“18–24 Disemba. Krismes: ‘Ol Gudnius blong Bigfala Glad,’” Kam Folem Mi—Blong Praemeri: Niu Testeman 2023 (2021)
“18–24 Disemba. Krismes,” Kam Folem Mi—Blong Praemeri: 2023
Smol Sipsip, i kam Jenedy Paige
18–24 Disemba
Krismes
“Ol Gudnius blong Bigfala Glad”
Lesen ia i wan janis blong helpem ol pikinini we yu tijim blong selebretem dei we Sevya i bon long hem, laef mo misin long Krismes taem ia. Holemtaet tingting ia long maen blong yu taem yu stap tij.
Invaetem Ol Pikinini blong Serem Wanem Oli Gat
Soem ol pikinini long aotlaen blong wik ia long Kam Folem Mi—Blong Wanwan Man, Woman, mo Famli, mo invaetem ol pikinini blong serem wanem oli save abaot Sevya.
Tijim Doktrin: Ol Smol Pikinini
Jisas Kraes i kam long wol ia olsem wan bebi.
ol pikinini oli laekem tumas stori blong taem we Jisas Kraes i bon i kam long wol ia. ?Wanem ol trutok blong doktrin we yu luk long stori ia we yu filim se ol pikinini oli mas andastanem?
Samfala Aktiviti we Yu Save Mekem
-
Ridim Luk 2:1–14 long ol pikinini, o tokbaot ol samting we i hapen long ol ves ia mo lukluk tu i go long “Japta 5:Jisas Kraes I Bon” (long Ol Niu Testeman Stori, 13–15, o vidio we i go wetem long ChurchofJesusChrist.org). Invaetem ol pikinini blong dro ol pikinini blong taem ia mo yusum ol pikinini blong talem stori ia olgetawan. ?From wanem yumi hapi se Jisas i bon i kam long wol ia?
-
Askem ol pikinini blong talem stori long yu abaot Ol Waes Man we oli stap folem sta blong faenem Jisas. Sapos yu nidim blong rimaenem olgeta bakegen long stori, luk long Matiu 2:1–12 o “Japta 7: Ol Waes Man” (long Ol Niu Testeman Stori, 18, o vidio we i go wetem long ChurchofJesusChrist.org). Haedem wan pikja blong Jisas long rum. Dro o katemaot wan pepa sta mo leftemap i go antap long ea. Invaetem ol pikinini blong mekem olsem se oli ol waes man we oli stap karem ol presen, mo lidim olgeta i go raon long rum blong faenem Jisas. Helpem ol pikinini blong tingting long sam presen we yumi save givim long Jisas.
-
Singsing long sam Krismes singsing o singsing blong ol pikinini (luk long Hymns, ol namba 201–214; Children’s Songbook, 34–54). Askem olgeta blong serem wan samting, we wanwan singsing i stap tijim we oli filim se i impoten blong save.
Getsemane, i kam long J. Kirk Richards
Jisas Kraes i mekem i posibol blong mi save laef bakegen wetem Papa long Heven wan dei.
?Ol pikinini ia we tijim, ?oli andastanem from wanem Jisas Kraes i kam long wol ia? Tekem taem blong tingting hevi long wanem we Sevya i bin mekem from yu, long yuwan, mo olsem wanem yu save helpem ol pikinini blong andastanem wanem Hem i bin mekem from olgeta.
Samfala Aktiviti we Yu Save Mekem
-
Karem wan presen bokis we oli kavremap long presen pepa, i kam long klas wetem wan pikja blong Jisas Kraes insaed long bokis ia. Hangem wan tag we i talem “Jon 3:16” we oli raetem long hem, mo talem long ol pikinini se hemia i wan givhan toktok blong talem smol wanem presen ia insaed long bokis ia. Ridim Jon 3:16 wetem ol pikinini, mo invaetem olgeta blong traem talem se wanem presen ia mo openem. ?From wanem God i sendem Pikinini blong Hem from yumi?
-
Helpem ol pikinini blong finisim sentens ia: “Jisas Kraes i kam long wol blong .” Afta, soem ol pikja we i go wetem atonmen mo sakrifaes blong Sevya, ded blong Hem mo Laef Bakegen long Ded blong Hem (luk long Gospel Art Buk, ol namba 56–59), mo talem smol abaot wanem i hapen long taem ia. Yu save singsing long wan singsing tu abaot from wanem Jisas i kam long wol ia olsem, “He Sent His Son” (Children’s Songbook, 34–35). Serem testemoni blong yu abaot Jisas Kraes mo wanem Hem i bin mekem blong yu.
Tijim Doktrin: Ol Bigfala Pikinini
Matiu 1:18–25; 2:1–12; Luk 1:26–38; 2:1–20
Jisas Kraes i kam long wol ia olsem wan bebi.
?Olsem wanem nao yu save helpem ol pikinini blong lukluk nomo long Jisas Kraes, long Krismes?
Samfala Aktiviti we Yu Save Mekem
-
Invaetem wan long ol pikinini blong rid abaot sam long ol samting we i bin hapen, we i go wetem taem we Sevya i bon i kam long wol ia (luk long Matiu 1:18–25; 2:1–12; Luk 1:26–38; 2:1–20). Askem ol narafala pikinini blong wanwan i gat janis blong stap droem ol pikja long bod, blong wanem we ol skripja ia oli stap tokbaot. ?Wanem nao ol stori ia oli tijim long yumi abaot Jisas Kraes?
-
Invaetem ol pikinini blong raet long sam pis blong pepa ol samting we oli save mekem blong helpem olgeta blong lukluk nomo long Sevya, long Krismes sisen ia. (Oli save kasem ol aedia long vidio blong “Ol Gudnius blong Bigfala Glad: The Birth of Jesus Christ” on ChurchofJesusChrist.org.) Invaetem olgeta blong serem wanem we oli bin raetem. Leftemap tingting blong olgeta blong tekem ol pis pepa ia i go long hom blong olgeta, mo mekem wanem we pepa i stap talem, wetem ol famli blong olgeta.
-
Singsing long ol singsing blong Krismes abaot Sevya (luk long Children’s Songbook, 34–54; Hymns, ol namba 201–14), mo invaetem ol pikinini blong serem wan fevret laen o sentens long ol singsing ia.
Jisas Kraes i mekem i posibol blong mi save laef bakegen wetem Papa long Heven wan dei.
?Olsem wanem nao yu save helpem ol pikinini blong stap luklukbak long wanem we oli bin lanem long yia ia mo andastanem from wanem oli nidim Jisas Kraes long laef blong olgeta?
Samfala Aktiviti we Yu Save Mekem
-
Makem wan pis blong pepa ?Huia Jisas Kraes? Mo wan narawan ?From wanem Hem i kam long wol? Mo stikim tufala long tu defren wol blong klasrum. Invaetem wanwan pikinini blong ridim wan long ol skripja ia: Matiu 16:15–16; Jon 3:16; 1 Nifae 10:4; Mosaea 3:8; Alma 7:10–13; 3 Nifae 27:14–15. Askem ol pikinini blong lukaotem ol ansa, long ol skripja we oli bin ridim, i go long tufala kwestin long wol ia. Invaetem olgeta blong raetemdaon ol ansa blong olgeta mo stikim narasaed long long stret kwestin. ?Olsem wanem yumi save talem tangkyu from wanem we Jisas Kraes i bin mekem blong yumi?
-
Invaetem ol pikinini blong mekem wan lis blong evri nem o taetol blong Jisas we oli save tingting long hem (luk long Bible Dictionary, “Christ, names of”). ?Wanem nao ol nem ia oli tijim long yumi abaot Jisas Kraes mo misin blong Hem? ?From wanem yumi nidim Jisas Kraes long laef blong yumi? Blong help blong ansarem kwestin ia, soem vidio blong “Why We Need a Savior—A Christmas Message about Our Savior Jesus Christ” (ChurchofJesusChrist.org).
Stap Leftemap Tingting blong Lanem Samting long Hom
Leftemap tingting blong ol pikinini blong faenem wan wei nomo, blong givim seves long wan narafala man o kam moa kolosap long Jisas Kraes long Krismes ia.
Kam Antap long Fasin blong Yumi blong Stap Tij
Invaetem ol pikinini blong serem wanem oli bin stap lanem. ol pikinini oli save gat bigfala paoa blong mekem gud long ol famli blong olgeta. Leftemap tingting blong ol pikinini we yu tijim blong serem wetem ol famli blong olgeta, wan samting we oli lanem long Praemeri. (Luk long Teaching in the Savior’s Way, 30.)