“Disiembre 4–10. Apocalipsis 1–5: ‘Dayag, ken Pannakabalin, ti Adda Koma … iti Kordero iti Agnanayon,’” Umaykayo, Sumurot Kaniak—Para iti Sunday School: Baro a Tulag 2023 (2021)
“Disiembre 4–10. Apocalipsis 1–5,” Umaykayo, Sumurot Kaniak—Para iti Sunday School: 2023
Disiembre 4–10
Apocalipsis 1–5
“Dayag, ken Pannakabalin, ti Adda Koma … iti Kordero iti Agnanayon”
Ti panangawat iti naespirituan nga impresion ket makatulong kenka a mangbigbig a kayat ti Espiritu Santo ti mangisuro kenka. Ti panangisurat ken panangsurot kadagiti impresion ket mangipakita nga ipategmo dagitoy ken agtarigagayka nga umawat iti ad-adu pay.
Yawis ti Panagbibinninglay
Bayat ti panangirugim iti panaglilinnawag, mabalin a makatulong ti panangawis kadagiti miembro ti klase a mangibinglay iti sumagmamano a mensahe a nabirokanda iti libro ti Apocalipsis kabayatan dagiti bukod wenno sangapamiliaan a panagadalda. Kas pagarigan, ania ti nasursuroda maipanggep iti plano ti Nailangitan nga Ama tapno maisalakanna dagiti annakna? Ania ti nasursuroda maipanggep iti Mangisalakan ken ti akemna iti daytoy a plano? Allukoyem dagiti miembro ti klase a mangsapul kadagiti napateg a mensahe maipapan ken ni Jesucristo ken ti plano ti pannakaisalakan iti panagtultuloyda a mangbasa iti Apocalipsis iti pagtaengan. Ikkam ida iti gundaway kadagiti masakbayan nga adalen nga ibinglayda no ania ti masarakanda.
Isuro ti Doktrina
Ni Jesucristo ti Sibibiag nga Anak ti Sibibiag a Dios.
-
Nalawag nga ipaneknek ti metapora ken simbolismo iti Apocalipsis 1 a sibibiag ni Jesucristo ket iturongna ti Simbaanna. Nalabit a mabalin nga isurat dagiti miembro ti klase iti pisarra ti sumagmamano a ragup ti balikas [phrases] manipud iti Apocalipsis 1 a mangiraman iti panangiladawan wenno simbolismo ken ibinglayda no ania ti isuro ti tunggal ragup ti balikas kadakuada maipapan ken ni Jesucristo. Kas pagarigan, ania ti masursurotayo manipud kadagitoy a simbolo maipapan no kasano nga idauluan ni Cristo ti Simbaanna iti agdama? Kasano a maidasig ti panangiladawan ni Juan iti Mangisalakan iti maysa iti Doktrina ken Katulagan 110:1–4?
Personal nga am-ammonatayo ni Jesucristo ket tulongannatayo a mangparmek kadagiti karittayo.
-
Ti panangbasa kadagiti mensahe ti Apo iti nadumaduma a sanga ti Simbaan iti Apocalipsis 2–3 ket makatulong a mangpatalged kadagiti miembro ti klase nga am-ammo ida ti Mangisalakan. Nalabit a mabalinmo nga awisen ida a mangbasa kadagiti kapitulo ken mangsapul kadagiti pammaneknek nga ammo ni Jesucristo dagiti pannubok ken pagpigsaan ti tunggal sanga. Mabalinda pay nga ibinglay dagiti padas a nakariknaanda nga ammo ti Mangisalakan dagiti naidumduma a kasasaadda. Ania a balakad ti inted ti Apo kadagiti Santo a makatulong pay kadatayo a mangparmek kadagiti panagkarigatantayo?
-
Kadagitoy isu met laeng a kapitulo inaramid ti Apo dagiti makaparegta a kari kadagiti mangparmek. Mabalinmo nga awisen dagiti miembro ti klase nga agtrabaho iti kada paris tapno mangsukisok iti Apocalipsis 2–3 a mangsapul kadagiti kari ti Apo. Nalabit a mabalinda ti agdrowing kadagiti ladawan a mangibagi iti sumagmamano kadagitoy a kari, kalpasanna ibinglayda iti klase no ania ti nasarakanda. Kasano a mangparegta dagitoy a kari kadatayo a mangituloy a mangikarigatan a mangparmek kadagiti bukodtayo a pannubok ken pagkapsutan?
Ni laeng Jesucristo ti makaaramid iti pannakaipatungpal ti plano ti Nailangitan nga Ama.
-
Makatulong kadi ti banag nga adalen [object lesson] tapno maawatan ti klasem ti simbolismo iti Apocalipsis 5 maipapan iti Mangisalakan a mangluklukat iti naselioan a libro? Mabalinmo ti mangitugot iti taraon a naikabil iti naikandado a pagikkan tapno ibinglay iti klase. Sakbay ti klase, sililimed nga itedmo iti maysa a tao ti tulbek iti kandado. Iladawanmo iti klase no ania ti naguneg ti pagikkan, ken bay-am ti sumagmamano a miembro ti klase a mangpadas a manglukat iti kahon sakbay a lukatan daytoy ti tao nga addaan iti tulbek. Kalpasanna mabalin nga idilig ti klase daytoy a banag nga adalen iti Apocalipsis 5. Mabalin a makatulong dagiti saludsod a kas kadagitoy: Kasano a maipada ti pannakaisalakan dagiti annak ti Nailangitan nga Ama iti naikandado a pagikkan wenno ti naselioan a libro? Apay a ni Jesucristo laeng ti Maymaysa a mabalin a manglukat kadagiti selio (kitaen ti teksto iti “Dagiti Nainayon a Resources”).
-
Kas kadagiti naragsak a tattao a nadakamat iti Apocalipsis 5, ita mabalintayo met nga itag-ay dagiti timektayo a mangdaydayaw iti Mangisalakan kas Maysa a maikari a mangidiaya kadatayo iti pannakaisalakan. Nalabit a mabalin nga agkanta dagiti miembro ti klase iti paggugustoda a himno a pagdaydayaw iti Mangisalakan, kas iti “Glory to God on High” (Hymns, no. 67). Mabalin a lasinen dagiti miembro ti klase dagiti kinapudno nga isuro ti himno maipanggep ken ni Jesucristo. Ania dagiti pagpapadaan a makitatayo iti nagbaetan dagiti mensahe ken dagiti himno a pagdaydayaw ken dagiti palawag iti Apocalipsis 5:9–14?
Dagiti Nainayon a Resources
Ni laeng Jesucristo ti makasubbot kadatayo.
Iti panagiladawan kadagiti pasamak iti biag sakbay daytoy a biag, insuro ni Elder Jeffrey R. Holland:
“Nagboluntario ni Cristo a mangdayaw iti nawaya a panagpili a mainaig iti nasayaat a kababalin ti amin a sangkataw-an uray pay sinubbotnan dagiti basolda. Iti dayta a proseso, isublina iti amin a gloria iti Ama para iti kasta a manangsubbot nga ayat.
“Daytoy awan patinggana a Pannubbot ni Cristo ket posible gapu ta (1) Isu laeng ti awan basolna a tao a nagbiag ditoy daga ket ngarud saan a naipasango iti naespirituan nga ipapatay a bunga manipud iti basol, (2) Isu ti Bugbugtong ti Ama ket ngarud adda Kenkuana dagiti kababalin ti kinadiosan a nangted Kenkuana iti bileg a mangparmek iti pisikal nga ipapatay, ken (3) Isu laeng ti agmaymaysa a napakumbaba ken nagtallugod iti konseho iti biag sakbay daytoy a biag tapno maipasakbay a maordenan iti dayta a serbisio” (“The Atonement of Jesus Christ,” Liahona, Mar. 2008, 35).
Panangpadur-as iti Panangisurotayo
Usarem dagiti nasantuan a kasuratan ken balikas dagiti propeta iti ud-udina nga aldaw. “Binilinnatayo ti Apo tapno ‘isuro iti tunggal maysa ti doktrina ti pagarian’ [Doktrina ken Katulagan 88:77] ken tapno usaren dagiti nasantuan a kasuratan ‘tapno isuro dagiti pagbatayan ti ebanghelio[na]’ [Doktrina ken Katulagan 42:12]. Dagiti nasantuan a kasuratan ken balikas dagiti propeta ken apostol iti ud-udina nga aldaw ket pagtaudan dagiti kinapudno nga isurotayo” (Panangisuro iti Wagas ti Mangisalakan, 21).