Ni Melchizedek a mangmangted iti bendision ken ni Abram

Bendisionan ni Melchizedek ni Abram, ni Walter Rane Sagut ti artist

Nobiembre 6–12

Hebreo 7–13

“Nangato a Saserdote dagiti Naimbag a Bambanag nga Umayto”

Bayat ti panangbasam iti Hebreo 7–13, utobem no ania ti mensahe ti Apo para kadagiti Santo a Hebreo. Kasta met a sapulem dagiti mensahe ken dagiti tao a sursuruam.

icon iti panagbibinninglay

Yawis ti Panagbibinninglay

Sakbay ti klase, awisem ti sumagmamano a miembro ti klase nga umay a nakasagana a mangibinglay kadagti bersikulo manipud iti Hebreo 7–13 a makatulong kadakuada nga “umadani [iti Dios] a buyogan ti puso a napudno iti naan-anay a kinatalged ti pammati” (Hebreo 10:22).

icon iti panangisuro

Isuro ti Doktrina

Hebreo 7–10

Dagiti nagkauna ken kabaruanan nga ordinansa ket mangitudo ken ni Jesucristo.

• Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia isingasingna ti panangsukisok iti Hebreo 7 para kadagiti binatog a mangisuro maipanggep iti Melchizedek Priesthood ken pammaneknek ken ni Jesucristo. Awisem dagiti miembro ti klase a mangibinglay no ania ti nasarakanda. Wenno ikkam ida iti panawen iti klase a mangrebyu iti kapitulo 7 ket mangsapul kadagiti bersikulo a mangisuro iti daytoy a priesthood ken mangipaneknek iti Mangisalakan. Kasano a maipada ni Melchizedek ken ni Jesucristo? (kitaen dagiti pangawag ken ni Melchizedek kadagiti bersikulo 1–2). Kasano a makatulong kadatayo dagiti ordinansa ti Melchizedek Priesthood nga umasideg ken ni Cristo? Nalabit a mabalin a sapulen dagiti miembro ti klase dagiti posible a sungbat iti Gospel Topics, “Melchizedek Priesthood” (topics.ChurchofJesusChrist.org).

• Nupay saantayo a mangidaton kadagiti ayup nga isakripisio, makiramantayo kadagiti ordinansa ita nga, iti isu met la a wagas, mangitudo kadagiti kararuatayo ken ni Cristo ken mangted kadagiti “awtorisado a wagas a mabalin a pagayusan dagiti bendision ken bileg ti langit nga agturong iti biag ti tunggal maysa kadatayo” (David A. Bednar, “Always Retain a Remission of Your Sins,” Liahona, Mayo 2016, 60). Nalabit a mabalin nga aggigiddan a sukisokenyo no kasano a dagiti nagkauna nga ordinansa a nailadawan iti Hebreo 8–10 ti nangsimbolo iti pannubbot a sakripiso ti Mangisalakan. Kas pagarigan, ania ti ibagi ti dara dagiti toro a baka ken dagiti toro a kalding? (kitaen iti Hebreo 9:13–14). Ania ti ibagi ti kangatuan a padi? (kitaen iti Hebreo 9:24–26). Makatulong ti video a “Sacrifice and Sacrament” (ChurchofJesusChrist.org). Kasano a binendisionandatayo dagiti kabaruanan nga ordinansa ken tinulongandatayo a maiturong ken ni Jesucristo? Ania ti maaramidtayo tapno mapagbalintayo a napatpateg dagitoy nga ordinansa ken ad-adda a makapagpokustayo iti Mangisalakan?

Hebreo 10:34–38; 11

Agkasapulan ti pammati iti panagtalek kadagiti kari ti Dios.

• Tapno matulongan a maawatan dagiti miembro ti klase dagiti pannursuro ni Pablo maipapan iti pammati, mabalinmo nga irugi babaen ti panangidawat kadakuada a mangpanunot maipapan iti no kasano nga iladawanda ti pammati iti maysa a binatog. Kalpasanna, basaen ken paglilinnawagan kas maysa a klase ti panangilawlawag nga inted ni Pablo iti Hebreo 11:1. Mabalinmo a dutokan ti tunggal maysa a mangpili iti maysa kadagiti tao a nadakamat iti Hebreo 11 nga adalenda. Mabalin nga usaren dagiti miembro ti klase ti Pangiwanwan iti Nasantuan a Kasuratan (scriptures.ChurchofJesusChrist.org) a mangrebyu kadagiti padas ti tao iti Daan a Tulag, ket kalpasanna ibinglayda iti klase no ania ti masarakanda. Kasano nga impakita dagitoy a tao a nariknada ti “pammatalged dagiti banag a ninamnama”? (Patarus ni Joseph Smith, Hebreo 11:1 [iti Hebreo 11:1, footnote b]). Mabalin a mangiburay dagiti miembro ti klase kadagiti pagarigan dagiti napudno a tattao. Kaano a naaramattayo ti pammatitayo kadagiti kari a saan pay a naipatungpal?

• Ti balakad kadagiti Santo a Hebreo a nasulisog nga “agsanud” manipud iti pammatida ket mabalin a napateg kadagiti miembro ti klase a mabalin a mangikarkarigatan kadagiti pammaneknekda. Makatulong pay daytoy kadagiti mayat a tumulong kadagiti ay-ayatenda iti biag nga addaan parikut iti pammati. Tapno maammuan daytoy a balakad, mabalin a basaen dagiti miembro ti klase ti Hebreo 10:34–38 ken ti palawag ni Elder Jeffrey R. Holland iti “Dagiti Nainayon a Resources.” Apay a masulisogtayo no dadduma a pukawentayo ti panagtalektayo (kitaen iti Hebreo 10:35) iti Apo ken iti ebangheliona? Ania ti maaramidtayo a mangpaadda ken mangpatalinaed iti pammati ken panagtalektayo nga “umawat iti kari [ti Dios]”? (Hebreo 10:36). Dagiti video a “Good Things to Come” ken “An High Priest of Good Things to Come” (ChurchofJesusChrist.org) ket makanayon iti panaglilinnawag.

resources icon

Dagiti Nainayon a Resources

“Dikay ngarud pukawen ti pananginanamayo.”

Kas naibasar iti Hebreo 10:32–39, insuro ni Elder Jeffrey R. Holland:

“Awan duadua a narigat daytoy—sakbay a kumappengka iti Simbaan, bayat ti panangpadasmo a kumappeng, ken kalpasan a kimmappengkan. Dayta ti wagas a kanayon a kastan, kuna ni Pablo, ngem saanka nga agsanud. Saanka nga agbuteng ken agbabawi. Saanka a mapukawan iti namnama. Saanmo a lipaten no kasano ti naminsan a panagriknam. Saanka nga agduadua iti padas nga adda kenka. …

“Addaan iti ania man a dakkel a pangngeddeng dagiti pammallaag ken konsiderasion nga aramiden, ngem no adda sungbat dagiti kararag, agannad iti sulisog nga agsanud manipud iti dayta nasayaat a banag. Umisu daytoy no inkararagam maipapan iti daytoy ken nagtalekka iti daytoy ket nagbiagka para iti daytoy, umisu daytoy ita. Saanka a sumuko no umadu ti pammilit. … Sanguem dagiti panagduaduam. Parmekem dagiti butengmo. “Dikay ngarud pukawen ti pananginanamayo.” Agtalinaedkayo iti dalan ket kitaenyo ti kinapintas ti biag a naipalgak kadakayo” (Cast Not Away Therefore Your Confidence,”,” Ensign, Mar. 2000, 8–9).

Panangpadur-as iti Panangisurotayo

Agibasar nga umuna kadagiti nasantuan a kasuratan. Dagiti nasantuan a kasuratan koma ti kangrunaan a pagadawan para iti panagadalmo ken panagsaganam. Dagiti balikas dagiti kabaruanan a propeta ti mangan-anay kadagiti pagrukodan a libro dagiti nasantuan a kasuratan iti simbaan (kitaen iti Panangisuro iti Wagas ti Mangisalakan, 17).