“Disiembre 11–17. Apocalipsis 6–14: ‘Inabakda … gapu iti Dara ti Kordero,’” Umaykayo, Sumurot Kaniak—Para iti Sunday School: Baro a Tulag 2023 (2021)
“Disiembre 11–17. Apocalipsis 6–14,” Umaykayo, Sumurot Kaniak—Para iti Sunday School: 2023
Composite art ni Eric Johnson: Ti Dakkel a Konseho, ni Robert T. Barrett; star cluster courtesy ti European Space Agency
Disiembre 11–17
Apocalipsis 6–14
“Inabakda … gapu iti Dara ti Kordero”
Imbaga ni Joseph Smith a ti libro ti Apocalipsis “ket maysa kadagiti kalawagan a libro nga impasurat ti Dios” (iti Journal, Disiembre 1842–Hunio 1844; Book 2, 10 Marso 1843–14 Hulio1843, 98, JosephSmithPapers.org). Kasano a matulongam dagiti miembro ti klase a mangsapul kadagiti nalawag a kinapudno kadagitoy a kapitulo?
Yawis ti Panagbibinninglay
Tapno matulongan dagiti miembro ti klase a mangrebyu ti sumagmamano a nalawag a pannakaammo ken pannakaawatda bayat ti panagadalda iti Apocalipsis 6–14, isurat ti numero 6 agingga iti 14 iti pisarra. Mabalin nga isurat dagiti miembro ti klase iti abay ti numero ti ania man a nalawag a pannakaammo ken pannakaawat a nasarakanda iti kapitulo nga adda pakainaiganna iti maysa a tao nga agbibiag kadagiti maudi nga aldaw.
Isuro ti Doktrina
Luktan ni Jesucristo dagiti nakaselio a libro.
-
Tapno matulongan dagiti miembro ti klase a mangiladawan iti libro nga addaan iti pito a selio (kitaen iti Apocalipsis 5:1), mabalinmo nga ilawlawag a dagiti nagkauna a lukot ket masansan a nakaselio iti bassit a pitak wenno allid. Maideppel ti maysa a singsing wenno selio iti pitak wenno allid sakbay a tumangken, isu a mangipasimudaag iti bileg ti tao a nangselio iti kasuratan, ken mangiparit kadagiti tao nga awanan iti pammalubos a manglukat kadaytoy. Mabalin nga iburay dagiti miembro ti klase ti ania man a kapanunotan wenno impresionda bayat ti panangbasada maipapan iti libro iti Apocalipsis 6; Doktrina ken Katulagan 77:6–7; ken ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Iti panagkunam, apay a napateg a maamuan ti kaipapanan ti simbolo ti libro? Iti panagkunam apay a napateg a maammuan a ti Mangisalakan laeng ti manglukat iti tungggal selio iti libro? (kitaen iti Apocalipsis 5:1–9).
“Dagiti pagarian ditoy a lubong ti agbalin a pagarian ti Apotayo.”
-
TiApocalipsis 7–11 ket mabalin a narigat a maawatan. Maysa a bendision iti klase iti Sunday School ket makapagtitinnulong dagiti miembro ti klase tapno maawatanda dagiti nasantuan a kasuratan. Mabalinmo ti mangilista kadagiti saludsod dagiti miembro ti klase maipapan iti tallo a kapitulo ken mangawis kadakuada a mangiburay kadagiti nalawag a pannakammo ken pannakaawat iti tunggal maysa. Allukoyem amin a miembro ti klase—dagiti mabalin a makarikna nga ad-adu ti pannakaammoda ken dagiti mabalin a makarikna a bassit la ti ammoda—tapno ibinglay dagiti nalawag a pannakaammo ken pannakaawatda maipapan kadagitoy a kapitulo.
-
Mabalinmo a rugian ti panaglilinnawag babaen ti panagsaludsod kadagiti miembro ti klase no ania ti maulit a tema a masarakanda iti Apocalipsis 7–11. Mabalinda nga ibinglay dagiti bersikulo a pakasarakanda kadagitoy a tema ken ilawlawagda no apay a napateg dagita a tema, No masapulda iti tulong, mabalinmo nga isingasing a basaenda iti Apocalipsis11:15–17. Ania dagiti tema a nasapulanda kadagitoy a bersikulo, ken kasano ti pannakayebkas daytoy a tema iti dadduma a bersikulo iti Apocalipsis 7–11? Numan pay iladawan dagitoy a kapitulo dagti gubat ken didigra, ania ti masapulantayo a makaipaay iti namnama ken panagtalek ken ni Jesucristo?
Maparmektayo ni Satanas “babaen ti dara ti Kordero, ken babaen ti balikas ti pammaneknek[tayo].”
-
Ti panangsursuro maipapan iti Gubat iti Langit ket makatulong kadatayo a nasaysayaat a makaawat iti biag iti daga. Mabalin a basaen dagiti miembro ti klase ti Patarus ni Joseph Smith, Apocalipsis 12:7–11 (iti Pangiwanwan iti Nasantuan a Kasuratan) ket ilasinda no kasano a maparmektayo ni Satanas ken dagiti pasurotna. Ania dagiti dadduma pay a nalawag a pannakaammo ken pannakaawat [insights] a magun-odtayo manipud kadagiti naisurat maipapan iti Gubat iti Langit iti Pangiwanwan iti Nasantuan a Kasuratan wenno Gospel Topics? (topics.ChurchofJesusChrist.org). Ania ti masursurotayo a makatulong kadatayo a mangparmek iti kabusor?
-
Ti gubat ti nagbaetan ti nasayaat ken dakes a nailadawan iti Apocalipsis 13–14. Ania ti isuro ti kapitulo 13 maipapan iti pannakiranget dagiti dragon iti daytoy a gubat? Segun iti kapitulo 14, kasano a kinaranget ti Kordero daytoy? Makaay-ayo no agaramidka iti maysa a listaan dagiti wagas nga iti agsumbangir makiranget iti daytoy a gubat segun iti dua a kapitulo. Ania dagiti pagpapadaan ken paggigidiatan a makitatayo?
-
Ania ti kayatna a sawen a ti Kordero “napapatay manipud idi pannakabangon ti lubong”? (Apocalipsis 13:8; kitaen met iti Apocalipsis 5:6). Ibilang ti panangawis kadagiti miembro ti klasem a mangsarak kadagiti sungbat iti daytoy a saludsod babaen ti panangbasa iti Mosiah 3:13 ken Moises 7:47 kas maysa a klase. Ania ti kayatna a sawen ti mangparmek ken ni Satanas “babaen ti dara ti Kordero”? (Apocalipsis 12:11).
“Ket nakakitaak ti sabali nga anghel … nga adda ipakaammona a naimbag a damag nga agnanayon.”
-
Ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ket mangisingasing iti panagsursuro maipapan iti nadumaduma nga anghel a nangipasubli iti “naimbag a damag nga agnanayon … kadagiti agnaed iti rabaw ti daga” (Apocalipsis 14:6). Awisem dagiti miembro ti klase a mangibinglay no ania ti nasarakanda. Ania ti isuro kadatayo ti Doktrina ken Katulagan 133:36-40 maipapan iti Apocalipsis 14:6–7? Kasano a makiramantayo iti aramid ti anghel a nadakamat iti Apocalipsis 14:6–7? Mabalinmo pay nga ipabuya ti video a “The Work of These Last Days” (ChurchofJesusChrist.org).
Panangpadur-as iti Panangisurotayo
OK laeng nga isao ti “Diak ammo.” “Idinto a gagangay a kayatmo a sungbatan ti tunggal saludsod, iti sumagmamano a situasion maitutop a sawen laeng ti, “Diak ammo. Adalentayo koma dayta a saludsod iti bukodtayo iti daytoy a lawas, ket paglilinnawagantayo daytoy iti sumaruno a gundaway’” (Panangisuro iti Wagas ti Mangisalakan, 24). Kalpasanna idawat kadagiti miembro ti klase a mangsukisok kadagiti nasantuan a kasuratan ken dadduma pay a resources ti Simbaan para kadagiti sungbat.