Nobembwa 13–19

Iakobo

“Ao Kam Na Riki Bwa Taan Toua Mwiin Ana Taeka Te Atua, Ao Tiaki Ti Taan Ongo”

Imwain warekan te kabwarabwara aei, wareka Ana Reta Iakobo ao kakauongo raoi nakon wirikiriki aika ko karekei. Tera reirei aika ko kunei aika a na kakabwaiaia ao ni karikirakeia kaain am kiraati?

Kaunga te Tibwatibwa

Tuangiia kaain te kiraati bwa a na tibwai kiibu man Iakobo aika a na kaungaia bwa aonga n riki bwa taan “toua mwiin ana taeka te Atua” (Iakobo 1:22). E aki ti kaineti nakoia, a kona naba n tibwaua te bwai ae a namakinna ae a na karaoia, n tatabemaniia nako ke n aia utu.

Reirei te Reirei

Iakobo 1:5–6

Ngkana ti titiraki n te onimaki, te Atua e na anganiia n aki ngurengureakiniia.

• Reirei aika a reiakinaki inanon Iakobo 1:5–6 e kaira Iotebwa Timiti nakon te taneiai ni bibitakin te maiu n tamnei, ao a kona ni kakabwaiaira n tatabemaniira ni kawai tabeua. Tao ko kona ni koroi titiraki aikai iaon te burakibooti ao tuangiia kaain te kiraati bwa a na karaurau n iangoi: Tera te kairoro n Iakobo 1:5–6 ae reke inanon maium? Tera ae e a tia n reireiniko ana taneiai Iotebwa Timiti ma titiraki aikai iaon ukoukoran te wanawana ibukin am titiraki? (taraa Iotebwa Timiti—Rongorongo 1:10–17). Tera taneiai aika a tia n reireiniko ae “ana koaua Iakobo [e] koaua”? (Iotebwa Timiti—Rongorongo 1:26). Tuangiia kaain te kiraati bwa a na tibwauai aia iango imwiin iangoan titiraki aikai.

• Tao a kona kaain te kiraati n taekina Iakobo 1:5–6 n oin aia taeka. A kanga bwaai aikai ni buokiia ni kaotaia raoi iaon kiibu aikai? Kam na bae n tangiria ni bootaki ni maroroakin nanon tabeua taeka aikai man kiibu aikai.

Iakobo 1:2–4; 5:7–11

Ngkana ti karaoia ma te kekeiaki, ao te Uea e na kairiira nakon te kororaoi.

• Ni moana te marooro iaon ana reirei Iakobo ibukin te taotaonakinnano inanon kiibu aikai, tuangiia kaain te kiraati bwa a na tibwauai aia taneiai ngkana a na taon nanoia ao tera ae a reiakinna man te taneiai anne. Ngkanne a kona n reiakina Iakobo 1:2–4; 5:7–11 ibukin reirei aika kaineti nakon aia taneiai. A kona naba ni kakaei reirei inanon te witeo ae Continue in Patience (ChurchofJesusChrist.org) ke n ana rongorongo Beretitenti Dieter F. Uchtdorf Continue in Patience (Riahona, Meei 2010, 56–59). A kona kaain te kiraati n tibwaua te bwai ae a reiakinna ibukin te taotaonakinnano ngkai a tia n ata Tamara are i Karawa ao te Tia Kamaiu. Tera ae e a tia ni buokiira ni karikirakea te taotaonakinnano?

Iakobo 1:3–8, 21–25; 2:14–26

“Te onimaki are akea a na mwakuri e a matebuaka.”

• Teuana te kawai ni maroroakin ana reirei Iakobo ibukin te onimaki ao mwakuri bon man tibwauakin am kiraati nakon uoua kurubu—te kurubu are teuana e na kakaea bwa buikin tera te onimaki e kainnanoa te mwakuri ao are teuana e na kakaea bwa bukin tera ara mwakuri a kainnanoa te onimaki. A kona ni karaoa aei, man warekan Mataio 7:21–23; Iakobo 1:6–8, 21–25; 2:14–26; ao Iotebwa Timiti—Rongorongo 1:19. Ngkanne a kona kurubu n tatabeua nako n tibwaua te bwai ae a kunea ao ni maroroakinna bwa bukin tera te onimaki ao te mwakuri a kainnanoaki.

  

  “Ao e onimakina te Atua Aberaam, ao e atongaki aei ba ana raoiroi (Iakobo 2:23). Abraham on the Plains of Mamre, iroun Grant Romney Clawson

• Ni buokiia kaain te kiraati n iangoa raoi te mwakoro n taeka ae ururingaki “Te onimaki e mate ngkana akea te mwakuri” (Iakobo 2:26), ko kona ni koroi tiententi aikai iaon te burakibooti: Te onimaki n akea te mwakuri ti tebo ma akea . Tuangiia kaain te kiraati bwa a na iangoi kawai aika a na kona iai ni katabwanina te tiententi, ao tuangiia bwa a na koroi aia iango iaon te burakibooti. Tera ae ti kona ni karaoia n reitanako ara onimaki iroun Iesu Kristo?

Iakobo 2:1–9

Ngkai ngaira ana reirei Iesu Kristo, ti tangiriia aomata ni kabane, n aki tabe ma aroia.

• Ni buokia ni kaungaia kaain te kiraati ni kaota a na tangira Kristo nakoia aomata ni kabane n aki tabe ma aia kangaanga ke tarakiia n rabwataia, ko kona n tuangiia kaain te kiraati temanna imwiin temanna bwa a na wareki kiibu man Iakobo 1:9–11; 2:1–9; 5:1–6. Maroroakin titiraki n aron aikai: Tera ae nanonaki “karineia aomata ma te nanonano”? (Iakobo 2:9). Bukin tera n tabetai ti karaoia ni kaokoroia naake iai aia mwane, a kakannato, ke a mwaaka ma naake akea aroia? Ti na kanga n totokoa kaokoroaia tabeman ni kaineti ma aron aia kangaanga? A kanga taan iriira te Tia Kamaiu aika kakaonimaki n riki bwa aomata aika kabanea ni kaubwai? (taraa Iakobo 2:5).

Iakobo 3

Taeka aika ti kabonganai bon iai mwakaia ni kamarakiia ke ni kakabwaiaia tabeman.

• Tamnei aika moan te mwaaka ake e kabonganai Iakobo e kona ni kauringiira ao ni kaungaira bwa ti na kabonganai taeka—n te taetae ao te koroboki—ni kaungaia tabeman. Iangoia ni kaoia kaain te kiraati bwa a na waekoa ni wareka Iakobo 3, n taratarai kabotau aika e kabonganai Iakobo ni kabwarabwara bwa a kanga taeka ni kamarakiia ke ni kakabwaiaia tabeman; a na kukurei tabeman kaain te kiraati ni koroi tamnein bwaai aika a kunei. A kanga kabotau aikai ni kamataata ana kaetieti Iakobo n te mwakoro aei? Te katooto, a kanga ara taeka n riki bwa kanga te ai? A kona kaain te kiraati n tibwauai taneiai ake e kaota te bwai are e kona n reke man te taetae. Ko kona ni kaoia kaain te kiraati n iangoia bwa a na kanga ni kabonganai ana reirei Iakobo.

Kanakoraoan Ara Anga reirei

Kaungaa te anua n iraorao. “Buokiia ni kaotaia kaain te kiraati bwa ngaiia n tatabemaniia nako a roota aroia kaain te kiraati. Kaungaiia bwa a na buokiko ni katea te tabo ae ukinako, ae tatangira, ao ni karineaki bwa aonga aomata nako n namakina te mano n tibwauai aia taneiai, aia titiraki, ao aia koaua” (Reirei n ana Kawai te Tia Kamaiu,,15).