“6–12 noviembre. Hebreos 7–13: “Lix yuwa’il aj tij re li sahilal chalel,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“6–12 noviembre. Hebreos 7–13,” Kim, Taaqehin—Choq’ re li Dominkil Tzoleb’aal: 2023
Laj Melkisedek narosob’tesi laj Abram, xb’aan laj Walter Rane. Xmaatan aj yiib’ahom re
6–12 noviembre
Hebreos 7–13
“Lix yuwa’il aj tij re li sahilal chalel”
Naq nakawil ru Hebreos 7–13, k’oxla k’a’ru li yoo chixyeeb’al li Qaawa’ reheb’ laj santil paab’anel aj Hebreo. K’e reetaleb’ li raatin choq’ ajwi’ laa’at ut choq’ reheb’ li tzolb’ileb’ aab’aan.
Xkanab’ankileb’ chi wotzok
Rub’elaj li tzoleb’aal, patz’ re wiib’ oxib’ li komon sa’ li tzoleb’aal naq te’chalq chi kawresinb’il re xwotzb’aleb’ li raqal sa’ Hebreos 7–13 li neke’tenq’ank reheb’ “chi jilok chixk’atq li Dios chi anchaleb’ xch’ool, chi anchaleb’ xpaab’aal” (Hebreos 10:22).
Xk’utb’al li tzolʼlebʼ
Eb’ li k’ojob’anb’il k’anjel sa’ najter kutan ut sa’ li kutan a’in neke’xk’ut xyaalal li Jesukristo.
-
Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxye naq naru na’ilman Hebreos 7 li na’aatinak chirix li Tijonelil re Melkisedek ut nach’olob’an chirix li Jesukristo. Kanab’eb’ li komon chixwotzb’al li k’a’ru xe’xtaw. Malaj ut naru taak’eheb’ xhoonal re naq te’ril wi’chik li ch’ol 7 ut te’xsik’eb’ raqal li neke’k’utuk chirix li tijonelil a’an ut neke’ch’olob’an chirix li Kolonel. K’a’ru xjuntaq’eetil laj Melkisedek rik’in li Jesukristo? (chi’ilmanq lix k’ab’a’ laj Melkisedek sa’eb’ li raqal 1–2). Chan ru naq ebʼ li k’ojob’anb’il k’anjel re li Tijonelil re Melkisedek nokohʼextenqʼa chi chalk rikʼin li Kristo? Eb’ li komon naru neke’xsik’ xsumenkil sa’ Temas del Evangelio, “Sacerdocio de Melquisedec” (topics.ChurchofJesusChrist.org).
-
Us ta ink’a’ chik naqamayejaheb’ li xul, nokotz’aqon sa’eb’ li k’ojob’anb’il k’anjel sa’ li kutan a’in li neke’xb’eresi ajwi’ li qaam rik’in li Kristo, ut neke’xk’e “li numleb’ k’eeb’ileb’ xwankil b’ar wi’ naru te’ok li osob’tesink re choxa sa’ qayu’am chiqajunqal” (David A. Bednar, “Junelik taakanaaq eerik’in li risinkil lee maak,” Jolomil ch’utub’aj-ib’ re abril 2018). Naru teetz’il rix chan ru naq eb’ li najteril k’ojob’anb’il k’anjel neke’yeeman sa’ Hebreos 8–10 neke’reetali lix mayej aj tojol-ix li Kolonel. K’a’ru xyaalalil lix kik’eleb’ li teelom wakax ut li chib’aat? (chi’ilmanq Hebreos 9:13–14). Ani nareetali li taqenaqil aj tij? (chi’ilmanq Hebreos 9:24–26). Li video “El sacrificio y la Santa Cena” (ChurchofJesusChrist.org) naru nekexxtenq’a. Chan ru naq eb’ li k’ojob’anb’il k’anjel re li kutan a’in nokohe’rosob’tesi ut neke’tenq’an chiqab’eresinkil rik’in li Jesukristo? K’a’ru naru taqab’aanu re naq eb’ li k’ojob’anb’il k’anjel a’in mas wi’chik naq te’wanq xwanqil choq’ qe, ut toohe’xk’e chixk’oxlankil li Kolonel?
Re taawanq qapaab’aal, na’ajman ru naq taqakanab’ qib’ chiruheb’ lix yeechi’ihom li Dios.
-
Re xtenq’ankileb’ li komon sa’ li tzoleb’aal chixtawb’al ru li raatin laj Pablo chirix li paab’aal, naru taatikib’ rik’in xpatz’b’al reheb’ chan ru te’ruuq chixyeeb’al xyaalalil li paab’aal rik’in jun ch’ina ch’ol aatin. Chirix a’an, ilomaq ru ut aatinanqex chirix li k’a’ru kixye laj Pablo chirix sa’ Hebreos 11:1. Chirix a’an naru taapatz’ reheb’ li komon naq te’xsik’ ru junaq kristiaan li neke’yeeman sa’ Hebreos 11 ut te’tzoloq chirix. Eb’ li komon naru te’roksi li kok’ tz’iib’ahom sa’eb’ li perel, malaj li K’utul Raqal reheb’ li Loq’laj Hu, re xk’eeb’al reetal k’a’ru xk’ul li kristiaan a’an sa’ li Najter Chaq’rab’, ut chirix a’an te’xwotz k’a’ru xe’xtaw. Chan ru naq eb’ li kristiaan a’in ke’xk’ut naq ke’reek’a “lix k’ojob’ankil lix nawomeb’ chirix li k’a’aq re ru yo’oninb’il”? (JJS, Hebreos 11:1). Eb’ li komon naru te’aatinaq chirixeb’ jalan chik tiikil kristiaan. Jo’q’e xqak’anjela li qapaab’aal chirixeb’ li yeechi’ihom li toj maji’ neke’tz’aqlok ru?
-
Li na’leb’ choq’ reheb’ laj santil paab’anel aj Hebreo li ke’aaleek re “te’xkanab’ xpaab’ankil” naru chixtenq’ankileb’ li komon sa’ li tzoleb’aal li maare yoo chi lajk lix nawomeb’ xch’ool. Naru ajwi’ nak’anjelak reheb’ li yookeb’ chixtenq’ankileb’ lix komon li wankeb’ xch’a’ajkilal rik’in xpaab’aaleb’. Re xtawb’al li na’leb’ a’in, eb’ li komon naru te’ril Hebreos 10:34–38 ut li raatin li Elder Jeffrey R. Holland sa’ “Xkomon chik li k’anjeleb’aal.” K’a’ut naq wan naq nasach li qoyb’enihom (chi’ilmanq Hebreos 10:35) rik’in li Qaawa’ ut lix evangelio? K’a’ru naru taqab’aanu re xkab’lankil ut xkawob’resinkil li qapaab’aal ut xk’eeb’al qach’ool chixk’ulb’al “li k’a’ru yeechi’inb’il chaq” xb’aan li Dios? (Hebreos 10:36). Li video “Las cosas buenas que vendrán” (ChurchofJesusChrist.org) naru natenq’an sa’ li aatinak a’in.
Xkomon chik li k’anjeleb’aal
“Meetz’eq cherix lix kawil eech’ool.”
Naq ki’aatinak chirix Hebreos 10:32–39, li Elder Jeffrey R. Holland kixye:
“Yaal ajwi’ naq ch’a’aj—naq maji’ nakat-ok sa’ li Iglees, naq yookat chi ok, ut chirix naq xat-ok. Junelik wanjenaq chi jo’kan, a’ut jo’ kixye laj Pablo, maakanab’ xpaab’ankil. Michal aaxiw, ut matq’aj chi ixb’ej. Maakanab’ xkawil aach’ool. Misach sa’ aach’ool li k’a’ru xaweek’a. Maakanab’ xpaab’ankil li k’a’ru ak xak’ul. …
“Rik’in li junjunq xnimal ru na’leb’ naqasik’ ru xb’aanunkil, wan li k’a’ru tento taqak’oxla ut taqatz’il rix, a’ut chirix naq xatkutanob’resiik, taab’aanu weent naq ink’a’ tat-aaleeq chi eelelik chiru li k’a’ru chaab’il. Wi tz’aqal yaal naq xattijok chirix, naq xakanab’ aawib’ chiru, ut naq xayu’ami, tz’aqal yaal anajwan. Maakanab’ xtaaqenkil naq nachal li rahob’tesiik. … Sume laa k’a’uxl. Q’ax ru laa xiw. “Kawaq taxaq aach’ool sa’ laa paab’aal.” Chatkanaaq sa’ li b’e, ut chawil chi atz’umak chawu li k’a’ru ch’ina-us sa’ laa yu’am” (“No perdáis, pues, vuestra confianza,” Liahona, junio 2000, 38).
Xkawresinkil qib’ jo’ aj k’utunel
Ayu rik’ineb’ li loq’laj hu xb’een wa. Eb’ li loq’laj hu tento te’wanq choq’ xnimal ru k’anjeleb’aal naq yookat chi tzolok ut chixkawresinkil aawib’. Li raatineb’ li profeet sa’ roso’jikeb’ li kutan naru neke’wan rochb’eeneb’ li jolomil hu re li Iglees (chi’ilmanq Li k’utuk jo’ li Kolonel, 17).