Ni Jesucristo nga umis-isem bayat ti pannakitugawna kadagiti umis-isem nga ubbing

Naan-anay nga Ayat, ni Del Parson

Nobiembre 27–Disiembre 3

1–3 Juan; Judas

“Ti Dios Isu ti Ayat”

Ania dagiti tema ken pagbatayan a kasla napateg kenka bayat ti panangbasam iti 1–3 Juan ken Judas? Kasano a mausarmo dagitoy a pangtulong kadagiti miembro ti klasem?

icon iti panagbibinninglay

Yawis ti Panagbibinninglay

Awisem ti sumagmamano a miembro ti klase a mangibinglay kadagiti tema wenno masinunuo a kinapudno a napateg kadakuada bayat ti panagadalda kadagiti Surat da Juan ken Judas. Ania dagiti mensahe manipud kadagitoy a surat ti kangrunaan nga adda pakainaiganda kadakuada ken dagiti pamiliada?

icon iti panangisuro

Isuro ti Doktrina

1 Juan 1:5–10; 2:3–11; 3:1–3; 4:7–21; 5:1–3

Ti Nailangitan nga Ama ken ni Jesucristo ket naan-anay a pagwadan ti lawag ken ayat.

• Kasano a matulongam dagiti sursuruam a mangilasin iti lawag ken ayat ti Dios iti biagda? Mabalinmo a rugian babaen ti panangisurat kadagiti balikas a lawag ken ayat iti pisarra. Idawatmo kadagiti miembro ti klase nga ibinglayda dagiti dadduma a balikas nga umay iti panunotda no panunotenda maipapan kadagitoy dua a balikas. Mabalin nga adalen ti tunggal miembro ti klase ti maysa kadagiti sumaganad a binatog iti nasantuan a kasuratan a mangsapsapul iti maysa a banag nga isursuro dagiti bersikulo maipanggep iti lawag wenno ayat: 1 Juan 1:5–10; 2:3–11; 3:1–3; 4:7–12; 4:16–21; 5:1–3. Awisem ti sumagmamano kadakuada a mangibinglay iti klase no ania ti nasarakanda. Mabalinmo pay nga awisen dagiti miembro ti klase a mangibinglay kadagiti padas idi nariknada ti lawag ken ayat ti Dios.

• Mabalinmo nga awisen dagiti miembro ti klase a kumitada iti silaw iti bobeda (kisame) wenno ti lawag nga agsarut iti tawa ket ibinglayda no ania ti ammoda maipapan iti pisikal a lawag. Kasano a maipada ti pisikal a lawag iti naespirituan a lawag? Mabalin nga adalen dagiti miembro ti klase dagiti sumaganad tapno mangsapul kadagiti dadduma pay a nalawag a pannakaammo ken pannakaawat iti no kasano nga ipaay ti Dios ken ti Anakna ti lawag iti biagtayo: Dagiti Salmo 27:1; Juan 1:4–5; 1 Juan 1:5–7; 3 Nephi 11:11; Doktrina ken Katulagan 88:6–13; ken maysa a himno a maipanggep iti lawag, kas iti “The Lord Is My Light” (Hymns, no. 89). Mabalin pay nga ibinglay dagiti miembro ti klase dagiti padasda iti panangsapul ken panangawat ti naespirituan a lawag iti biagda.

1 Juan 2:18–23, 26–28; 4:3; 2 Juan 1:7–11; 3 Juan 1:9–11; Judas

Masapul nga “[agtalinaedtayo] iti doktrina ni Cristo.”

• Dagiti pannursuro da Juan ken Judas maipapan iti ikakalilis iti kinapudno wenno apostasia ket makatulong kadagiti miembro ti klase a mangibilang no kasano a pagtalinaedenda a napigsa ti pammatida ken ni Jesucristo. Ibilangmo ti panangawis iti kagudua ti klase nga agsukisok kadagiti panangiladawan maipapan kadagiti palso a pannursuro wenno ikakalilis iti kinapudno iti 1 Juan 2:18–23, 26–28; 4:3; 2 Juan 1:7–11; 3 Juan 1:9–11 ken ti sabali pay a kagudua ti klase nga agsukisok kadagiti kasta a panangiladawan iti Judas. Wenno mabalinmo a sapulen dagiti sungbat kadagiti saludsod kas kadagitoy: Kasano nga ilawlawag da Juan ken Judas maipapan iti anti-Cristo? (kitaen met iti Pangiwanwan iti Nasantuan a Kasuratan, “Anticristo,” scriptures.ChurchofJesusChrist.org). Adda kadi ania man kadagitoy a bersikulo a kasla mayaplikar kadagiti karit a sanguentayo iti agdama? Ania ti kaipapanan ti “[agtalinaed] iti doktrina ni Cristo”? (2 Juan 1:9).

• Aramaten ni Judas ti makaay-ayo nga imahe a pangiladawan kadagiti palso a pannursuro, wenno dagiti “agsao iti dakes maipapan kadagiti banag a dida ammo” (Judas 1:10). Mabalin nga awisem ti sumagmamano a miembro ti klase nga agdrowing iti pisarra iti sumagmamano kadagiti imahe a nailadawan iti Judas 1:12–13 idinto a pugtuan dagiti dadduma pay a miembro ti klase no ania a ragup ti balikas ti idrowdrowing ti tao. Kasano nga ibagi dagitoy nga imahe dagiti palso a mannursuro ken anti-Cristo? Kas pagarigan, kasano nga agparnuay dagiti makadadael a kannawidan iti “batbato a nailemmeng iti pagdadayaan[tayo] iti ayat”? Ania ti maaramidtayo tapno mapatibkertayo ti bagbagitayo a maibusor kadagiti “manguy-uyaw”? (kitaen iti Judas 1:18–21). Apay a mabalin nga insingasing ni Judas a “kaasian[tayo]” (Judas 1:22) dagiti manguyaw iti ebanghelio?

babai a mangtultulong iti ubing nga agbasa iti nasantuan a kasuratan

“Awan ti dakdakel a pagrag-oak ngem iti pannakangngegko a dagiti annakko magmagnada iti kinapudno” (3 Juan 1:4).

3 Juan 1:1–4

Umay ti rag-o no tulongantayo dagiti dadduma a “magna iti kinapudno.”

• Nalabit nga adda dagiti tao iti klasem a mabalin a mangisarita no ania ti panagrikna ni Juan idi kinunana a “naaddaan iti awan ti dakdakkel a panagrag-ona” no di ti pannakangngegna a ni Gayo (maysa kadagiti “annakna”) ket magmagna iti kinapudno. Mabalin a mangted pagimbagan kadagiti miembro ti klase manipud iti pannakangngegda iti padas ti tunggal maysa. Mabalinmo nga irugi babaen ti aggigiddan a panangbasa iti 3 Juan 1:1–4 ken dagiti nasantuan a kasuratan iti “Dagiti Nainayon a Resources.” Ania ti isuro kadatayo dagitoy nasantuan a kasuratan maipapan iti pagtaudan ti pudno a rag-o? Mabalin nga isarita dagiti miembro ti klase maipapan no kasano ti nariknada kas nagannak, kas misionario, kas lider ti Simbaan, wenno mannursuro idi ammoda a dagiti tao a sinuruanda ket magmagna iti kinapudno. Mabalinmo a kasarita ti sumagmamano a miembro ti klase sakbay ti klase ket kiddawem kadakuada a mangitugot iti ladawan dagiti tao a tinulonganda a mayasideg ken ni Cristo ket isaritada maipapan kadagiti padasda.

resources icon

Dagiti Nainayon a Resources 

Ti nasantuan a kasuratan maipapan iti panangtulong kadagiti dadduma a magna iti kinapudno.

• Deuteronomio 6:6–7

• Dagiti Proverbio 22:6

• Juan 4:36

• 1 Taga Tesalonica 3:9

• Mosiah 4:14–15

• Alma 17:1–2; 26:11–37

• Doktrina ken Katulagan 18:10–16; 50:22

Panangpadur-as iti Panangisurotayo

Ikararagam dagiti miembro ti klasem. Kas iti panangikararagan ti Mangisalakan ken ni Pedro (kitaen iti Lucas 22:32), nasken nga ikararagam babaen iti nagan dagiti sursuruam, nga agkalkalikagum a makaawat kadagiti masinunuo a kasapulanda. No aramiden daytoy, ti Nailangitan nga Ama ket “mangisagana iti puspusoda” (Alma 16:16) ken makatulong kenka a mangammo no ania ti isurom tapno maipaay dagiti kasapulanda (kitaen iti Panangisuro iti Wagas ti Mangisalakan, 6).