“4–10 Disemba. Revelesen 1–5: ‘Smol Sipsip Ya, Yumi Mas Presem, Yumi Mas Ona, Mo Yumi Mas Talemaot Paoa blong Hem Gogo I No Save Finis,’” Kam Folem Mi—Blong Praemeri: Niu Testeman 2023 (2021)
“4–10 Disemba. Revelesen 1–5,” Kam Folem Mi—Blong Praemeri: 2023
4–10 Disemba
Revelesen 1–5
“Smol Sipsip Ya, Yumi Mas Presem, Yumi Mas Ona, Mo Yumi Mas Talemaot Paoa blong Hem Gogo I No Save Finis”
Buk blong Revelesen i had blong ol pikinini oli andastanem, be i gat tu ol impoten doktrin we oli naes mo simpol.
Invaetem Ol Pikinini blong Serem Wanem Oli Gat
Invaetem ol pikinini blong serem olsem wanem bae oli filim sapos oli luk Jisas Kraes long wan visen. Askem olgeta blong serem eni samting we oli save abaot visen we Jon i luk abaot Jisas long Revelesen.
Tijim Doktrin: Ol Smol Pikinini
Mi save soem laet blong Sevya.
Long Revelesen 1:20, Sevya i komperem Jos blong Hem wetem ol stik blong kandel. Helpem ol pikinini blong andastanem se oli save saenem laet blong Sevya, taem oli stap laef folem ol tijing blong Hem.
Samfala Aktiviti we Yu Save Mekem
-
Soem long ol pikja blong ol defdefren kaen laet long ol pikinini olsem, wan balb blong laet, wan kandel mo san. Taem yu ridim “Ol seven ples ya blong putum laet, hemia ol seven jos ya nomo” (Revelesen 1:20), invaetem ol pikinini blong poen i go long pikja blong laet we oli talemaot long ves ia. Helpem ol pikinini blong tokbaot olsem wanem yumi, ol memba blong Jos blong Jisas, i save stap olsem laet blong wan kandel—eksampol, taem yumi mekem wan naesfala samting blong ol narafala man.
-
Singsing long wan singsing abaot olsem wanem blong stap wan laet long ol narafala man, olsem “Jesus Wants Me for a Sunbeam” (Children’s Songbook, 60–61). Serem sam wei we yu bin luk ol pikinini oli laef folem gospel blong Jisas Kraes mo stap wan laet long olgeta we oli stap raon long olgeta. Serem olsem wanem taem yu stap olsem wan laet long ol narafala man i bin helpem yu blong filim moa kolosap long Papa long Heven mo Jisas Kraes.
Mi save invaetem Jisas Kraes i kam long laef blong mi.
Mining blong Jisas we i stap stanap long doa mo stap noknok, i save helpem ol pikinini blong andastanem se, Hem i wantem blong stap kolosap long olgeta.
Samfala Aktiviti we Yu Save Mekem
-
Taem yu ridim Revelesen 3:20, soem pikja blong Sevya long doa we i stap long aotlaen blong wik ia long Kam Folem Mi—Blong Wanwan Man, Woman, mo Famli. Invaetem ol pikinini blong pikjarem long maen blong olgeta se Jisas i stap noknok long ol doa blong hom blong olgeta. Letem olgeta oli tokbaot wanem we oli bae oli mekem.
-
Invaetem ol pikinini blong tokbaot ol taem we oli bin wet from wan man blong kam visitim hom blong olgeta mo we oli glad blong luk hem. ?Wanem filing bae i kam, taem yu stap wet long man o woman ia blong noknok long doa? ?Wanem sapos yumi neva letem man o woman ia i kam insaed? Ridim Revelesen 3:20, mo letem wanwan pikinini i gat janis blong holem wan pikja blong Jisas mo mekem olsem se i stap noknok long doa. Ol nara memba blong klas oli save mekem olsem se, oli stap openem doa. ?Wanem nao yumi save mekem blong letem Jisas i kam kolosap long yumi, nomata yumi no save luk Hem?
Jisas Kraes i wan man ia nomo we i klin inaf blong stap olsem Sevya blong mi.
Jon i lanem long visen blong hem se, Jisas Kraes nomo (ripresentem wan smol sipsip) i save stap olsem Sevya blong yumi mo mekem plan blong Papa i hapen (ripresentem buk we i sil).
Samfala Aktiviti we Yu Save Mekem
-
Bifo klas i stat, kavremap wan kopi blong Gospel Art Buk yusum pepa o string. Yusum wan ki toktok long Revelesen 5:1–10, blong tokbaot visen we Jon i bin luk. Soem long ol pikinini, buk ia mo talem long olgeta se wan we nomo blong openem buk ia i blong faenem pikja blong Jisas we yu bin haedem long rum ia. Taem oli faenem pikja, openem buk mo serem wetem ol pikinini, sam long ol pikja long buk we i ripresentem ol blesing we i gat i stap, from se Atonmen blong Jisas Kraes (olsem tempol, baptaes mo ol famli). Testifae se Sevya Hemwan nomo i save mekem ol samting ia i posibol.
-
Talem long sot toktok visen we oli tokbaot long Revelesen 5:1–10, mo invaetem ol pikinini blong aktem olsem wanem Jon mo ol narafala man oli bin filim long ol defdefren pat blong visen. Eksampol, oli save mekem olsem se oli krae taem i no gat wan i save openem buk, o oli save glad taem Sevya i openem.
Tijim Doktrin: Ol Bigfala Pikinini
Sapos mi komitim mi long gospel blong Sevya, bae mi kasem ol bigfala blesing long heven.
?Wanem nao i minim blong stap olsem “hafhaf nomo, i no hot gud,i no kol gud”? Tingting long ol wei we ol pikinini oli save mekem oposit blong hafhaf—blong gat bigfala intres blong komitim olgeta i go long Sevya mo gospel blong Hem.
Samfala Aktiviti we Yu Save Mekem
-
Ridim tugeta Revelesen 3:5, 12, 21, mo eksplenem eni toktok we maet ol pikinini oli no save. ?I minim wanem blong “winim”? Invaetem ol pikinini blong dro wan long ol blesing we oli promesem long ol ves ia mo serem wetem klas.
-
Ridim tugeta Revelesen 3:15–16. Askem ol pikinini blong tokbaot ol samting we oli gat gudfala yusum, o we oli laekem taem we i no hot (olsem, wan sup) o kolkol (olsem aeskrim). ?Olsem wanem taem yumi hafhaf i blokem yumi long ol blesing we oli promesem long ol ves ia 5, 12, mo 21?
-
Long bod raetem hafhaf, folem wetem sam semmak toktok olsem hat we i hafhaf, i no gat wari, o i no nomol. Yusum ol toktok ia blong helpem ol pikinini blong andastanem from wanem Lod i no wantem yumi blong hafhaf. ?Wanem ol toktok we yumi tingting long olgeta, blong tokbaot ol wei we Hem i wantem yumi blong kam olsem? Serem from wanem yu wantem komitim yu fulwan long Sevya, mo invaetem ol pikinini blong serem ol tingting blong olgeta tu.
Mi save jusum blong letem Jisas Kraes i kam pat blong laef blong mi.
?Olsem wanem nao yu helpem ol pikinini we yu tijim blong openem hat blong olgeta, mo laef folem paoa blong Jisas Kraes?
Samfala Aktiviti we Yu Save Mekem
-
Taem yu ridim Revelesen 3:20, soem pikja blong Sevya long doa we i stap long aotlaen blong wik ia long Kam Folem Mi—Blong Wanwan Man, Woman, mo Famli. Blong helpem ol pikinini blong dro mining long ol pikinini, invaetem olgeta blong wok tu tu blong ansarem ol kwestin olsem: ?from wanem yu ting se Jisas i stap noknok long doa? ?From wanem i no gat wan handel aotsaed long doa? ?Hem i minim wanem blong letem Jisas i kam insaed long laef blong yumi?
-
Askem ol pikinini blong raetem wan lis blong ol defdefren wei blong “openem doa” long Jisas. Sam long ol eksampol maet i gat tu, givim seves long ol narafala man, stap ridim ol skripja, obei long ol kavenan we yumi mekem taem yumi baptaes, mo stap tekem sakramen.
Jisas Kraes i wan man ia nomo we i klin inaf blong stap olsem Sevya blong mi.
Visen we oli tokbaot long Revelesen 5 i tijim se Jisas Kraes nomo i klin inaf mo save mekem Atonmen mo sevem yumi long sin.
Samfala Aktiviti we Yu Save Mekem
-
Invaetem ol pikinini blong talem wan taem we oli nidim wan blong i mekem wan samting we oli olgeta, oli no save mekem. Askem ol blong ridim Revelesen 5:1–10 mo lukaotem wanem we oli nid blong mekem, we wan man nomo i save mekem (eksplenem se smol sipsip hem i Jisas Kraes mo buk i ripresentem plan blong God). ?Wanem nao Jisas i bin mekem blong yumi, we i no gat wan man i save mekem.
-
Askem ol pikinini blong lukaotem wan hym o singsing blong ol pikinini we i testifae abaot Jisas Kraes (olsem, “Beautiful Savior,” Children’s Songbook, 62–63). ?Wanem nao olgeta toktok blong singsing ia oli tijim abaot Jisas Kraes? ?Olsem wanem nao singsing ia i olsem hym blong pres we oli bin singsing long hem abaot Jisas Kraes long Revelesen 5:9–10?
Stap Leftemap Tingting blong Lanem Samting long Hom
Invaetem ol pikinini blong serem wetem famli blong olgeta ol wei we oli save invaetem paoa blong Sevya i kam insaed long hom blong olgeta.
Stap Kam Antap long Fasin blong Yumi blong Stap Tij
Leftemap tingting blong gat fasin blong stap kwaet. Wan impoten pat blong stap kwaet, hem i blong stap tingting long Papa long Heven mo Jisas Kraes. Maet bae yu rimaenem olgeta blong stap kwaet taem oli singsing wan singsing kwaet kwaet nomo, o oli mekem tiun blong singsing ia nomo, o soem wan pikja blong Jisas Kraes.