Ti Siudad nga Agnanayon, ni Keith Larson

Disiembre 25–31

Apocalipsis 15–22

“Ti Agballigi Tawidennanto Amin Dagitoy a Bambanag”

Ania ti isuro kadakayo ti dangadang iti nagbaetan ti naimbag ken dakes a nailadawan iti Apocalipsis maipapan iti kinapateg ti panangsurot ken ni Cristo ditoy daga? Kalpasan ti panangutob iti daytoy a pagbatayan, ibilangmo ti kasapulan dagiti miembro ti klasem. Ania dagiti kinapudno manipud iti Apocalipsis a makatulong kenka nga agaramid kadagiti nalinteg a pili?

Yawis ti Panagbibinninglay

Bayat ti yaasideg ti gibus ti panagadal dagiti miembro ti klase iti Baro a Tulag, allukoyem ida a mangibinglay kadagiti kapanunotanda maipapan iti Baro a Tulag. Awisem ida a mangibinglay no kasano a ti panagadalda iti nasantuan a kasuratan ket nakatulong kadakuada a nangam-ammo a nasaysayaat ken ni Jesucristo ken ad-adda a nagbalinda a kas Kenkuana.

Isuro ti Doktrina

Apocalipsis 17–18

Nasken nga ilasintayo ti bagbagitayo manipud iti kinadangkes ti lubong.

• Saan a makaay-ayo a basaen ti maipapan iti kinadangkes ken ti pannakatnag ti Babilonia iti Apocalipsis 17–18, ngem makatulong daytoy gapu ta ti Babilonia ket mabalin a maysa a simbolo ti nadangkes a lubong a pagindegantayo iti agdama. Mabalinmo a bingayen dagitoy a kapitulo kadagiti miembro ti klase ket idawatmo kadakuada nga agsapul iti sungbat kadagiti saludsod kas kadagitoy: Apay a nayasideg dagiti tao iti Babilonia, wenno iti kinailubongan? Apay a napeggad ti Babilonia? Anianto ti mapasamak iti Babilonia? Ania dagiti ballaag nga inted ni Juan a makatulong kadatayo a mangliklik iti gasat ti Babilonia?

• Kalpasan ti panangbasa iti Apocalipsis 18:4, mabalin a paglilinnawagan dagiti miembro ti klase no kasano a mabalin a “rummuarda” iti Babilonia ken “di mairaman kadagiti basbasolna.” Mabalinda nga ibinglay dagiti nasantuan a kasuratan wenno mensahe manipud kadagiti lider ti Simbaan a nangtulong kadakuada a nangsupring kadagiti sulisog ti Babilonia, wenno ti lubong. Ibilang ti panangbuya iti video a “Dare to Stand Alone” (ChurchofJesusChrist.org)” wenno ti panangbasa iti palawag ni Elder Quentin L. Cook iti “Dagiti Nainayon a Resources.” Mabalin nga ibinglay dagiti kapanunotan dagiti miembro ti klase maipapan iti no kasano a yaplikar ti dua a pagbatayan a dinakamat ni Elder Cook. Iti ania a kaipapanan a mabalintayo a “rummuar” iti Babilonia? (kitaen, kas pagarigan, iti Isaias 52:11; Doktrina ken Katulagan 25:10). Ania ti maaramidtayo a mangallukoy kadagiti dadduma a mangaramid iti kasta met laeng?

Apocalipsis 19–20

Makapagsaganatayo para iti Maikadua a Yaay ti Apo ken ti Aldaw ti Panangukom.

• Ti Maikadua a Yaay ni Jesucristo ket masansan a maawagan iti “ti dakkel ken nakakigkigtot nga aldaw ni Jehova” (Joel 2:31), ken maibatay iti Apocalipsis 19–20, a kasla nasayaat a maysa a panangiladawan. Ibilang ti panagisurat iti pisarra ti sumagmamano a pasamak a nailadawan iti Apocalipsis 19:5–20:15. Awisem dagiti miembro ti klase a mangsarak kadagiti bersikulo a mangiladawan kadagitoy a pasamak. Apay a maawagan iti dakkel ken nakakigkigtot dagitoy a pasamak? Ania ti masursurotayo manipud kadagitoy a bersikulo maipapan iti Mangisalakan ken dagiti sumurot Kenkuana? Ania ti maaramidtayo itan tapno maibilangtayo kadagiti agragragsakto iti panawen ti yaayna?

• Tapno maparegta ti panaglilinnawag maipapan iti libro ti biag ken ti maudi a panangukom, mabalinmo nga awisen dagiti miembro ti klase a mangaramid iti maysa a simple a libro babaen ti panangkulpi iti maysa a panid ti papel iti agkapat. Mabalinda a basaen ti Apocalipsis 20:12–15; 2 Nephi 9:14; 29:11 ken utobenda no ania ti kayatda nga isurat maipapan kadakuada iti libro ti biag. Awisem ida nga isuratda dagitoy iti libroda, ken awisem dagiti sumagmamano a miembro ti klase a mangibinglay iti maysa a banag nga insuratda. Ania dagiti pili a mabalin nga aramidentayo itan tapno dagitoy a banag ket maisuratdanto iti libro ti biag? Tapno matulongan dagiti miembro ti klase a saan a maupay iti bukodda nga espiritual a panagdur-as, ibilang ti panangiburaymo ti balakad ni Elder Jeffrey R. Holland iti mensahena iti “Be Ye Therefore Perfect—Eventually” (Liahona, Nob. 2017, 40–42).

Ti Maudi a Panangukom, ni John Scott

Apocalipsis 21:1–22:5

No napudnotayo, mabendisionantayto iti celestial a gloria.

• Nupay naipadto dagiti maudi nga aldaw a mapnonto iti kinadangkes ken pagpeggadan, ti gunggona a nakita ni Juan para kadagiti napudno ket dakdakkel nga amang ngem iti panagtutuok a sumangbay kasakbayan daytoy. Tapno matulongan dagiti miembro ti klase a mangsukisok iti daytoy napintas a panggibus iti Apocalipsis, mabalinmo nga awisen ida a mangrebyu iti Apocalipsis 21:1–22:5, a mangsapsapul kadagiti ragup ti balikas a mangparegta kadakuada nga agkagumaan para iti celestial a gloria. Ania dagiti kari a maaramid kadagiti napudno? Kasano ti panangtulong kadatayo daytoy a panangiladawan no maipasangotayo kadagiti agdama a karit ken pannubok?

Dagiti Nainayon a Resources

Panagpili iti kinalinteg a maibusor iti kinadangkes ti Babilonia.

Insuro ni Elder Quentin L. Cook:

“Ditayo maliklikan dagiti nailubongan nga impluensia. Saan a sungbat ti maysa a naiputputong a panagbiag. Iti nasayaat a kaipapanan, ti tulongtayo iti lubong ket saan a paset ti karittayo ken kasapulan no nasken a padur-asentayo dagiti talentotayo. …

… Nasken a mairaman dagiti miembro ti Simbaan iti lubong iti maysa a positibo a wagas. Kasano ngarud a matimbengtayo ti panagkasapulan iti positibo a panangtulong iti lubong ken saantayo nga agtulnog kadagiti basol ti lubong? [Kitaen iti Doktrina Ken Katulagan 25:10; 59:9.] Dua a pagbatayan ti mangaramidto iti napateg a pagdumaan.

1. Ipakaammom kadagiti tao a maysaka a nagkumit a Santo iti Ud-udina nga Aldaw. …

2. Agbalinka a managtalek ken agbiagka kadagiti pammatim” (“Lessons from the Old Testament: In the World but Not of the World,” Ensign, Peb. 2006, 54–55).

Panangpadur-as iti Panangisurotayo

Dayawem ti wayawaya nga agpili ti dadduma. “Nalabit nga ad-adda a makaaramid dagiti tao iti napapateg a panagbalbaliw iti biagda no aggapu dagita a panagbalbaliw manipud iti bukodda a panangaramat iti karbenganda nga agpili. No itedmo dagiti awis nga agtignay, penken a dayawem ti karbengan nga agpili dagiti sursuruam” (Panangisuro iti Wagas ti Mangisalakan, 35).