saheb’ xch’ool li Jesukristo ut eb’ li kok’al

Li tz’aqal rahok, xb’aan laj Del Parson

27 noviembre–3 diciembre

1–3 Jwan; Judas

“Li Dios a’an rahok”

K’a’ruheb’ li na’leb’ li nakak’eheb’ reetal naq nakawil 1–3 Jwan ut Judas? Chan ru naru taawoksiheb’ re xtenq’ankileb’ li komon sa’ laa tzoleb’aal?

reetalil li wotzok

Xkanab’ankileb’ chi wotzok

Patz’ reheb’ junjunq li komon naq te’xwotz li na’leb’ xwulak chiruheb’ naq xe’xtzoleb’ li hu re laj Jwan ut Judas. K’a’ru li esil wankeb’ sa’eb’ li hu a’in li mas xk’anjelak choq’ reheb’ a’an ut reheb’ lix junkab’aleb’?

reetalil li k’utuk

Xk’utb’al li tzolʼlebʼ

1 Jwan 1:5–10; 2:3–11; 3:1–3; 4:7–21; 5:1–3

Li qaChoxahil Yuwa’ ut li Jesukristo neke’xk’ut rik’in xb’aanuhomeb’ chi tz’aqal re ru li saqen ut li rahok.

• Chan ru taatenq’aheb’ li komon chixk’eeb’al reetal lix saqenkil ut lix rahom li Dios sa’ xyu’ameb’? Naru taatikib’ rik’in xtz’iib’ankil li aatin saqenut rahokchiru li pizarron. Patz’ reheb’ li komon naq te’xwotz li xb’een aatin li nachal sa’ xk’a’uxleb’ naq neke’rileb’ li wiib’ chi aatin a’in. Naru te’xsik’ ru jun reheb’ li raqal a’in re naq te’xtzol ut te’xsik’eb’ li raqal neke’aatinak chirix li saqen malaj li rahok: 1 Jwan 1:5–10; 2:3–11; 3:1–3; 4:7–12; 4:16–21; 5:1–3. Patz’ reheb’ junjunq naq te’xwotz k’a’ru xe’xtaw. Naru ajwi’ taapatz’ reheb’ naq te’xwotz xnumsihomeb’ b’ar wi’ xe’reek’a xsaqen ut xrahom li Dios.

• Naru taaye reheb’ li komon sa’ li tzoleb’aal naq te’ril jun li saqen sa’ li tzoleb’aal, malaj li saqen yoo chi ok sa’ rilob’aal li kab’l, ut te’xwotz k’a’ru neke’xnaw chirix li saqen a’an. Chan ru naq li musiq’ejil saqen chanchan li saqen a’an? Eb’ li komon naru neke’ril li raqal a’in re xsik’b’al xkomon chik xna’leb’eb’ chirix li saqen k’eeb’il xb’aan li Dios ut li Ralal sa’ li qayu’am: Salmos 27:1; Jwan 1:4–5; 1 Jwan 1:5–7; 3 Nefi 11:11; Tzol’leb’ ut Sumwank 88:6–13; ut jun li b’ich na’aatinak chirix li saqen, maare “Laaʼat lin saqen” (Eb’ li B’ich, 47). Eb’ li komon naru ajwi’ te’xwotz li k’a’ru xe’xk’ul naq xe’xsik’ ut xe’xk’ul li musiq’ejil saqen sa’ lix yu’ameb’.

1 Jwan 2:18–28; 4:3; 2 Jwan 1:7–11; 3 Jwan 1:9–11; Judas

Tento naq “[xaqxooqo] sa’ lix k’utum li Kristo.”

• Lix k’utum laj Jwan ut laj Judas chirix li q’etok paab’ank naru naxtenq’aheb’ li komon chixnawb’al chan ru naru neke’xkawob’resi chi us lix paab’aaleb’ chirix li Jesukristo. Naru taaye re lix yijach li tzoleb’aal naq te’xsik’ resil li b’alaq’il na’leb’ ut li q’etok paab’ank jo’ yeeb’il sa’ 1 Jwan 2:18–23, 26–28; 4:3; 2 Jwan 1:7–11; 3 Jwan 1:9–11 ut lix yijach chik naq te’xsik’ li na’leb’ a’an sa’ lix hu laj Judas. Malaj ut naru te’xsik’ xsumenkileb’ li patz’om jo’ a’in: K’a’ru neke’xye laj Jwan ut laj Judas naq a’an jun aj xik’ ilonel re li Kristo? (chi’ilmanq ajwi’ K’utul Raqal reheb’ li Loq’laj Hu, “Aj xik’ ilonel re li Kristo”). Ma wan k’a’ruhaq sa’eb’ li raqal a’in li taak’anjelaq rik’ineb’ li ch’a’ajkilal li yooko chixk’ulb’al anajwan? K’a’ru naraj naxye wank chi “xaqxo sa’ lix k’utum li Kristo”? (2 Jwan 1:9).

• Laj Judas naroksi jun jaljookil ru aatin re xyeeb’al resileb’ laj tzolonel aj b’alaq’, malaj eb’ li “neke’xmajewa li k’a’aq re ru li ink’a’ neke’xnaw.” (Judas 1:10). Naru taapatz’ re junjunq komon sa’ li tzoleb’aal naq te’xyiib’ chiru li pizarron xjalam-uucheb’ li jaljookil ru aatin sa’ Judas 1:12–13, ut eb’ li jun siir chik chi komon te’ruuq chixq’ehinkil k’a’ru li jalam-uuch. Chan ru naq eb’ li jalam-uuch a’in neke’xk’utb’esiheb’ li b’alaq’il aj tzolonel, ut laj xik’ ilonel re li Kristo? Qayehaq, chan ru naq li b’alaq’il na’leb’ “xuutanal rilb’al naq wan sa’ qayanq sa’eb’ li qaloq’laj ninq’e”? K’a’ru naru naqab’aanu re xkawob’resinkil qib’ chiruheb’ laj “eetz’unel”? (chi’ilmanq Judas 1:18–21). K’a’ut naq kixye laj Judas naq “taqach’olob’ xna’leb’eb’ ” (Judas 1:22li ani neke’wiib’ank xch’ool sa’ li evangelio?

jun ixq naxtenq’a jun ch’ina al chirilb’aleb’ li loq’laj hu

“A’an a’in li xnimal xsahil lin ch’ool: naq laa’in nawab’i naq eb’ li walal ink’ajol yookeb’ chi b’eek sa’ li yaal” (3 Jwan 1:4).

3 Jwan 1:1–4

Nachal xsahil li qach’ool naq naqatenq’aheb’ li qas qiitz’in chi “b’eek sa’ li yaal.”

• Maare wankeb’ sa’ laa tzoleb’aal li ani neke’xtaw ru li k’a’ru kireek’a laj Jwan naq kixye naq “k’a’jo’ naq xsaho’ lix chool” sa’ rab’inkil naq laj Gayo (jun reheb’ li “ralal xk’ajol”) yoo chi b’eek sa’ li yaal. Eb’ li komon sa’ li tzoleb’aal maare te’tenq’aaq rik’in rab’inkil k’a’ru xe’xk’ul lix komoneb’. Naru teetikib’ rik’in rilb’al 3 Jwan 1:1–4 ut eb’ li raqal sa’eb’ li loq’laj hu li wankeb’ sa’ “Xkomon chik li k’anjeleb’aal.” K’a’ru neke’xk’ut li raqal a’in chirix b’ar tz’aqal nachal li sahil ch’oolejil? Eb’ li komon sa’ li tzoleb’aal naru neke’aatinak chirix k’a’ru xe’reek’a jo’ na’b’ej yuwa’b’ej, jo’ aj b’eresinel sa’ li Iglees, malaj jo’ aj k’utunel naq xe’xnaw naq li ani tzolb’il xb’aaneb’ yookeb’ chi b’eek sa’ li yaal. Maare naru taab’oq wiib’ oxib’ li komon rub’elaj li tzoleb’aal, ut taaye reheb’ naq te’xk’am chaq xjalam-uucheb’ li ani xe’xtenq’a chi chalk rik’in li Kristo, ut te’xye resil li k’a’ru xe’xk’ul.

reetalil li kʼanjelebʼaal

Xkomon chik li k’anjeleb’aal

Eb’ li raqal reheb’ li loq’laj hu chirix xtenq’ankileb’ li qas qiitz’in chi b’eek sa’ li yaal.

• Deuteronomio 6:6–7

• Proverbios 22:6

• Jwan 4:36

• 1 Tesalonicenses 3:9

• Mosiah 4:14–15

• Alma 17:1–2; 26:11–37

• Tzol’leb’ ut Sumwank 18:10–16; 50:22

Xchaab’ilob’resinkil li qak’utum

Tijon chirixeb’ li komon sa’ laa tzoleb’aal. Jo’ chanru naq li Kolonel kitijok chirix laj Pedro (chi’ilmanq Lukas 22:32), laa’at tento tattijoq chirixeb’ li tzolb’ileb’ aab’aan rik’in lix k’ab’a’eb’, ut taasik’ xnawb’al k’a’ru neke’raj ru. Naq nakab’aanu chi jo’kan, laa Choxahil Yuwa’ “tixkawresi xch’ooleb’ ” (Alma 16:16) ut tatxtenq’a chixnawb’al k’a’ru taak’ut re xk’eeb’al li ajb’il ru xb’aaneb’ (chi’ilmanq Li k’utuk jo’ li Kolonel, 6).