“11–17 Disemba. Revelesen 6–14: ‘Oli Winim Hem Finis long Paoa blong Blad blong Smol Sipsip Ya,’” Kam Folem Mi—Blong Praemeri: Niu Testeman 2023 (2021)
“11–17 Disemba. Revelesen 6–14,” Kam Folem Mi—Blong Praemeri: 2023
Ol pikja we oli joenem blong mekem wan art i kam long Eric Johnsen: Bigfala Kaonsel, i kam long Robert T. Barrett; European Space Agency i glad blong serem
11–17 Disemba
Revelesen 6–14
“Oli Winim Hem Finis long Paoa blong Blad blong Smol Sipsip Ya”
Taem yu ridim Revelesen 6–14, tingbaot ol pikinini we yu tijim. Tabu Spirit i save helpem yu blong luksave ol trutok we bae i stret long olgeta.
Invaetem Ol Pikinini blong Serem Wanem Oli Gat
Soem sam pikja we bae i helpem ol pikinini blong tingbaot ol samting we oli lanem i no longtaem i pas long hom o long Praemeri. Invaetem ol pikinini blong serem wanem oli save abaot ol pikja ia.
Tijim Doktrin: Ol Smol Pikinini
Jisas i helpem mi blong kam klin.
Jon i luk plante pipol we oli werem ol klos we “oli wasem … olgeta finis long blad blong Smol Sipsip ya we i ded, blong mekem ol klos ya oli waet” (ves 14). Tingting long olsem wanem visen ia i save helpem ol pikinini blong andastanem from wanem i impoten kam klin tru long Atonmen blong Jisas Kraes.
Samfala Aktiviti we Yu Save Mekem
-
Soem sam waet klos long ol pikinini (o wan pikja blong sam klos)mo wan pikja blong Jisas. Ridim Revelesen 7:9, 13–14 long ol pikinini mo askem olgeta blong poen long ol pikja blong ol klos evri taem, oli harem toktok ia waet. Eksplenem se waet klos i ripresentem klin fasin mo rimaenem yumi Jisas Kraes i save mekem yumi klin long ol mistek blong yumi.
-
Soem long ol pikinini wan pis blong waet klos o pis blong pepa, mo letem oli mekem i kam toti, oli raet long hem wetem wan pen o putum toti long hem. Eksplenem se taem yumi no obei long ol komanmen, i filim olsem se yumi gat toti long ol klos blong yumi. Soem wan pikja blong Jisas long Getsemane (olsem Gospel Art Buk, namba 56), putumaot toti klos o pepa mo soem wan klin wan long olgeta. Testifae se Jisas Kraes i save helpem yumi blong kam klin.
-
Singsing wan singsing abaot baptaes “When I Am Baptized” (Children’s Songbook, 103), mo testifae se Jisas Kraes i helpem yumi blong kam klin taem yumi baptaes.
Mi save soem fet blong mi long Jisas Kraes taem mi stap long laef bifo laef long wol ia.
Long Wo ia long Heven, ol fetful pikinini blong God oli winim Setan tru long “toktok blong testemoni blong olgeta” mo taem oli bin soem fet long Jisas Kraes (Revelesen 12:11). Oli gohed blong mekem semmak olsem.
Samfala Aktiviti we Yu Save Mekem
-
Blong helpem ol pikinini blong andastanem wanem i minim blong folem eksampol blong wan, jusum wan pikinini blong stap olsem “lida,” mo askem ol narafala pikinini blong folem hem taem bae hem i mekem eni kaen samting. Afta, letem ol narafala pikinini blong stap wan lida. Ridim Revelesen 12:7–11 long ol pikinini mo eksplenem se bifo yumi bon i kam long wol ia, yumi jusum blong folem Jisas Kraes be i no Setan.
-
Singsing tugeta wan singsing abaot laef bifo laef long wol ia “I Lived in Heaven” o “I Will Follow God’s Plan” (Children’s Songbook, 4, 164–65). Askem ol kwestin olsem, “?wanem i bin hapen long heven bifo we yumi bon i kam long wol ia?” mo “Wanem nao yumi jusum blong mekem?” (Luk tu long “Fas Toktok: Plan blong Papa blong Yumi long Heven” long Ol Niu Testeman Stori, 1–5, o vidio we i go wetem long ChurchofJesusChrist.org.)
Gospel i bin kambak long ol dei blong yumi.
Jon i raet abaot wan enjel we bae i talemaot “gud nius ya we i blong stap oltaem nomo, gogo i no save finis” (Revelesen 14:6). Toktok raon long Revelesen 14:6–7 i givim wan janis blong yu blong testifae abaot Restoresen blong gospel blong Jisas Kraes long dei blong yumi.
Samfala Aktiviti we Yu Save Mekem
-
Soem wan pikja blong Moronae we i stap toktok long Josef Smit taem yu ridim Revelesen 14:6 (luk long Gospel Art Buk, namba 91). Invaetem ol pikinini blong poen i go long enjel long pikja. Serem wetem olgeta , stori blong Moronae we i visit (luk long “Japta 3: Enjel Moronae mo Ol Gol Plet,” long Ol Doktrin mo Ol Kavenan Stori, 13–17, o vidio we i go wetem long ChurchofJesusChrist.org).
-
invaetem ol pikinini blong aktem stori blong Moronae we i stap visitim Josef Smit (luk long Josef Smit—Histri 1:29–35). Helpem olgeta blong talem nem blong ol blesing we yumi stap glad long olgeta, from se, gospel blong Jisas Kraes i bin kambak long wo ia. Serem testemoni blong yu abaot Restoresen.
Tijim Doktrin: Ol Bigfala Pikinini
Gospel i save helpem mi blong winim temtesen.
Smok we i mekem ea i blak long Revelesen 9:2 i semmak olsem ol temtesen (luk long 1 Nifae 12:17).
Samfala Aktiviti we Yu Save Mekem
-
Droem ol pikja blong wan san mo wan dak klaod, mo katemaot olgeta. Invaetem ol pikinini blong ridim Revelesen9:2 mo 1 Nifae 12:17 mo raetem long ol dak klaod ia wanem smok o klaod i ripresentem. Stikim ol dak klaod long bod, mo invaetem ol pikinini blong mekem wan lis blong ol temtesen we ol pikinini we oli gat semmak yia olsem olgeta, oli stap fesem. Afta putum san long bod mo askem olgeta blong mekem wan lis blong ol tul we Papa long Heven i bin givim long yumi blong winim ol tudak ia long wol.
-
?Olsem wanem yumi save helpem ol narawan we oli stap long tudak long saed blong spirit? Blong helpem ol pikinini blong tingting abaot ol kwestin, soem pat blong vidio ia “Choose the Light” (ChurchofJesusChrist.org), speseli las haf pat blong vidio. ?Olsem wanem nao yumi save stap olsem man ia we i helpem man we i ron long baeskel long tanel?
Mi save soem fet blong mi long Jisas Kraes taem mi stap long laef bifo laef long wol ia.
Ol pikinini we yu tijim oli stap long wol ia from se oli bin gat fet long Jisas Kraes long laef bifo long laef blong wol ia, mo oli bin jusum blong folem Hem.
Samfala Aktiviti we Yu Save Mekem
-
Ridim tugeta Revelesen 12:7–11, mo raetem ol toktok ia long bod dragon, Wo long Heven, sakemaot, testemoni, mo smol sipsip. Askem ol pikinini blong talem long sot toktok ol ves ia, mo yusum ol toktok long bod. ?Wanem nao yumi lanem abaot Jisas Kraes (smol sipsip) long ol ves ia? ?Wanem nao yumi lanem abaot ol joes we yumi mekem long laef bifo long laef blong wol ia?
-
Long bod, raetem tri kolom mo makem ol toktok ia long ol kolom ia Bifo laef ia, Long taem blong laef ia, mo Tugeta. Rere long ol pis pepa we oli raetem ol trutok abaot laef bifo laef long wol ia olsem Yumi gat bodi, Yumi no gat bodi, Yumi laef long ples we God i stap long hem, Yumi stap long wo wetem Setan, Yumi praktisim fet long Jisas Kraes, mo Yumi folem plan blong God. Letem wanwan pikinini i gat janis blong pikimap wan pis pepa mo jusum wijwan kolom blong putum i go insaed long hem. Talemaot tras we yu gat long ol pikinini, se bae oli save gohed blong soem fet long Kraes.
Olsem pat blong Restoresen, bae oli prijim gospel i go long evriwan long ful wol.
ol pikinini we yu tijim oli save help blong prijim gospel “i go long evri kantri, famle, lanwis, o pipol” (Revelesen 14:6).
Samfala Aktiviti we Yu Save Mekem
-
Askem ol pikinini blong ridim Revelesen 14:6–7 mo raetem ol toktok o sentens long ol ves ia, we i gat mining long olgeta. Askem olgeta from wanem oli jusum ol toktok o sentens ia. Eksplenem se ol ves ia oli tokbaot Restoresen blong gospel long dei blong yumi. Askem olgeta olsem wanem bae oli tekpat blong stap prijim gospel i go long wol.
-
Invaetem ol pikinini blong ridim Revelesen 14:7 mo blong talem long toktok blong olgetawan, blong oli andastanem mesej we enjel i gat blong wol. O invaetem olgeta blong dro wan pikja we i ripresentem mesej blong enjel. ?Wanem nao yumi save serem wetem ol narafala man, abaot gospel blong Jisas Kraes?
Stap Leftemap Tingting blong Lanem Samting long Hom
Helpem ol pikinini blong raetemdaon wan toktok o sentens we bae i helpem olgeta blong tingbaot wan samting we oli lanem long klas tedei. Invaetem olgeta blong soem wanem we oli bin raetem long wan long hom, mo serem wanem oli bin lanem.
Kam Antap long Fasin blong Yumi blong Stap Tij
Tijim doktrin tru long miusik. Taem yu singsing ol singsing wetem ol pikinini i sapotem doktrin we yu tijim long ol skripja. Blong kasem moa aedia, luk long “Yusum Miusik blong Tijim Doktrin” long seksen taetol “Ol Instraksen blong Singsing Taem mo Sakramen Miting Presentesen blong Ol Pikinini” long en blong lesen buk ia.