Ni Jesucristo nga agikaskasaba iti ebanghelio iti lubong ti espiritu

Ni Cristo nga Agikaskasaba iti Lubong dagiti Espiritu, ni Robert T. Barrett

Nobiembre 20–26

1 ken 2 Pedro

“Agrag-okayo iti Di Mayebkas a Rag-o ken Napno iti Dayag”

Laglagipem a ti panggepmo ket mangisuro kadagiti tao, saan laeng a mangidatag iti maysa nga adalen. Bayat ti panangbasam kadagiti Surat ni Pedro, panunotem ti tunggal maysa a miembro ti klase. Ania dagiti pagbatayan a mangtulongto kadakuada a mangpapigsa iti pammatida?

icon iti panagbibinninglay

Yawis ti Panagbibinninglay

Isurat dagiti paulo 1 Pedro ken 2 Pedro iti pisarra. Ikkam dagiti miembro ti klase iti gundaway a mangrebyu kadagitoy a surat, ket awisem ida a mangisurat iti baba dagitoy a paulo kadagiti balikas wenno ragup ti balikas a masarakanda a napateg. Kalpasanna usarem dagiti listaan a mangawis kadagiti tao a mangibinglay kadagiti nalawag a pannakaammo ken pannakaawatda [insights].

icon iti panangisuro

Isuro ti Doktrina

1 Pedro 1:3–9; 2:19–24; 3:14–17; 4:12–19

Adda masarakak a rag-o kadagiti panawen ti pannubok ken panagsagaba.

• Sabali pay a wagas a mangrebyu iti balakad ni Pedro iti 1 Pedro 1:3–9; 2:19–24; 3:14–17; ken 4:12–19 ket ti panangawis kadagiti miembro ti klase a mangpanunot maipapan iti maysa a tao nga am-ammoda nga agpaspasar iti maysa a pannubok. Mangted kadakuada iti oras iti klase nga agsurat iti dayta a tao, nga iraman dagiti kinapudno manipud kadagitoy a bersikulo a mangallukoy iti dayta a tao (kitaen met iti Doktrina ken Katulagan 121:1–8; 123:17). Kalpasanna mabalin nga isarita dagiti miembro ti klase maipapan kadagiti kinapudno a pinilida.

1 Pedro 1:13–20; 2:1–12

Naawagantayo nga agbalin a “tattao ti Dios.”

• Dagiti pannursuro ni Pedro iti 1 Pedro 1:13–20 ken 2:1–12 ket mabalin a makaparegta a pammalagip no kasano ti panangibilang ti Apo kadatayo—a tattaona—ken no ania ti namnamaenna kadatayo. Nalabit a mabalinmo nga awisen dagiti miembro ti klase a mangsukisok kadagitoy a bersikulo a mangsapsapul kadagiti panangiladawan ti kaipapanan ti agbalin a “tatttao ti Dios” (1 Pedro 2:10) ket kalpasanna paglilinnawaganda no ania ti masarakanda. Mabalin a kayatmo nga ilawlawag a ti balikas a “naidumduma” iti 1 Pedro 2:9 kayatna a sawen ti “nagatang” wenno “nataginayon” (kitaen iti footnote f). Ania ti isuro daytoy kadatayo maipapan iti wagas a marikna ti Dios maipapan kadatayo ken no kasano ti kayatna a panagbiagtayo?

1 Pedro 3:18–20; 4:6

Maikasaba ti ebanghelio kadagiti natay tapno nalinteg ti pannakaukomda.

• Naglaon ti Umuna a Surat ni Pedro iti maysa kadagiti sumagmamano a reperensia iti Biblia iti isasarungkar ni Jesucristo iti lubong dagiti espiritu kalpasan ti ipapatayna—maysa a pasamak a makatulong kadatayo makaawat a naan-anay iti dayta a kabaruanan a paltiing. Tapno matulongan dagiti miembro ti klase a mangpauneg iti pannakaawatda maipapan iti lubong dagiti espiritu, mabalinmo nga awisen ida a mangbasa kadagiti sumaganad a nasantuan a kasuratan ket mangisuratda iti pisarra no ania ti nasursuroda: Juan 5:25; 1 Pedro 3:18–20; 4:6; Alma 40:7–14, 21; Doktrina ken Katulagan 138:11–32 (kitaen met iti “Dagiti Nainayon a Resources.”) Apay a napateg a maammuantayo maipapan iti isasarungkar ti Mangisalakan iti lubong dagiti espiritu? Kasano a mangapekto daytoy a pannakaammo iti wagas a pakariknaantayo maipapan iti Dios ken iti planona iti pannakaisalakan?

1 Pedro 1:1–11

Babaen ti bileg ni Jesucristo, mapadur-astayo dagiti nadiosan a kababalintayo.

• Tapno maparegta dagiti sursuruam kadagiti panagkagumaanda nga agbalin nga ad-adda pay a kas ken ni Jesucristo, mabalinmo nga awisen ida a mangilasin kadagiti kababalin a kas ken ni Cristo a nailadawan iti 2 Pedro 1:1–11. Ibilang ti panangisurat kadagitoy a kababalin iti pisarra ken panangkiddaw kadagiti miembro ti klase a mangilawlawag iti kaipapananda. Kalpasanna mabalin a paglilinnawagan dagiti miembro ti klase no kasano a ti panangpadur-as iti maysa a kababalin ket agbanag iti panangpadur-as iti dadduma pay a kababalin. Mangted iti oras kadakuada a mangutob no ania a kababalin ti kayatda a padur-asen a naan-anay.

ti narikut ti pannakalagana a tapiseria

Tunggal kababalin a kas ken ni Cristo a padur-asentayo ket tulongannatayo a mangabel iti maysa a naespirituan a tapiseria ti kinadisipulo.

resources icon

Dagiti Nainayon a Resources

Ti aramid iti panangsubbot kadagiti natay ket mangipaneknek iti mision ni Cristo.

Insuro ni Elder D. Todd Christofferson:

“Ania ti pagtungpalan ti saan a mabilang a binilion a nagbiag ken natay nga awanan iti pannakaammo maipapan ken ni Jesus? Iti Pannakaisubli ti ebanghelio ni Jesucristo dimtengen ti pannakaawat iti no kasano a masubbot ti saan pay a nabuniagan a natay ken no kasano a makapagbalin ti Dios a “naan-anay, nalinteg a Dios, ken naasi pay a Dios’ [Alma 42:15].

“Kabayatan iti biag, impadto ni Jesus a mangasabanto pay kadagiti natay [kitaen iti Juan 5:25]. Insarita kadatayo ni Pedro daytoy a napasamak iti nagbaetan ti Pannakailansa iti Krus ken Panagungar ti Mangisalakan [kitaen iti 1 Pedro 3:18–19]. Nasaksian ni Presidente Joseph F. Smith iti parmata a sinarungkaran ti Mangisalakan ti lubong dagiti espiritu [kitaen iti Doktrina ken Katulagan 138:30, 33]. …

“Ti pakaseknantayo a mangsubbot kadagiti natay, ken ti panawen ken dagiti pamataudan nga ipaaytayo iti dayta a panagkumit, ket, kangrunaan ti amin, maysa a panangipeksa iti panagsaksitayo maipanggep ken ni Jesucristo. Mangparnuay daytoy iti kas kabileg a palawag a mayebkastayo maipanggep iti nadiosan a kababalin ken misionna. Daytoy ti mangipaneknek, umuna, maipapan iti Panagungar ni Cristo; maikadua, maipapan iti awan patinggana a pannakagun-od iti Pannubbotna; maikatlo, nga Isu ti kakaisuna a paggapuan ti pannakaisalakan; maikapat, nga Isu ti nangipasdek kadagiti kondision para iti pannakaisalakan; ken, maikalima, nga umayto manen Isuna” (“The Redemption of the Dead and the Testimony of Jesus,” Ensign, Nob. 2000, 9–10).”

Panangpadur-as iti Panangisurotayo

Isuro ti “apay.” No dadduma masdaaw dagiti agad-adal—nangruna dagiti agtutubo—no kasano nga adda pakainaigan kadakuada dagiti pagbatayan ti ebanghelio wenno no apay a nasken nga agtungpalda kadagiti masinunuo a bilin. Nupay kasta, no maawatanda ti agnanayon a plano ti Nailangitan nga Ama para iti pagragsakan dagiti annakna, dagiti gapu para kadagiti pagbatayan ti ebanghelio ken bilin ket agbalin a nalawlawag ken ad-adda a maguyugoyda nga agtulnog” (Panangisuro iti Wagas ti Mangisalakan, 20).