Balsamo ni Galaad, ni Annie Henrie

Oktubre 30–Nobiembre 5

Hebreo 1–6

Ni Jesucristo, “ti Akin-aramid iti Agnanayon a Pannakaisalakan”

Ibilang ti panangibinglay kadagiti miembro ti klasem ti sumagmamano nga impresion nga awatem manipud iti Espiritu Santo maipapan iti Hebreo 1–6. Ti panangaramid iti daytoy ti mangparegta kadakuada nga agsapul iti bukodda nga impresion bayat ti panagadalda kadagiti nasantuan a kasuratan.

Yawis ti Panagbibinninglay

Sumagmamano a miembro ti klase a masansan a di mangibinglay iti klase ket mabalin nga agkasapulan iti masinunuo nga awis ken bassit a panawen nga agsagana. Mabalinmo a kasarita ti sumagmamano kadakuada iti maysa wenno dua nga aldaw a nasapsapa ket kiddawem kadakuada nga umay a nakasagana a mangibinglay iti maysa a bersikulo manipud iti Hebreo 1–6 a napateg kadakuada.

Isuro ti Doktrina

Hebreo 1–5

Ni Jesucristo, “ti akin-aramid iti agnanayon a pannakaisalakan.”

• Kasano a maallukoymo dagiti miembro ti klase nga ibinglayda dagiti napapateg a nasantuan a kasuratan maipapan ken ni Jesucristo a nasarakanda iti bukod ken sangapamiliaan a panagadalda itoy a lawas? Ibilang ti panangaramid iti lima a kolum iti pisarra, maysa iti tunggal maysa kadagiti umuna a lima a kapitulo iti Hebreo. Mangawis kadagiti miembro ti klase nga isuratda kadagiti maikanatad a kolum dagiti ragup ti balikas [phrases] manipud kadagitoy a kapitulo a nangisuro kadakuada ti maipapan ken ni Jesucristo ken ti numero ti bersikulo a pakasarakan iti tunggal ragup ti balikas. Kasano a ti pannakaammo kadagitoy a banag maipapan iti Mangisalakan ket mangapekto iti pammatitayo Kenkuana ken ti kinatallugodtayo a sumurot Kenkuana?

Hebreo 2:9–18; 4:12–16; 5:7–8

Sinagaba ni Jesucristo ti amin a banag tapno maawatan ken matulongannatayo no agsagsagabatayo.

• Ti Hebreo 2:9–18; 4:12–16; 5:7–8 ket makatulong kadagiti tao a makaimatang iti panagsagaba iti lubong ken mangpampanunot no mapaliiw wenno mangisakit met laeng ti Dios. Nalabit a mabalin a sukisoken dagiti miembro ti klase dagitoy a bersikulo a mangsapul kadagiti kinapudno a makatulong iti kakasta a saludsod. Ania ti isuro dagitoy a bersikulo maipapan iti no kasano nga agresponde ti Mangisalakan iti panagsagaba ti sangkataw-an? Mabalin pay a makatulong ti mangawis kadagiti miembro ti klase a mangibinglay kadagiti pagwadan manipud iti nasantuan a kasuratan iti panangtulong ken panangliwliwa ni Jesucristo kadagiti tao iti panagsagabada (kitaen iti “Dagiti Nainayon a Resources”) wenno ipabuya ti video a “Mountains to Climb” (ChurchofJesusChrist.org). Mabalin a paglilinnawagan dagiti miembro ti klase no ania ti masursuroda maipapan iti no kasano a matulongannatayo ti Mangisalakan no maipasangotayo kadagiti narigat a pannubok.

Hebreo 3:7–4:2

Sidadaan a magun-od dagiti bendision ti Dios kadagiti “saan a mangpatangken iti puspuso[da].”

• Ti Hebreo 3 ken 4 naglaon iti pakaasi kadagiti Santo a saanda a patangkenen ti puspusoda a makaigapu a dida maawat dagiti bendision a kayat ti Dios nga ited kadakuada. Bayat ti panangbasam ken ti klasem iti Hebreo 3:7–4:2; paglilinnawagan dagiti wagas a pakayaplikaran kadatayo ita dagiti padas dagiti nagkauna nga Israelita, kas iti pannakayaplikarda kadagiti Hebreo iti nagkauna a Simbaan (kitaen iti material nga adalen maipapan kadagitoy a bersikulo iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Kasano a mapagtalinaedtayo dagiti pusotayo a nalukneng ken natudio iti pagayatan ti Apo? (kitaen iti Dagiti Proverbio 3:5–6; Alma 5:14–15; Ether 4:15). Mabalin nga ibinglay dagiti miembro ti klase no kasano a nabendisionanda wenno ti dadduma nga am-ammoda gapu ta addaanda iti nalukneng ken sibababawi a puso.

Hebreo 5:1–5

Nasken nga awagan ti Dios dagiti agserbi iti pagarian ti Dios.

• Ti mensahe iti Hebreo 5 maipapan kadagiti priesthood holder nga inawagan ti Dios ket maipaay iti amin a natudingan babaen iti awtoridad ti priesthood nga agserbi kadagiti nadumaduma a takem iti Simbaan. Tapno matulongan ti klasem a makasursuro no ania ti kaipapanan ti “awagan ti Dios kas ken ni Aaron,” ibilangmo ti panangawis kadakuada a mangrebyu iti pakaammuan ni Aaron nga umaw-awat iti takemna [calling] iti Exodo 4:10–16, 27–31; 28:1. Ania dagiti nauneg a pannakaammo ken pannakaawat manipud iti daytoy a pakaammuan a makatulong kadatayo a makaawat iti Hebreo 5:1–5? Mabalin nga ibinglay dagiti miembro ti klase no kasano a naawatda ti pammatalged a ti maysa a tao ket inawagan ti Dios tapno matungpalna ti maysa a takem —nalabit a karamanda pay. Kasano a nakatulong kadakuada ti pammatalged a nasaysayaat a mangkanunong iti maysa a tao iti akemna [calling]?

“Ket awan koma ti mangakem itoy a dayaw no di ti inayaban ti Dios, a kas ti pannakaayab ni Aaron” (Hebreo 5:4). Awagan ni Moises ni Aaron iti Panagserbi, ni Harry Anderson

Dagiti Nainayon a Resources 

Pagarigan iti nasantuan a kasuratan dagiti tao a liniwliwa ni Jesucristo.

• Juan 8:1–11: Liniwliwa ti Apo ti babai a nakabasol iti pannakiabig.

• Juan 11:1–46: Liniwliwa ti Apo da Maria ken Marta kalpasan ti ipapatay ti kabsatda, ni Lazaro.

• Enos 1:4–6: Pinakawan ti Apo dagiti basol ni Enos ket inikkatna ti basolna.

• Mosiah 21:5–15: Pinalukneng ti Apo ti puspuso dagiti Lamanite tapno palag-anenda ti dagensen dagiti tao ni Limhi.

• Mosiah 24:14–15: Pinapigsa ti Apo dagiti tao ni Alma tapno mabaelda dagiti awitda.

• Ether 12:23–29; Liniwliwa dagiti balikas ti Apo ni Moroni.

• 3 Nephi 17:6–7: Inagasan ti Mangisalakan dagiti Nephite kadagiti saksakitda.

• Doktrina ken Katulagan 121:7–10: Liniwliwa ti Apo ni Joseph Smith (kitaen met iti Doktrina ken Katulagan 123:17).

Panangpadur-as iti Panangisurotayo

Mangparnuay iti naespirituan nga aglawlaw. No mayallukoymo ti natalna, naayat nga aglawlaw iti siled ti klasem, ad-adda a nalaka a masagid ti Espiritu ti puspuso dagiti sursuruam. Ania ti maaramidmo tapno maawis ti impluensia ti Espiritu iti siled ti klasem? Mabalinmo kadi nga uliten nga urnosen dagiti tugaw wenno agusar kadagiti ladawan wenno musika a mangawis iti Espiritu? (Kitaen iti Panangisuro iti Wagas ti Mangisalakan, 15.)