kaiyanak a maladaga

Bassit a Kordero, ni Jenedy Paige

Disiembre 18–24

Paskua

“Naimbag a Damag ti Dakkel a Ragsak”

Dagiti panaglilinnawag iti ebanghelio ket nabileg iti kinaespirituan no naipamaysada ken ni Jesucristo. Bayat ti panagadalmo iti pannakaiyanak ken mision ni Jesucristo iti daytoy a lawas, agkalikagum a manggun-od iti pammaregta manipud iti Espiritu Santo tapno ammuen no kasano ti kasayaatan a panangipamaysam iti panaglilinnawag iti klasem maipapan iti Mangisalakan.

icon iti panagbibinninglay

Yawis ti Panagbibinninglay

Mangawis kadagiti miembro ti klase a mangibinglay no ania ti ar-aramidenda wenno naaramiddan iti napalabas kas indibidual wenno sangapamilia a panangrambak iti pannakaiyanak ti Mangisalakan iti wagas a nangyasideg kadakuada nga ad-adda pay Kenkuana.

icon iti panangisuro

Isuro ti Doktrina

Mateo 1:18–25; Lucas 1:26–38; 2:1–20

Nagpakababa ni Jesucristo tapno maiyanak iti daga.

• Ti Paskua ti maysa a nasayaat a panawen a panagutob ken panangrambak iti panagpakababa ni Cristo—ti kinatallugodna a nangpanaw kadagiti “korte ti Amana iti ngato, nakipagbiag iti tao, tapno matay para iti tao” (“Again We Meet around the Board,” Hymns, no. 186). Tapno maparegta ti panaglilinnawag iti daytoy a topiko, mabalinmo a saludsoden dagiti miembro ti klase no ania ti nasursuroda iti bukod wenno sangapamiliaan a panagadalda iti daytoy a lawas maipapan ken ni Jesucristo sakbay ti pannakaiyanakna (kitaen iti Juan 17:5; Mosiah 7:27; Doktrina ken Katulagan 76:12–14, 20–24; Moises 4:2). Kalpasanna mabalinmo nga i-display ti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia bayat ti panangbasa dagiti miembro ti klase maipapan iti pannakayanak ti Mangisalakan (kitaen iti Mateo 1:18–25; Lucas 1:26–38; 2:1–20). Allukoyem ida a mangibinglay dagiti kapanunotan ken riknada bayat ti panangidiligda iti dayag ti Mangisalakan sakbay daytoy a biag iti nanumo a pannakaiyanakna.

• Maysa a saludsod kas iti maysa a dinamag ti anghel ken Nephi iti 1 Nephi 11:16 ket mabalin a nasayaat a wagas a pangirugi iti maysa a panaglilinnawag iti klase, nupay mabalin a sabaliam ti panangisaom iti daytoy. Mabalinmo nga isurat iti pisarra ti Ania ti panagpakababa ti Dios? ket pautobmo kadagiti miembro ti klase daytoy a saludsod bayat ti panangbasada iti 1 Nephi 11:17–33. Idawatmo kadakuada a mangibinglay kadagiti ania man a kapanunotan maipapan iti Mangisalakan a paregtaen dagitoy a bersikulo. Ania dagiti ladawan a maipakitam iti klase a mangiladawan kadagiti buya manipud iti biag ti Mangisalakan nga inladawan ni Nephi? Mabalin nga ibilang dagiti miembro ti klase ti pannakipulapol ti Mangisalakan iti tao bayat ti panangbuyada ti video maipapan iti pannakayanakna, kas iti “A Gift to the World,” “The Nativity,” wenno “He Is the Gift” (ChurchofJesusChrist.org).

• Ti musika ket napintas a wagas a pangawis ti Espiritu iti klasem. Ibilang ti panangawis iti maysa a tao a kumanta iti maysa a kansion ti Paskua wenno aggigiddan iti panangbasa wenno panangkanta iti sumagmamano a himno kas maysa a klase (kitaen iti Hymns, nos. 201–14). Mabalin a kitaen dagiti miembro ti klase dagiti ragup ti balikas kadagitoy a himno ken dagiti nasantuan a kasuratan a nakalista kadagiti himno a mangpadakkel iti panagyamanda iti Mangisalakan ken ti panagtallugodna nga umay iti daga.

Ni Jesus a nakaparintumeng iti Minuyongan ti Getsemani

Getsemani, ni J. Kirk Richards

Lucas 4:16–21; Juan 3:16

Impatungpal ni Jesucristo ti misionna, a namagbalin a posible nga agtawidtayo iti agnanayon a biag.

• Tapno matulongam dagiti miembro ti klase a mangilawlawag kadagiti gapu ti pannakaiyanak ni Jesucristo, mabalinmo nga awisen ida a mangsarak ken mangibinglay kadagiti nasantuan a kasuratan a manggupgop iti misionna (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia para iti sumagmamano a pagarigan). Nalabit a mabalin a sapulen ken basaen dagiti miembro ti klase dagiti bersikulo iti kada paris wenno babassit a grupo. Ania ti masursuroda maipapan iti mision ni Cristo manipud kadagiti bersikulo a masarakanda? Ania ti masursurotayo maipapan iti misionna manipud iti sumagmamano a pangawag a naited Kenkuana kadagiti nasantuan a kasuratan? (kitaen iti Bible Dictionary, “Christ, names of”).

• Mabalin a masursuro dagiti miembro ti klase maipapan iti mision ti Mangisalakan babaen ti panangbasa iti “Ti Sibibag a Cristo: Ti Pammankenek dagiti Apostol” (ChurchofJesusChrist.org), ken panangibinglay kadagiti palawag a masarakanda a mangilawlawag no apay nga immay Isuna iti daga. Ikkam dagiti miembro ti klase iti gundaway nga agutob kadagiti pammaneknekda maipapan ken ni Jesucristo ken ti misionna. Makaibinglayda kadi kadagiti bukod a padas wenno estoria manipud iti biag ti Mangisalakan a nangpatibker iti pammatida wenno ayatda Kenkuana? Kasano a ti panagadal iti Baro a Tulag iti daytoy a tawen ket nakatulong a namagbalin a napatpateg ti panawen ti Paskua? Tapno marebyu ti sumagmamano a pakaammuan a nasursuro dagiti miembro ti klase ita a tawen, mabalin nga ipabuya kadakuada dagiti video a “For God So Loved the World” wenno “To This End Was I Born” (ChurchofJesusChrist.org).

Panangpadur-as iti Panangisurotayo

Mangilatang iti oras a makaibinglay dagiti agad-adal. “No ibinglay dagiti agad-adal no ania ti nasursuroda, saanda laeng a marikna ti Espiritu ken mapapigsa dagiti bukodda a pammaneknek, no di ketdi maallukoyda pay dagiti miembro ti klase a mangtakuat kadagiti kinapudno para iti bagbagida. … Mangilatang iti oras a pakaibinglayan ti estudiante iti tunggal adalen—iti sumagmamano a gundaway, matakuatam a dagitoy a panaglilinnawag ket ti adalen” (Panangisuro iti Wagas ti Mangisalakan, 30).