li Kristo xaqxo rik’in jun ixqa’al

Li b’an re Galahad, xb’aan li xAnnie Henrie

30 octubre–5 noviembre

Hebreos 1–6

Li Jesukristo, “xyo’leb’aal li kolb’a-ib’ ”

Naru taawotz rik’ineb’ li komon sa’ laa tzoleb’aal junjunq li na’leb’ xak’ul rik’in li Santil Musiq’ej chirix Hebreos 1–6. Wi nakab’aanu chi jo’kan, maare tixtenq’aheb’ chixsik’b’al xmusiq’ankileb’ naq neke’xtzoleb’ li loq’laj hu.

reetalil li wotzok

Xkanab’ankileb’ chi wotzok

Wan naq eb’ li komon sa’ li tzoleb’aal li ink’a’ neke’xwotz lix na’leb’eb’ yal neke’raj ru naq te’b’oqe’q, ut naq te’kanab’aaq chixkawresinkil rib’ chiru junpaat. Naru taab’oq junjunq reheb’ wiib’ oxib’ kutan rub’elaj li tzoleb’aal, re te’chalq chi kawresinb’il chixwotzb’al junaq raqal sa’ Hebreos 1–6 li nawulak chiruheb’.

reetalil li k’utuk

Xk’utb’al li tzolʼlebʼ

Hebreos 1–5

Li Jesukristo a’an “xyo’leb’aal li kolb’a-ib’.”

• Chan ru naru nakawaklesiheb’ xch’ool li komon sa’ li tzoleb’aal chixwotzb’al li raqal chirix li Jesukristo li xe’xtaw sa’ xtzolb’aleb’ li loq’laj hu chiru li xamaan a’in, xjuneseb’ malaj sa’ junkab’al? Naru taatz’iib’a oob’ tzol chiru li pizarron, reetalil li oob’ ch’ol sa’ xtiklajik li hu Hebreos. Patz’ reheb’ li komon naq te’xtz’iib’a sa’ li junjunq tzol eb’ li ch’ol aatin sa’eb’ li oob’ ch’ol a’in li neke’xk’ut xyaalal li Jesukristo, ut rajlil li raqal neke’tawman wi’. Chan ru naq xnawb’al li na’leb’ a’in chirix li Kolonel naxjal li qapaab’aal, ut li qach’ool chixtaaqenkil?

Hebreos 2:9–184:12–165:7–8

Li Jesukristo kixkuy xnumsinkil chixjunil li k’a’aq re ru, re taaruuq tixtaw qu ut tooxtenq’a sa’eb’ li qarahilal.

• Li aatin sa’ Hebreos 2:9–18; 4:12–16; 5:7–8 naru ajwi’ tixtenq’aheb’ li ani neke’ilok re li rahilal wan sa’ li ruchich’och’ ut neke’ok chixk’oxlankil ma naxk’e reetal li Dios, ut ma naxk’oxla. Maare eb’ li komon sa’ li tzoleb’aal te’ruuq chixtz’ilb’aleb’ rix li raqal a’in re xtawb’al li yaalil na’leb’ li taatenq’anq reheb’ rik’ineb’ li patz’om a’in. Jo’ neke’xye li raqal a’in, chan ru naq li Kolonel naril li rahilal neke’xk’ul li winq? Maare us ajwi’ xb’oqb’aleb’ li komon chixwotzb’aleb’ li raqal reheb’ li loq’laj hu b’ar wi’ neke’tenq’aak li kristiaan xb’aan li Jesukristo sa’eb’ lix ch’a’ajkilal (chi’ilmanq “Xkomon chik li k’anjeleb’aal”) malaj k’ut li video “Alto me eleva” (ChurchofJesusChrist.org). Eb’ li komon naru te’xwotz chan ru naq li Kolonel naru chiqatenq’ankil naq naqanumsiheb’ li ch’a’ajkilal.

Hebreos 3:7–4:2

Li rosob’tesihom li Dios wan choq’ reheb’ li “ink’a’ neke’kawob’resink re lix ch’ooleb’.”

• Sa’ Hebreos 3 ut 4 yeeb’il reheb’ laj santil paab’anel naq ink’a’ te’xkawob’resi lix ch’ooleb’, re naq ink’a’ te’wanq chixtz’eqtaanankil li osob’tesink li naraj li Dios xk’eeb’al reheb’. Naq nekeril Hebreos 3:7–4:2, tz’ilomaq rix chan ru naq li k’a’ru ke’xk’ul laj Israelita najter nak’anjelak choq’ qe anajwan, jo’ chanru naq kik’anjelak choq’ reheb’ laj Hebreo sa’ li najteril Iglees (naru teeroksi li na’leb’ re tzolok chirixeb’ li raqal a’in sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). K’a’ru naru naqab’aanu re naq q’unaq ut wanq li qaam chixk’ulub’ankil li rajom li Qaawa’? (chi’ilmanq Proverbios 3:5–6; Alma 5:14–15; Eter 4:15). Eb’ li komon naru neke’xwotz chan ru naq eb’ a’an malaj xkomoneb’ chik li kristiaan neke’xnaw ru neke’osob’tesiik xb’aan naq q’uneb’ ut tuulaneb’ li raam.

Hebreos 5:1–5

Eb’ li neke’k’anjelak sa’ lix awa’b’ejihom li Dios tento naq te’b’oqe’q xb’aan li Dios.

• Li na’leb’ sa’ Hebreos 5 chirixeb’ laj k’amol re li tijonelil li b’oqb’ileb’ xb’aan li Dios naru nak’anjelak choq’ reheb’ chixjunil li k’ojob’anb’ileb’ rik’in xwankilal li tijonelil re naq te’k’anjelaq sa’ jalan jalanq chi k’anjel sa’ li Iglees. Re xtenq’ankileb’ li wankeb’ sa’ laa tzoleb’aal chixtawb’al ru k’a’ru xyaalalil naq “b’oqb’il xb’aan li Dios jo’ laj Aaron,” naru taab’oqeb’ chixka’sutinkil li resil laj Aaron naq kixk’ul lix b’oqb’al, sa’ Exodo 4:10–16, 27–31; 28:1. K’a’ru li na’leb’ naqataw sa’ li esilal a’in li nokoxtenq’a chixtawb’al ru Hebreos 5:1–5? Eb’ li komon naru te’xye chan ru naq neke’reek’a naq junaq komon xb’oqe’ xb’aan li Dios re k’anjelak sa’ junaq k’anjel—maare eb’ a’an ajwi’ li xe’b’oqe’. Chan ru naq neke’tenq’aak xb’aan li nawom a’an chixtenq’ankil li komon a’an xb’oqe’ chi k’anjelak?

laj Moises naxk’ojob’ laj Aaron

“Ut maa’ani naru tixchap li loq’laj k’anjel a’in choq’ re xjunes rib’ ka’aj b’an wi’ li b’oqb’il xb’aan li Dios jo’ laj Aaron” (Hebreos 5:4). Laj Moises naxb’oq laj Aaron sa’ li k’anjel, xb’aan laj Harry Anderson

reetalil li kʼanjelebʼaal

Xkomon chik li k’anjeleb’aal

Eb’ li kristiaan sa’eb’ li loq’laj hu li ke’k’ojob’aak xch’ool xb’aan li Jesukristo.

• Jwan 8:1–11: Li Qaawa’ kixk’ojob’ xch’ool li ixq li kitawe’ chi muxuk sumsu.

• Jwan 11:1–46: Li Qaawa’ kixk’ojob’ xch’ool li xMaria ut li xMarta chirix xkamik laj Lazaro, li raseb’.

• Enos 1:4–6: Li Qaawa’ kixkuy xmaak laj Enos, ut kirisi lix maak.

• Mosiah 21:5–15: Li Qaawa’ kixq’unob’resi xch’ooleb’ laj Lamanita re ke’xseeb’ob’resi li riiqeb’ lix tenamit laj Limhi.

• Mosiah 24:14–15: Li Qaawa’ kixkawob’resi lix tenamit laj Alma re naq te’ruuq chixk’amb’al li riiqeb’.

• Eter 12:23–29Li raatin li Qaawa’ kixk’ojob’ xch’ool laj Moroni.

• 3 Nefi 17:6–7: Li Kolonel kixk’irtesiheb’ laj Nefita chiruheb’ lix yajel.

• Tzol’leb’ ut Sumwank 121:7–10: Li Qaawa’ kixk’ojob’ xch’ool laj Jose Smith (chi’ilmanq ajwi’ Tzol’leb’ ut Sumwank 123:17).

Xchaab’ilob’resinkil li qak’utum

K’uub’ li tzoleb’aal re taa’eek’amanq li Musiq’ej. Wi taak’e aach’ool naq taawanq li tuqtuukilal ut li rahok sa’ laa tzoleb’aal, li Musiq’ej k’a’jo’ wi’chik naq taaruuq chixtoch’b’al xch’ooleb’ li ani tzolb’ileb’ aab’aan. K’a’ru naru taab’aanu re xk’eeb’al xb’oqb’al lix wankil li Musiq’ej sa’ laa tzoleb’aal? Ma naru taatusub’eb’ li chunleb’aal, malaj taawoksiheb’ li jalam-uuch ut li b’ich re xk’eeb’al xb’oqb’al li Musiq’ej? (Chi’ilmanq Li k’utuk jo’ li Kolonel15