“Nobiembre 13–19. Santiago: ‘Managtungpalkay Koma iti Sao, ket Saan Laeng a Managdengngeg,’” Umaykayo, Sumurot Kaniak—Para iti Sunday School: Baro a Tulag 2023 (2023)
“Nobiembre 13–19. Santiago,” Umaykayo, Sumurot Kaniak—Para iti Sunday School: 2023
Nobiembre 13–19
Santiago
“Managtungpalkay Koma iti Sao, ket Saan Laeng a Managdengngeg
Sakbay ti panangbasam iti daytoy a balabala, basaem ti Surat ni Santiago ket ikasom dagiti parikna a maawatmo. Ania dagiti pagbatayan a masarakam a mangbendision ken mangitandudo kadagiti miembro ti klasem?
Yawis ti Panagbibinninglay
Awisem dagiti miembro ti klase a mangibinglay kadagiti bersikulo manipud iti Santiago a mangparegta kadakuada nga agbalin a “managtungpal iti sao” (Santiago 1:22). No saan a personal unay daytoy, mabalinda nga ibinglay no ania ti mariknada a kasapulan nga aramidenda, kas indibidual wenno kas pamilia.
Isuro ti Doktrina
No agdawattayo a sipapammati, ited ti Dios a siwawaya.
-
Dagiti pagbatayan a naisuro iti Santiago 1:5–6 ti nangiturong ken ni Joseph Smith iti naespirituan a padas a namagbalbaliw iti biagna, ken dagitoy ti mabalin a mangbendison iti tunggal maysa kadatayo iti sabali a wagas. Nalabit a mabalinmo nga isurat dagiti saludsod kas iti sumaganad iti pisarra ket idawat kadagiti miembro ti klase a mangutob kadagitoy a siuulimek iti: Ania nga impluensia ti Santiago 1:5–6 nga adda iti biagmo? Ania ti padas ni Joseph Smith kadagitoy a bersikulo ti nangisuro kenka maipapan iti panagkalikagum a manggun-od iti pagsiriban maipapan kadagiti bukodmo a saludsod? (kitaen iti Joseph Smith—Pakasaritaan 1:10–17). Ania dagiti padas a nakaisuro kenka a “pudno ti pammaneknek ni Santiago”? (Joseph Smith—Pakasaritaan 1:26). Awisem dagiti miembro ti klase a mangibinglay kadagiti kapanunotanda kalpasan ti panangutobda kadagitoy a saludsod.
-
Nalabit a mabalin nga usaren dagiti miembro ti klase a maikabil ti Santiago 1:5–6 kadagiti bukodda a balikas. Kasano a makatulong daytoy iti pannakaawatda a nasaysayaat kadagitoy a bersikulo? Mabalin a kayatyo a paglilinnawagan a sangkamaysa no ania ti kaipapanan dagiti dadduma a balikas manipud kadagitoy a bersikulo.
No naanustayo nga agandur, iturongnatayto ti Apo iti kinaan-anay.
-
Tapno mairugi ti panaglilinnawag maipapan kadagiti pannursuro ni Santiago maipapan iti panagibtur kadagitoy a bersikulo, mabalinmo nga awisen dagiti miembro ti klase a mangibinglay kadagiti padas idi nasken nga aganusda ken no ania ti nasursuroda manipud iti dayta a padas. Kalpasanna mabalinda a sukisoken ti Santiago 1:2–4; 5:7–11 para kadagiti pagbatayan a mainaig kadagiti padasda. Mabalinda pay a makakita kadagiti mayaplikar a pagbatayan iti video a “Continue in Patience” (ChurchofJesusChrist.org) wenno iti mensahe ni Presidente Dieter F. Uchtdorf a “Continue in Patience” (Liahona, Mayo 2010, 56–59). Mabalin nga iburay dagiti miembro ti klase dagiti nasursuroda maipanggep iti kinaanus bayat ti panangammoda iti Nailangitan nga Ama ken ti Mangisalakan. Ania ti nakatulong kadatayo a mangpadur-as iti panaganus?
Santiago 1:3–8, 21–25; 2:14–26
“Ti pammati a di mapakuyugan kadagiti ar-aramid isu ti eppes.”
-
Maysa a wagas a pangilawlawag kadagiti pannursuro ni Santiago maipapan iti pammati ken aramid ket panangbingay iti klasem iti dua a grupo—maysa ti mangsukisok no apay nga agkasapulan ti pammati iti aramid ken ti sabali pay a grupo ti mangsukisok no apay nga agkasapulan dagiti aramidtayo iti pammati. Tapno maaramid daytoy, mabalinda a basaen ti Mateo 7:21–23; Santiago 1:6–8, 21–25; 2:14–26; ken Joseph Smith—Pakasaritaan 1:19. Kalpasanna mabalin nga ibinglay ti tunggal grupo no ania ti nasarakanda ket paglilinnawagan no apay a kasapulan ti agpada a pammati ken dagiti aramid.
“Ni Abraham pinatina ti Dios, ket naibilang kenkuana a kinalinteg” (Santiago 2:23). Ni Abraham kadagiti Tanap ti Mamre, ni Grant Romney Clawson
-
Tapno matulongan dagiti miembro ti klase a mangutob a naun-uneg dagiti nakallalagip a ragup ti balikas a “Ti pammati a di mapakuyogan kadagiti ar-aramid isu ti eppes” (Santiago 2:26), mabalinmo nga isurat iti pisarra ti sumaganad a binatog: Ti pammati a di mapakuyogan kadagiti ar-aramid ket maipada iti awan . Awisem dagiti miembro ti klase a mangpanunot kadagiti managpartuat a wagas a mangkumpleto iti binatog, ket ipasurat kadakuada dagiti kapanunotanda iti pisarra. Ania ti maaramidtayo tapno agtultuloytayo nga agtignay iti pammatitayo ken ni Jesucristo?
Kas disipulo ni Jesucristo, ayatentayo ti amin a tao, ania man dagiti kasasaadda.
-
Tapno matulongan a maparegta dagiti miembro ti klase a mangipakita iti ayat a kas ken ni Cristo iti tunggal maysa ania man ti situasion wenno akinruar a langa dagiti dadduma, mabalinmo a pagsisinnublaten dagiti miembro ti klase iti panagbasa kadagiti bersikulo manipud iti Santiago 1:9–11; 2:1–10; 5:1–6. Ilawlawag dagiti saludsod kas iti sumaganad: Ania ti kayat a sawen ti “maaddaan iti respeto kadagiti tao”? (Santiago 2:9). Apay a no dadduma tratuentayo dagiti adda kuartana, nalatak, wenno bileg a maiduma kadagiti awanan? Kasano a maliklikantayo ti panangtrato kadagiti sabali a maiduma gapu iti kasasaadda? Iti ania a wagas a dagiti napudno a pasurot ti Mangisalakan ti pudno a kabaknangan ti amin? (kitaen iti Santiago 2:5).
Adda bileg dagiti balikas nga usarentayo tapno mangpasakit wenno mangbendision kadagiti dadduma.
-
Dagiti inusar ni Santiago nga imahe ket mangipalagip ken mangguyugoy kadatayo nga agusar kadagiti balikas—agpada a maisao ken maisurat—tapno mangitag-ay kadagiti dadduma. Ibilang ti panangawis kadagiti miembro ti klase a mangbasa iti Santiago 3, a mangsapsapul kadagiti panangidilig nga inusar ni Santiago a panangiladawan no kasano a mangdangran wenno mangbendision dagiti balikas kadagiti dadduma; mabalin a maay-ayo dagiti miembro ti klase nga agdrowing kadagiti ladawan a nabirokanda. Kasano nga ipakita dagitoy a panangidilig dagiti panangiturong ni Santiago iti daytoy a kapitulo? Kas pagarigan, kasano a mayarig dagiti balikastayo iti maysa nga apuy? Nalabit a mabalin nga ibinglay dagiti miembro ti klase dagiti padasda a mangipakita ti bileg nga adda iti dayta pagsasao. Mabalinmo nga awisen dagiti miembro ti klase a mangutob no kasano a mayaplikarda ti balakad ni Santiago?
Panangpadur-as iti Panangisurotayo
Yallukoy ti naraem nga aglawlaw. Tulongam a maawatan dagiti miembro ti klasem a ti tunggal maysa kadakuada ket mangaring iti espiritu ti klase. Allukoyem ida a tulongandaka a mangipasdek iti silulukat, naayat, ken nadayaw nga aglawlaw tapno marikna ti tunggal maysa a natalgedda a mangibinglay kadagiti padas, saludsod, ken pammaneknekda” (Panangisuro iti Wagas ti Mangisalakan, 15).