Lav we I Stret Gud Evriwan, i kam long Del Parson

27 Novemba–3 Disemba

1–3 Jon; Jud

“God I Stamba blong Fasin Ya blong Lavem Man”

Taem yu stap ridim Ol Leta blong Jon mo Jud, lukaotem insperesen abaot wei we yu save soem lav we yu yu gat long God. Raetemdaon ol tingting mo ol filing ia mo tekem aksen folem.

Raetemdaon Ol Filing mo Tingting blong Yu

Taem we Jon mo Jud, tufala i bin raetem leta blong tufala, doktrin we i rong, i bin stat finis blong lidim plante Sent oli go long Apostasi. Sam giaman tija oli bin stap kwestinim tu se, i tru se Jisas Kraes i bin kam kamaot long mit mo bun (eksampol, luk long 1 Jon 4:1–3; 2 Jon 1:7). ?Wanem wan lida blong Jos i save mekem long kaen situesen olsem? Aposol Jon i bin ansa wetem witnes blong hemwan abaot Sevya: “Hemia i testemoni we mifala i givim long wanem we i stap stat long stat, we mifala i bin harem, mo mifala i bin luk wetem ae blong mifala, we mifala i bin luk gud, mo han blong mifala i bin tajem, long saed blong Tok blong laef” (Joseph Smith Translation, 1 John 1:1 [long 1 John 1:1, footnote a]). Mo afta, Jon i bin tijim abaot lav: Lav blong God long yumi, mo lav we yumi mas gat long Hem mo long evriwan long ol pikinini blong Hem. Long en, Jon i bin wan witnes tu. Hem hemwan i bin gat eksperiens ia long lav blong Sevya (luk long Jon 13:23; 20:2), mo hem i bin wantem Ol Sent blong oli filim semfala lav ia. Testemoni mo ol tijing blong Jon long saed blong lav, yumi nidim olgeta tedei, taem we fet long Jisas Kraes i stap long kwestin mo ol giaman tijing oli fulap raon long yumi. Taem yu stap ridim ol leta blong Jon, bae i save helpem yu blong fesem ol agens blong tedei wetem strong paoa long tingting, from se “taem yumi savegud fasin blong God blong lavem man, … bambae yumi no save fraet” (1 Jon 4:18).

Sam Aedia blong Skripja Stadi blong Yuwan

1 Jon; 2 Jon

God Hem i laet, mo God Hem i lav.

Sapos yu mas jusum wan o tu toktok blong tokbaot God ?bae yu talem wanem? Long ol leta blong Hem, plante taem Jon i yusum ol toktok ia “laet” mo “lav” (eksampol, luk long 1 Jon 1:5; 2:8–11; 3:16, 23–24; 4:7–21). Taem yu stap ridim tufala fas leta blong Jon, tingting hevi long ol eksperiens we Jon i bin gat wetem laet mo lav blong Sevya. Eksampol, tingting long wanem Jon i bin lanem aot long ol tijing blong Jisas long Jon 3:16–17; 12:35–36, 46; 15:9–14; 19:25–27. ?Yu yu luk eni semmak samting bitwin ol tijing mo wanem 1 Jon i stap tijim abaot laet mo lav blong God? ?Wanem eksperiens nao oli bin tijim yu se God i laet, mo God i lav?

1 Jon 2–4; 2 Jon

“Be taem we yumi stap lavlavem yumi, God i stap long laef blong yumi.”

Mo tu, bambae yu faenem ol toktok olsem “stap” o “stastap” we oli ripripitim truaot long ol leta blong Jon. Lukaotem ol toktok ia, speseli taem yu stap ridim 1 Jon 2–4 mo 2 Jon. Long tingting blong yu, i minim wanem blong stap, o stastap wetem God mo doktrin blong Hem 2 Jon 1:9). ?Hem i minim wanem blong stap o stastap insaed long yu?

1 Jon 2:24–3:3

Mi save kam olsem Jisas Kraes.

?Yu yu ting se, gol ia, blong kam olsem Kraes, i wan had samting long yu? Tingting long kaonsel blong Jon we i leftemap tingting: “Yes, ol pikinini blong mi. Yufala i mas joen gud long Kraes, blong bambae, taem hem i kamtru, be tingting blong yumi i stap strong. … mo bae yumi save kam olsem hem” (1 Jon 2:28; 3:2). ?Wanem nao yu save faenem long 1 Jon 2:24–3:3 we i givim tras mo kamfot long yu olsem wan disaepol blong Jisas Kraes? Taem yu stap stadi long ol leta blong Jon, lukaotem ol nara prinsipol o kaonsel we oli save helpem yu long hadwok blong yu blong kam moa olsem Kraes.

Luk tu long Moronae 7:48; Doktrin mo Ol Kavenan 88:67–68; Scott D. Whiting, “Stap Kam Olsem,” Liahona, Novemba 2020, 12–14.

1 Jon 4:12

I no gat man we i luk God samtaem.

Josef Smit Translesen, 1 Jon 4:12 i mekem i klia se “i no gat man we i luk God samtaem, be nomo olgeta we oli biliv.” (insaed long 1 Jon 4:12, futnot a; luk tu long Jon 6:46; 3 Jon 1:11). Ol skripja oli raetem abaot plante taem, taem we God Papa i bin soemaot Hemwan long ol fetful pipol, wetem Jon tu (luk long Revelesen 4; luk tu long Ol Wok 7:55–56; 1 Nifae 1:8; Doktrin mo Ol Kavenan 76:23; Josef Smit—Histri 1:16–17).

1 Jon 5

Taem mi stap praktisim fet long Jisas Kraes, mo mi bon bakegen, mi save winim wol ia.

Taem yu stap ridim 1 Jon 5, lukaotem wanem yumi mas mekem blong winim wol, mo kasem laef we i no save finis. ?Blong winim wol, i luk olsem wanem long laef blong yu? Yu save faenem ol ansa mo niu tingting tu insaed long mesej blong Elda Neil L. Andersen: “Stap Winim Wol Ia” (Jeneral Konfrens, Epril 2017, ChurchofJesusChrist.org/general-conference/conferences?lang=bis).

Jud 1

Bildimap yuwan wetem bilif blong yu we i moa tabu.

?Wanem nao Jud 1:10–19 i stap tijim abaot olgeta we oli faet agensem God mo wok blong Hem? ?Wanem nao yu yu lanem aot long ol ves 20–25 abaot wei blong kipim fet blong yu long Jisas Kraes i stap strong?

Ol Aedia blong Famli Skripja Stadi mo Haos Naet

1 Jon 2:8–11.Blong helpem famli blong yu blong i tingting hevi long ol tijing blong Jon, kam tugeta insaed long wan rum we i tudak, blong mekem se ol memba blong famli oli save gotru long wanem i defren blong stap wokbaot long tudak, mo blong stap wokbaot long laet. ?Olsem wanem nao, fasin blong no laekem man nating, i save mekem yumi stap wokbaot long tudak mo foldaon? ?Olsem wanem nao, taem yumi stap lavlavem wanwan long yumi i tekem laet i kam insaed long laef blong yumi?

1 Jon 3:21–22.?I gat wanem insaed long ol ves ia we i stap mekem se bae yumi gat moa tras bitim wanem we yumi gat, long God mo long paoa blong yumi blong kasem ol ansa long ol prea blong yumi?

Blong stap obei long ol komanmen blong God i helpem yumi blong winim wol ia.

1 Jon 5:2–3.?I gat eni komanmen we yumi tekem we i “had tumas” o i had blong folem? ?Olsem wanem lav blong yumi long God i jenisim wei we yumi filim abaot ol komanmen blong Hem?

3 Jon 1:4.?Hem i minim wanem blong wokbaot long trutok? Maet bae yu wantem tekem janis ia blong talem long ol memba blong famli olsem wanem yu bin luk olgeta oli wokbaot long trutok mo tokbaot glad ia we hemia i karem i kam long yu. Ol memba blong famli, maet bae oli glad blong raetem abaot, o droem long pepa futprint ol trutok we oli bin lanem, blong mekem se famli blong yu i save wokbaot long hem tugeta.

Jud 1:3–4.?I gat eni denja long saed blong spirit we oli bin krip i kam insaed long laef mo famli blong yu? (Jud 1:4). ?Olsem wanem yumi save folem strong toktok blong Jud blong “mas faet strong blong holem trutok ya we yumi bilif long hem finis” mo stanap agensem ol denja? (Jud 1:3). ?Wanem nao yumi mekem blong meksua se “pis i stap wetem yufala, mo bambae i lavem yufala, mo we oltaem bambae fasin ya blong hem i kam bigwan moa long laef blong yufala”? (Jud 1:2).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Where Love Is,” Children’s Songbook, 138–39.

Stap Kam Antap long Stadi blong Yuwan

Faenem lav blong God. Presiden M. Russell Ballard i tijim: “Gospel i wan gospel blong lav—lav long God mo lav long wanwan long yumi” (“God’s Love for His Children,” Ensign, May 1988, 59). Taem yu stap ridim olgeta skripja, tekem not long ol pruf we i soem lav blong God.

Wokbaot wetem Mi, i kam long Greg Olsen