“20–26 noviembre. 1 ut 2 Pedro: “K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“20–26 noviembre. 1 ut 2 Pedro,” Kim, Taaqehin—Choq’ re li Dominkil Tzoleb’aal: 2023
Li Kristo najultikan aatin sa’ li ruchich’och’ reheb’ li musiq’ej, xb’aan laj Robert T. Barrett
20–26 noviembre
1 ut 2 Pedro
“K’a’jo’ naq nasaho’k lee ch’ool; maaka’ch’in lix nimal ut lix loq’al li sahil ch’oolejil a’an”
Chijultiko’q aawe naq laa k’anjel a’an xtzolb’aleb’ li kristiaan, ink’a’ yal xk’utb’al jun tzolom. Naq nakawileb’ lix hu laj Pedro, k’oxlaheb’ chixjunqaleb’ li komon. K’a’ruheb’ li na’leb’ li te’tenq’anq reheb’ chixkawob’resinkil lix paab’aaleb’?
Xkanab’ankileb’ chi wotzok
Tz’iib’a 1 Pedro ut 2 Pedro chiru li pizarron. K’e xhoonaleb’ li komon re naq te’ril wi’chik chiru junpaat eb’ li ch’ol a’in, ut kanab’eb’ chixtz’iib’ankil rub’eleb’ li jolomil aatin eb’ li aatin malaj raqal sa’eb’ li ch’ol a’in li xwulak chiruheb’. Chirix a’an, oksiheb’ li tz’iib’ahom a’in re xb’oqb’aleb’ li komon chixwotzb’al lix na’leb’eb’ chirib’ileb’ rib’.
Xk’utb’al li tzol‘leb‘
1 Pedro 1:3–9; 2:19–24; 3:14–17; 4:12–19
Naru nintaw xsahil inch’ool sa’ xkutankil li yale’k wix ut li rahilal.
-
Re xtz’ilb’al rix li raatin laj Pedro sa’ 1 Pedro 1:3–9; 2:19–24; 3:14–17; ut 4:12–19 naru taapatz’ reheb’ li komon naq te’xk’oxla anihaq li neke’xnaw ru, li yoo chixnumsinkil jun xyalb’al rix. K’e xhoonaleb’ re naq te’xtz’iib’a jun li ch’ina hu choq’ re li kristiaan a’an, b’ar wi’ te’xjultika li na’leb’ wankeb’ sa’eb’ li raqal a’in li taawaklesinq xch’ool li kristiaan a’an (chi’ilmanq ajwi’ Tzol’leb’ ut Sumwank 121:1–8; 123:17). Chirix a’an, eb’ li komon sa’ li tzoleb’aal te’ruuq chi aatinak chirix li yaalil na’leb’ xe’xsik’ ru.
B‘oqb‘ilo re toowanq jo’ “xtenamit li Dios.”
-
Lix k’utum laj Pedro sa’ 1 Pedro 1:13–20 ut 2:1–12 naru naxjultika qe chi musiq’anb’il chan ru nokoril li Qaawa’—ut k’a’ru naroyb’eni qik’in laa’o, lix tenamit. Maare taaruuq taab’oqeb’ li komon sa’ li tzoleb’aal chixtz’ilb’aleb’ rix li raqal a’in, re xtawb’al k’a’ru xyaalalil li wank choq’ “xtenamit li Dios” (1 Pedro 2:10ut chirix a’an te’aatinaq chirix li k’a’ru xe’xtaw. Naru taach’olob’ naq li aatin “b’oqb’il chi ok sa’ li reechanihom li Dios” sa’ 1 Pedro 2:9 naraj naxye “sik’b’il ru” malaj “k’uulanb’il.” K’a’ru naxk’ut a’in chirix k’a’ru nareek’a li Dios chiqix, ut chirix chan ru naraj naq toowanq?
Li evangelio jultikanb’il chiruheb’ li kamenaq re naq taaruuq taaraqe’q aatin chirixeb’ chi tiik.
-
Sa’ li xb’een xhu laj Pedro natawman xka’ch’inal li aatin sa’ li Santil Hu li na’aatinak chirix lix xikik li Jesukristo sa’ li ruchich’och’ reheb’ li musiq’ej chirix xkamik—jun na’leb’ li natawman ru chi us wi’chik rik’in li k’a’ru k’utb’esinb’il sa’ roso’jikeb’ li kutan. Re xtenq’ankileb’ li komon chixtawb’al chik xna’leb’eb’ chirix li ruchich’och’ reheb’ li musiq’ej, naru taapatz’ reheb’ naq te’rileb’ li raqal a’in ut te’xtz’iib’a chiru li pizarron k’a’ru te’xtzol: Jwan 5:25; 1 Pedro 3:18–20; 4:6; Alma 40:7–14, 21; Tzol’leb’ ut Sumwank 138:11–32 (chi’ilmanq ajwi’ “Xkomon chik li k’anjeleb’aal”). K’a’ut naq aajel ru xnawb’al chirix li rula’anihom li Kolonel sa’ li ruchich’och’ reheb’ li musiq’ej? Chan ru naq li nawom a’an naxjal li qeek’ahom chirix li Dios ut chirix lix k’uub’anb’il na’leb’ re kolb’a-ib’?
Rik’in lix wankil li Jesukristo, naru taqak’ul li qadiosilal.
-
Re xwaklesinkileb’ xch’ool li nakatzoleb’ chi wank jo’ li Jesukristo, naru taaye reheb’ naq te’xk’e reetal k’a’ruheb’ li chaab’ilal re li Kristo li yeeb’ileb’ resil sa’ 2 Pedro 1:1–11. Naru taatz’iib’aheb’ li chaab’ilal a’in chiru li pizarron ut taapatz’ reheb’ li komon sa’ li tzoleb’aal naq te’xye k’a’ru xyaalalileb’. Chirix a’an, eb’ li komon sa’ li tzoleb’aal te’ruuq chi aatinak chirix chan ru naq xk’ulb’al jun reheb’ li chaab’ilal a’in nokoxtenq’a chixk’ulb’al li jun ch’ol chik chaab’ilal. K’e xhoonaleb’ chixk’oxlankil b’arwan reheb’ li chaab’ilal a’in te’raj xk’ulb’al chi q’axal wi’chik.
Li junjunq chi chaab’ilal re li Kristo li naqak’ul nokoxtenq’a chixkemb’al jun musiq’ejil t’ikr re wank choq’ tzolom.
Xkomon chik li k’anjeleb’aal
Li k’anjel re xkolb’aleb’ li kamenaq naxk’ut xyaalal lix k’anjel li Jesukristo.
Li Elder D. Todd Christofferson kixk’ut:
“K’a’ru taak’ulmanq rik’ineb’ li k’iila millon chi kristiaan li xe’wan ut xe’kam chi maak’a’ xnawomeb’ chirix li Jesus? Rik’in lix k’ojob’ankil lix evangelio li Jesukristo, k’utb’il wi’chik chiqu chan ru naq neke’kole’ li kamenaq, ut chan ru naq li Dios a’an “jun li Dios tz’aqal re ru ut tiik xna’leb’, ut jo’kan ajwi’ jun li Dios aj uxtaan” [Alma 42:15].
“Naq toj kiwan sa’ li yu’am a’in, li Jesus kixye chi junxilaj naq taajultikanq aatin chiruheb’ li kamenaq [chi’ilmanq Jwan 5:25]. Laj Pedro kixye qe naq a’in kik’ulman chirix lix kamik li Kolonel chiru krus, naq toj maji’ kiwakli chi yo’yo [chi’ilmanq 1 Pedro 3:18–19]. Li Awa’b’ej Joseph F. Smith kiril chi k’utb’esinb’il naq li Kolonel kirula’ani li ruchich’och’ reheb’ li kamenaq [chi’ilmanq Tzol’leb’ ut Sumwank 138:30, 33]. …
“Lix anchalil qach’ool re xkolb’aleb’ li kamenaq, ut li kutan ut tumin naqatoj re xb’aanunkil a’an, neke’k’anjelak re xk’utb’al xyaalal qapaab’aal chirix li Jesukristo. Naxk’ut xyaalal rik’in nimla wankilal lix diosilal ut lix k’anjel a’an. Naxch’olob’ xyaalal, xb’een, lix waklijik li Kristo chi yo’yo; xkab’, naq q’axal wan xwankil lix tojb’al rix li maak xb’aan; rox, naq ka’ajwi’ rik’in a’an nachal li kolb’a-ib’; xkaa, naq a’an kixk’ut k’a’ru na’ajman ru choq’ re li kolb’a-ib’; ut ro’, naq a’an taak’ulunq wi’chik” (“La redención de los muertos y el tesimonio de Jesús,” Liahona, noviembre 2000, 9–10).
Xchaab’ilob’resinkil li qak’utum
Taak‘ut li “k’a’ut.” “Wan naq eb’ li komon sa’ li tzoleb’aal—ut k’a’jo’ wi’chik eb’ li saaj—neke’raj xnawb’al chan ru naq eb’ li xb’eenil na’leb’ re li evangelio neke’k’anjelak sa’ xyu’ameb’ malaj k’a’ut naq tento te’xpaab’ jun li taqlahom. A’b’anan, wi neke’xtaw ru lix junelikil k’uub’anb’il na’leb’ li qaChoxahil Yuwa’ choq’ re xsahileb’ xch’ool li ralal xk’ajol a’an, saqen chik sa’ xk’a’uxleb’ li rajb’aleb’ li xb’eenil na’leb’ ut li taqlahom, ut naniman li rajomeb’ chi paab’ank” (Li k’utuk jo’ li Kolonel, 20).