4–10 Disemba

Revelesen 1–5

“Smol Sipsip Ya, Yumi Mas Presem, Yumi Mas Ona, Mo Yumi Mas Talemaot Paoa blong Hem Gogo I No Save Finis”

Tingting blong raetemdaon ol kwestin we yu gat long saed blong wanem we yu stap ridim long Revelesen. Afta, yu save lukaotem ol ansa long ol kwestin blong yu, o toktok raon long ol kwestin ia wetem wan memba blong famli, o long ol klas long Jos.

Raetemdaon Ol Filing mo Tingting blong Yu

?Yu yu gat hadtaem blong talemaot long ol narawan wanem we yu bin filim long taem blong wan eksperiens long saed blong spirit, we i bin strong tumas? Maet bae yu luk se lanwis we yumi yusum evri dei i no gud inaf blong tokbaot ol filing mo ol tingting long saed blong spirit. Maet hemia nao from wanem Jon i yusum ol rij simbol mo pikja olsem blong tokbaot bigfala revelesen blong hem. Hem i save talem nomo se hem i bin luk Jisas Kraes, be blong helpem yumi andastanem eksperiens blong hem, hem i tokbaot Sevya mo i yusum ol toktok olsem: “ae blong hem i olsem faea we i laet,” “i gat naef blong faet we i sap tu saed i stap kamaot long maot blong hem,” mo “Fes blong hem i saen olsem san long medel dei” (Revelesen 1:14–16). Taem we yufala i stap ridim Buk blong Revelesen, traem faenemaot ol mesej we Jon i bin wantem yu blong lanem mo filing, iven sapos yu no andastanem mining biaen long evri simbol. ?From wanem hem i bin komperem ol kongregesen blong Jos long ol stik blong holem kandel, Setan olsem wan dragon, mo Jisas Kraes olsem wan smol sipsip? Be, yu no nid blong andastanem evri simbol long Revelesen blong save andastanem wanem i impoten long hem, wetem poen we i moa impoten long ples ia: Jisas Kraes mo olgeta we oli stap folem hem bambae oli win ova long ol kingdom blong ol man mo Setan.

Sam Aedia blong Skripja Stadi blong Yuwan

Visen blong Jon i stap tijim yumi abaot plan blong Papa long Heven blong sevem ol pikinini blong Hem.

Buk ia blong Revelesen bae i had blong andastanem, be yu no slakem tingting blong yu. Promes blong Jon i save givim insperesen long yu blong gohed blong traem: “Mi blesem olgeta we oli ridim hemia, mo olgeta we oli harem hemia mo oli haremsave ol toktok blong profesi ia, mo oli obei long ol samting we oli stap long ol toktok ia, from se taem we Lod bae i kam, i kam kolosap finis” (Joseph Smith Translation, Revelation 1:3 [insaed long Bible appendix], oli ademap italik).

Wan wei blong stadi long Revelesen i blong lukaotem ol samting we oli joen wetem plan blong fasin blong sevem man. Bigfala lukluk ia i save helpem yu:

• Ol Japta 5 mo 12 oli tokbaot ol samting we oli bin hapen long laef bifo laef long wol ia.

• Ol Japta 6–11, 13–14, 16–19 oli tokbaot laef long wol ia mo ol samting we oli bin hapen long histri blong wol ia.

• Ol Japta 2–3, 15, 20–22 oli tokbaot Las Jajmen mo glori we i stap wet long olgeta we oli fetful.

Taem yu stap rid, askem yuwan: “Wanem nao hemia i stap tijim mi abaot plan ia blong God? ?Wanem nao God i bin mekem blong i helpem mi blong winim ivel mo gobak long Hem? ?Wanem nao sam long ol promes blong Hem i go long olgeta we oli fetful?

Maet bae i gud blong save se Doktrin mo Ol Kavenan 77 i stap eksplenem sam long ol simbol insaed long Revelesen. Antap long hemia, Josef Smit Translesen i mekem sam skripja insaed long Revelesen, oli kam klia, so i gud blong stap jekem ol futnot mo Bible appendix oltaem.

Luk tu long Gaed long Ol Skripja, “Jon,” “Revelesen blong Jon.”

Revelesen 1

Jisas Kraes i Pikinini blong God we i Stap Laef.

Fas japta blong Revelesen i tokbaot taem we Jisas Kraes i bin kamaot long Jon long wan visen. Maet yu save mekem wan lis blong evri samting we japta ia i stap talem abaot Jisas Kraes, wetem huia hem, mo wanem nao Hem i mekem blong yumi, mo se Hem i olsem wanem.

Sam samting we yu lanem bae i kamaot long ol simbol. Tingting hevi long wanem nao Lod i stap wantem traem blong tijim yu abaot Hemwan tru long ol simbol ia. Eksampol: teknot se Sevya i stap singaotem Hem, Hemwan se “stat mo en,” “faswan mo laswan.” Long tingting blong yu, ?from wanem nao ol taetol ia oli impoten? ?Wanem nao ol taetol ia oli stap tijim yu abaot Sevya?

Revelesen 2–3

Jisas Kraes i save mi, mo bae i helpem mi blong winim ol jalenj blong mi.

Toktok blong Sevya long Revelesen 2–3 i soemaot se Hem i bin andastanem ol sakses mo ol hadtaem we oli blong wanwan branj blong Jos long taem blong Jon. Hem i bin presem ol hadwok blong Ol Sent, mo tu, hem i bin givim woning abaot ol samting we oli nidim blong jenis. ?Wanem nao yu yu lanem aot long pres mo woning blong Sevya?

Sevya i andastanem ol sakses mo ol hadtaem blong yu mo Hem i wantem helpem yu. Tek not se Hem i mekem ol promes long olgeta we oli stap win. ?Wanem nao i tajem tingting mo filing blong yu abaot ol promes ia? Wanem nao Lod i wantem yu blong win? ?Wanem nao yu mas mekem blong save kasem help blong Hem?

Revelesen 4–5

Jisas Kraes nomo i save mekem plan ia blong Papa long Heven i posibol.

?Wanem nao yu yu lanem abaot Papa long Heven, aot long Revelesen 4 mo abaot Jisas Kraes, aot long Revelesen 5? Tingting se bae i olsem wanem taem we evriwan i luksave se Jisas Kraes (smol sipsip ) bae i mekem plan blong Papa long Heven i posibol (Sevya i save openem buk, mo mekem ol seven sil oli open” [Revelesen 5:5]). ?From wanem Jisas Kraes Hemwan nomo i save mekem hemia? ?Olsem wanem nao yu save soem fet blong yu long Hem olsem Sevya blong yu?

Luk tu long Job 38:4–7; Doktrin mo Ol Kavenan 77:1–7.

Ol Aedia blong Famli Skripja Stadi mo Haos Naet

Revelesen 1:20.?From wanem Jisas Kraes i komperem Jos blong Hem long ol stik blong holem kandel? (luk long Matiu 5:14–16). Singsing wan singsing long haos blong stap olsem wan laet long wan stik we i holem kandel, olsem “Shine On” (Children’s Songbook, 144).

Revelesen 2–3.Priten se oli askem Jon blong givim wan mesej long famli blong yu olsem hemia we hem i bin givim long ol jos long taem blong hem. ?Bae wanem nao bae i talem se i go gud? ?Wanem bae yu mekem i kam gud moa?

Revelesen 3:15–16.Afta we yufala i ridim ol ves ia, famli blong yu i save dring sam wota we i no hot tumas, we i tes gud moa taem i hot bitim we taem i kolkol? ?Hem i minim wanem blong stap wom long saed blong spirit?

Revelesen 3:20.Soem pikja blong Sevya we i stap noknok long doa (luk long en blong aotlaen ia) taem we famli blong yu i stap ridim Revelesen 3:20. ?From wanem Jisas i noknok be i no jes go insaed? Ol memba blong famli oli stap gat wanwan janis blong noknok long wan doa. Afta, wan narawan insaed long famli, i save talem wan wei blong “openem doa” long Sevya mo letem memba blong famli ia i kam insaed. ?Bae yu filim olsem wanem blong gat Sevya insaed long hom blong yu?

Revelesen 4:10–11.?Hem i minim wanem blong wosipim Papa long Heven? ?Wanem nao save abaot Hem, we bae i mekem yumi wantem wosipim Hem?

Revelesen 5:6, 12–13.?From wanem nao oli singaotem Jisas Kraes, se hem i “Smol Sipsip”? ?Wanem nao taetol ia i stap tijim yumi abaot Hem?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Jesus, Once of Humble Birth,” Hymns, namba 196.

Stap Kam Antap long Fasin blong Yumi blong Stap Tij

Askem ol kwestin. Ol kwestin ia oli wan samting we i soem se ol memba blong famli oli rere blong lanem mo givim sam niu tingting long hao oli mekem samting taem oli stap tijim olgeta. Tijim famli blong yu hao blong faenem ol ansa insaed long ol skripja. (Luk long Teaching in the Savior’s Way, 25–26.)

Letem Hem Insaed, i kam long Greg K. Olsen