes, oli helpem yumi mo ol narawan blong winim Setan?

Revelesen 13:11–14.?Wanem tingting nao ol memba blong famli blong yu oli gat abaot nogud animol ia we bae i kam giaman? ?Olsem wanem nao yumi save luksave mo stap longwe long ol giaman samting we yumi stap luk long wol ia tedei?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “I Will Be Valiant,” Children’s Songbook, 162.

Stap Kam Antap long Stadi blong Yuwan

Draonem yuwan insaed long ol skripja. Presiden Russell M. Nelson i bin tijim: “Blong draon evri dei long toktok blong God, i impoten blong yumi laef long saed blong spirit, speseli long ol taem ia we wol i gotru long bigfala jenis” (“Lisin Gud long Hem,” Liahona, Mei 2020, 88). Long yu, toktok ia: “draon evri dei long toktok blong God,” hem i minim wanem long yu?

Kraes i stap noknok long wan doa

Folem nidel blong klok, stat long top lefsaed: Moronae we I Givim Ol Buk we oli Wokem long Gol, i kam long Gary L. Kapp; Antap long Hed blong Yufala, Ol Wokman blong Mi, i kam long Linda Curley Christensen mo Michael T. Malm (Jon Baptaes I Givim Aronik Prishud long Josef Smit.); Ol Ki blong Kingdom, i kam long Linda Curley Christensen mo Michael T. Malm (Pita, Jemes mo Jon, oli givim Melkesedek Prishud long Josef Smit; Visen long Ketlan Tempol, i kam long Gary E. Smith (Moses, Elaeas, mo Elaeja mo Sidni Rigdon).