“13–19 noviembre. Santiago: “B’aanuhomaq li naxye li aatin, ut ink’a’ chik’ojlaaq eech’ool ka’ajwi’ rik’in rab’inkil,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“13–19 noviembre. Santiago,” Kim, Taaqehin—Choq’ re li Dominkil Tzoleb’aal: 2023
13–19 noviembre
Santiago
“B’aanuhomaq li naxye li aatin, ut ink’a’ chik’ojlaaq eech’ool ka’ajwi’ rik’in rab’inkil”
Rub’elaj naq taawil li tusleb’ aatin a’in, il lix hu laj Santiago, ut k’e reetal li musiq’ahom nakak’ul. K’a’ru li na’leb’ nakataw li taa’osob’tesinq ut taawaklesinq reheb’ li komon sa’ laa tzoleb’aal?
Xkanab’ankileb’ chi wotzok
Ye reheb’ li komon naq te’xwotzeb’ li raqal sa’ Santiago li natenq’ank reheb’ re te’wanq “chixb’aanunkil li naxye li aatin” (Santiago 1:22). Wi nakaweek’a naq us, naru ajwi’ te’xwotz li k’a’ru neke’reek’a naq toj te’raj ru xb’aanunkil, xjuneseb’ malaj jo’ junkab’al.
Xk’utb’al li tzolʼlebʼ
Naq nokopatz’ok rik’in paab’aal, li Dios nak’ehok chi anchal xch’ool.
-
Rik’in li na’leb’ k’utb’il sa’ Santiago 1:5–6 laj Jose Smith kixk’ul jun k’utb’esinb’il na’leb’ li kixjal lix yu’am, ut laa’o ajwi’ wan li osob’tesink naru naqak’ul chiqajunqal rik’in li aatin a’an. Maare naru taatz’iib’a li patz’om jo’ a’in chiru li pizarron, ut taaye reheb’ li komon sa’ li tzoleb’aal naq te’xk’oxla sa’ xch’ool: Chan ru naq li aatin sa’ Santiago 1:5–6 xjal laa yu’am? Rik’in li k’a’ru kixk’ul laj Jose Smith rik’ineb’ li raqal a’in, k’a’ru xatzol chirix xsik’b’al aana’leb’ naq wan jun aapatz’om? (chi’ilmanq Jose Smith—Resilal 1:10–17). K’a’ru xak’ul li xk’e chanaw naq “yaal lix ch’olob’ahom laj Santiago”? (Jose Smith—Resilal 1:26). Ye reheb’ li komon sa’ li tzoleb’aal naq te’xwotz lix na’leb’eb’ chirix naq xe’xk’oxlaheb’ li patz’om a’in.
-
Maare eb’ li komon sa’ li tzoleb’aal te’ruuq chixyeeb’al li tz’iib’anb’il sa’ Santiago 1:5–6 rik’in tz’aqal li raatineb’. Chan ru naq a’in naxtenq’aheb’ chixtawb’al ru chi us li raqaleb’ a’in? Naru neketz’il rix k’a’ru naraj xyeeb’al li aatin sa’eb’ li raqal a’in.
Wi nokokuyuk toj sa’ roso’jik, li Qaawa’ tooxb’eresi toj sa’ li tz’aqalil.
-
Re xtikib’ankil li aatinak chirix li raatin laj Santiago chirix li kuyuk sa’eb’ li raqal a’in, naru taapatz’ reheb’ li komon sa’ li tzoleb’aal naq te’xwotz jun sut sa’ lix yu’ameb’ naq x’ajman ru naq te’wanq xkuyumeb’, ut k’a’ru xe’xtzol rik’in a’an. Chirix a’an, naru te’xtz’il rix Santiago 1:2–4; 5:7–11 re xtawb’aleb’ li na’leb’ li neke’xk’am rib’ rik’in li k’a’ru xe’xk’ul. Maare te’xtaw ajwi’ na’leb’ sa’ li video “Continuemos con paciencia” (ChurchofJesusChrist.org) malaj li raatin li Awa’b’ej Dieter F. Uchtdorf, “Continuemos con paciencia” (Liahona, mayo 2010, 56–59). Eb’ li komon naru neke’xwotz li xe’xtzol chirix li kuyuk naq yookeb’ chixnawb’al ru li qaChoxahil Yuwa’ ut li Kolonel. K’a’ru natenq’an qe chixtawb’al qakuyum?
Santiago 1:3–8, 21–25; 2:14–26
“Li paab’aal chi maak’a’ xb’aanuhom, kamenaq.”
-
Re aatinak chirix li raatin laj Santiago chirix li paab’aal ut li b’aanuhom, naru taak’eheb’ li komon sa’ wiib’ ch’uut—sa’ li jun te’xtz’il rix k’a’ut naq li qapaab’aal naraj ru b’aanuhom, ut sa’ li jun chik te’xtz’il rix k’a’ut naq li qab’aanuhom naraj ru li paab’aal. Re xb’aanunkil a’in, naru te’ril ru Mateo 7:21–23; Santiago 1:6–8, 21–25; 2:14–26; ut Jose Smith—Resilal 1:19). Chirix a’an, li junjunq jachal naru chixyeeb’al k’a’ru xe’xtaw, ut te’aatinaq chirix k’a’ut naq na’ajman ru li paab’aal jo’ ajwi’ li b’aanuhom.
Jalam-uuchlaj Abraham natijok chirix lix muheb’aal t’ikr“Laj Abraham kixpaabʼ li Dios, ut kikʼeheʼ saʼ ajl choqʼ tiikilal” (Santiago 2:23). Laj Abraham sa’ li helhookil ch’och’ Mamre, xb’aan laj Grant Romney Clawson
-
Re xtenq’ankileb’ li komon chixk’oxlankil chi us li aatin, “Li paab’aal chi maak’a’ xb’aanuhom, kamenaq” (Santiago 2:26), naru taatz’iib’a li ch’ol aatin a’in chiru li pizzaron: Li paab’aal chi maak’a’ xb’aanuhom chanchan li chi maak’a’ . B’oqeb’ li komon chixk’oxlankil k’a’ruheb’ li aatin te’ruuq chixk’eeb’al re xtz’aqob’resinkil ru li ch’ol aatin, ut kanab’eb’ chixtz’iib’ankil chiru li pizarron eb’ li aatin xe’xk’oxla. K’a’ru naru taqab’aanu re naq rajlal yooqo chixk’anjelankil li qapaab’aal chirix li Jesukristo?
Jo’ xtzolom li Jesukristo, naqaraheb’ chixjunileb’ li kristiaan, maak’a’ naxye chan ru wankeb’.
-
Re xtenq’ankileb’ li komon chixk’utb’al li rahok chiru chixjunileb’, maak’a’ naxye k’a’ru li wankeb’ wi’ malaj chan ru neke’ilok, naru taapatz’ reheb’ li komon naq te’xk’e xhoonal chirib’ileb’ rib’ chixyaab’asinkil Santiago 1:9–11; 2:1–9; 5:1–6. Aatinanqex chirixeb’ li patz’om jo’ a’in: K’a’ru xyaalalil “juntaq’eet rilb’aleb’ chixjunil”? (Santiago 2:9). K’a’ut naq wan naq naqak’ulub’eb’ li wankeb’ xtumin, li nawb’ileb’ ru, malaj li ani wankeb’ xwankil chi jalan rik’ineb’ li maak’a’ wan reheb’? Chan ru naq naru taqakanab’ rilb’aleb’ li qas qiitz’in chi jalan, a’ yaal chan ru naq wankeb’? Chan ru naq eb’ li tiikeb’ chixtaaqenkil li Kolonel a’aneb’ li q’axal b’ihomeb’? (chi’ilmanq Santiago 2:5).
Li aatin naqoksi wan xwankil chi rahob’tesink ut chi osob’tesink.
-
Li kawil aatin oksinb’il xb’aan laj Santiago naru naxjultika qe ut nokoxtenq’a chiroksinkil li aatin—li yeeb’il jo’ ajwi’ li tz’iib’anb’il—re xwaklesinkileb’ li qas qiitz’in. Naru taapatz’ reheb’ li komon naq te’ril Santiago 3, ut te’xsik’ chan ru naq laj Santiago kixch’olob’ chan ru naq li aatinak naru chi rahob’tesink ut chi osob’tesink; maare wankeb’ li komon li te’raj xyiib’ankil xjalam-uuch li xe’xtaw. Chan ru naq li na’leb’ a’in naxk’ut xyaalal lix yehom laj Santiago sa’ li ch’ol a’in? Qayehaq, chan ru naq li qaatin naru nawan jo’ jun xam? Eb’ li komon naru te’xwotz xnumsihomeb’ li naxk’ut xwankil li aatin. Maare taaruuq taapatz’ reheb’ li komon sa’ li tzoleb’aal chan ru naq te’ruuq chixk’anjelankil li raatin laj Santiago.
Xchaab’ilob’resinkil li qak’utum
Tenq’aheb’ chiroxloq’inkil rib’ chirib’ileb’ rib’. “Tenq’aheb’ li komon sa’ laa tzoleb’aal chixtawb’al ru naq li junjunq reheb’ neke’tz’aqon sa’ xk’eeb’al chi eek’amank li musiq’ej sa’ li tzoleb’aal. Waklesi xch’ooleb’ re taawanq li chaab’ilal, li rahok, ut li oxloq’ink chirib’ileb’ rib’ re naq chixjunileb’ sa te’reek’a sa’ xwotzb’al li k’a’ru xe’xk’ul sa’ xyu’am, lix patz’omeb’, ut lix nawomeb’ xch’ool” (Li k’utuk jo’ li Kolonel, 15).