“25–31 Disemba. Revelesen 15–22: ‘Man we I Winim Faet blong Hem, I Gat Promes blong Mi I Stap long Hem,’” Kam Folem Mi—Blong Praemeri: Niu Testeman 2023 (2021)
“25–31 Disemba. Revelesen 15–22,” Kam Folem Mi—Blong Praemeri: 2023
Siti ia we I No Save Finis(Art wok), i kam long Keith Larson
25–31 Disemba
Revelesen 15–22
“Man we I Winim Faet blong Hem, I Gat Promes blong Mi I Stap long Hem”
Taem yu stap rere blong tij, lukluk moa long eksperiens blong yu taem yu stap stadi long Revelesen 15–22 blong yuwan o famli blong yu. ?Wanem mesej nao i kamaot klia long yu? ?Wanem tingting mo filing we yu kasem? Tingbaot se evri aktiviti we oli stap long aotlaen ia, yu save stretem blong yusum wetem ol pikinini we oli bigwan, mo nara wei raon.
Invaetem Ol Pikinini blong Serem Wanem Oli Gat
Invaetem ol pikinini blong serem from wanem oli wantem laef we Papa long Heven bakegen. Truaot long lesen, helpem olgeta blong lukaotem ol samting we oli save mekem blong rere blong gobak long Hem.
Tijim Doktrin: Ol Smol Pikinini
Mi save presem God tru long singsing.
Ol Sent we Jon i stap tokbaot long Revelesen 15:2–4 oli bin singsing ol pres i go long God from gudfala fasin blong Hem. ?Wanem ol singsing blong pres we oli save helpem ol pikinini blong soem lav blong olgeta long Papa long Heven mo Jisas Kraes?
Samfala Aktiviti we Yu Save Mekem
-
Taem yu stap ridim laod ol pat blong Revelesen 15:2–4, askem ol pikinini blong mekem ol aksen olsem blong mekem olsem se hem i stap plei long wan tul blong miusik o lidim wan kwaea. ?Yumi filim olsem wanem taem yumi singsing abaot Jisas?
-
Askem ol pikinini blong serem sam long ol fevret singsing blong olgeta abaot Papa long Heven mo Jisas Kraes. Singsing sam long ol singsing ia tugeta, mo helpem ol pikinini blong andastanem wanem singsing ia i stap tijim yumi abaot, Papa long Heven mo Sevya.
Mi save rere from Seken Kaming blong Jisas Kraes taem mi stap jusum raet.
?Olsem wanem nao yu save helpem ol pikinini blong andastanem se Seken Kaming bae i wan gudfala taem blong glad blong yumi, sapos yumi stap folem ol komanmen blong Jisas?
Samfala Aktiviti we Yu Save Mekem
-
Askem ol pikinini sapos oli bin go long wan mared finis. ?Hem i bin olsem wanem? ?From wanem ol pipol oli hapi long taem blong wan mared? Soem pikja blong Sevya blong Seken Kaming long aotlaen blong wik ia long Kam Folem Mi—Blong Wanwan Man, Woman, mo Famli, mo ridim Revelesen 19:7. Eksperiens se “mared blong smol sipsip” i ripresentem Seken Kaming blong Jisas Kraes. ?From wanem bae yumi glad taem Sevya i kam bakegen? Helpem ol pikinini blong komperem glad blong wan mared i go wetem glad blong taem we Sevya bae i kambak.
-
Serem wetem ol pikinini from wanem yu stap lukluk fored from Seken Kaming blong Jisas. Yu save singsing tu long wan singsing abaot Seken Kaming olsem “When He Comes Again” (Children’s Songbook, 82–83).
-
Invaetem ol pikinini blong serem wanem oli mekem blong rere blong go long Jos long Sandei. ?From wanem yumi mekem ol samting ia bifo yumi kam long jos? From wanem yumi mas rere from Seken Kaming blong Kraes? Long aktiviti pej blong wik ia, letem ol pikinini blong dro wanem oli save mekem blong rere from Seken Kaming.
Revelesen 21:1, 3–4, 22–27; 22:1–2
Papa long Heven i wantem mi blong laef wetem Hem long selestial kingdom.
Long tufala las japta blong Revelesen, Jon i yusum naesfala lanwis blong tokbaot selestial glori, we ol fetful bae oli glad long ples ia.
Samfala Aktiviti we Yu Save Mekem
-
Helpem ol pikinini blong dro tri we oli tokbaot long Revelesen 22:2 long bod. Eksplenem se, tri ia, i tri blong laef, mo frut blong hem i ripresentem lav blong God (luk long 1 Nifae 11:21–22). Givim long ol pikinini ol pis blong ol pepa we oli sep olsem wan frut, mo invaetem olgeta blong dro long ol pepa ia, wan samting we i stap helpem olgeta blong filim lav blong Papa long Heven. Eksplenem se olgeta we oli lavem mo obei long Papa long Heven, bae oli laef wetem Hem long selestial kingdom.
-
Serem wetem ol pikinini sam long ol pikja o ol infomesen we Jon i bin yusum blong tokbaot selestial glori (luk long Revelesen 21:1, 3–4, 22–27; 22:1–2), mo invaetem ol pikinini blong dro ol pikja blong ol samting ia.
-
Singsing tugeta wan singsing we i tijim olsem wanem yumi save rere blong gobak long ples we God i stap long help, olsem “I Will Follow God’s Plan” (Children’s Songbook, 164–65). Invaetem ol pikinini blong talemaot ol samting we oli save mekem blong laef wetem Papa long Heven bakegen.
Tijim Doktrin: Ol Bigfala Pikinini
Mi save rere from Seken Kaming blong Jisas Kraes taem mi stap jusum raet.
?Olsem wanem yu save helpem ol pikinini we yu stap tijim blong oli andastanem se Seken Kaming blong Jisas Kraes bae i wan taem blong glad from ol stret mo gud pipol?
Samfala Aktiviti we Yu Save Mekem
-
Ridim tugeta Revelesen 19:7–8, mo helpem ol pikinini blong andastanem ol simbol blong ol ves ia—mared hem i Seken Kaming blong Sevya, Smol Sipsip hem i Sevya, mo waef blong Hem i Jos (o yumi evriwan). ?Wanem ol samting we maet yumi mekem blong rere from Sevya we bae i kam bakegen?
-
Luklukbak mo lanem baehat Ol Toktok blong Bilif 1:10 wetem ol pikinini. Eksplenem se toktok blong bilif ia i tokbaot se bae i wan taem mo glad, wan taem we bae i fulap long glori, we bae i hapen taem we Jisas bae i kam bakegen. Soem pikja blong Seken Kaming blong Jisas long Kam Folem Mi—Blong Wanwan Man, Woman mo Famli, mo invaetem ol pikinini blong dro wanem oli tingting se bae i hapen long Seken Kaming blong Jisas.
God bae i jajem mi.
Evri long yumi bae wan dei yumi stanap long fored blong God. Yu save helpem ol pikinini blong andastanem se jajmen blong Hem bae i stret mo fea mo fulap long sore.
Samfala Aktiviti we Yu Save Mekem
-
Raetem long bod ?Jajmen Dei bae i olsem wanem? Invaetem ol pikinini blong lukaotem ol ansa long ol kwestin long Revelesen 20:12–13 mo long “Jajem, Jajmen” long Gaed long Ol Skripja (olskripja.ChurchofJesusChrist.org). ?Wanem nao Sevya i bin mekem, se Jajmen Dei i save kam olsem wan dei we i fulap long glad? (Luk long Ol Toktok blong Bilif 1:1–4). ?Wanem nao yumi save mekem, blong dei ia i save kam wan dei we i fulap long glad, blong yumi?
Las Jajmen, i kam long John Scott
-
Karem wan not buk i kam long klas we i ripresentem “buk blong laef” (Revelesen 20:12), we yu bin raetem sam long ol fasin olsem hemia blong Kraes mo ol gudfala wok blong ol pikinini long klas blong yu long hem. Ridim long ol pikinini, ol samting we yu bin raetem mo invaetem olgeta blong tokbaot ol kwaliti blong Kraes we oli bin luk long olgeta wanwan. Serem testemoni blong yu se, Jisas Kraes i helpem yumi blong kam moa olsem Hem mo givim wan wei blong yumi sakem sin mo winim sin.
Revelesen 21:1, 3–4, 22–27; 22:1–2, 17
Papa long Heven i wantem mi blong laef wetem Hem long selestial kingdom.
Taem bae yu ridim olsem wanem Jon i tokbaot selestial glori long Revelesen 21–22, ?wanem nao i klia long yu? ?Wanem yu filim, we i kam tru long insperesen, blong yu serem wetem ol pikinini we yu stap tijim?
Samfala Aktiviti we Yu Save Mekem
-
Invaetem ol pikinini blong lukaotem long ol ves ia, ol toktok mo ol sentens we Jon i bin yusum blong tokbaot selestial glori: Revelesen 21:1, 3–4, 22–27; 22:1–2. Letem olgeta oli jusum wan samting long ol ves ia, we oli wantem blong droem. Afta, oli save tokbaot ol droing blong olgeta wetem klas. Leftemap tingting blong olgeta blong soem ol droing blong olgeta wetem ol famli blong olgeta long hom.
-
Ridim tugeta Revelesen 22:17, mo eksplenem se man blong mared we i talem se “Kam” hem i Jos. Huia nao, yumi olsem ol memba, yumi wantem blong invaetem ol narafala man blong “Kam” long? (Luk long Moronae 10:30–33). ?Wanem nao maet olgeta raon long yumi oli stap “tosta” from? ?Wanem sam gudfala wei we yumi save invaetem ol pipol blong “kam”?
Stap Leftemap Tingting blong Lanem Samting long Hom
Helpem ol pikinini blong rere blong ridim Buk blong Momon nekis yia mo stap invaetem olgeta blong askem wan memba blong famli o fren blong serem wan fevret ves long stori blong Buk blong Momon.
Stap Kam Antap long Fasin blong Yumi Blong Stap Tij
Tijim ol pikinini blong raetemdaon ol filing mo ol tingting. Sapos wan samting i save lanem fasin blong stap raetem taem ol tingting mo filing, bae i helpem olgeta blong luksave mo folem Spirit. Ol pikinini oli save raetemdaon ol filing o tingting blong olgeta taem oli stap makem ol skripja, dro ol pikja, o raet smol long wan jenol. (Luk long Teaching in the Savior’s Way, 30.)