jun k’uula’al toje’ xyo’la

Ch’ina karneer, xb’aan li xJenedy Paige

18–24 diciembre

Li Ralankil

“Jun chaab’il esilal, ut a’an jun xnimal sahil ch’oolej”

Li aatinak chirix li evangelio naxk’am xwankil li musiq’ej wi b’eresinb’il rik’in li Jesukristo. Naq nakattzolok chirix lix yo’lajik ut lix k’anjel li Jesukristo chiru li xamaan a’in, sik’ aamusiq’ankil xb’aan li Santil Musiq’ej re taanaw chan ru nakatru chixb’eresinkil li aatinak sa’ laa tzoleb’aal rik’in li Kolonel.

reetalil li wotzok

Xkanab’ankileb’ chi wotzok

Kanab’eb’ li komon sa’ li tzoleb’aal chixwotzb’al k’a’ru yookeb’ chixb’aanunkil malaj k’a’ru xe’xb’aanu junxil, xjuneseb’ ut jo’ junkab’al, re xninq’ehinkil lix yo’lajik li Kolonel jo’ chanru te’reek’a rib’ chi nach’ rik’in a’an.

reetalil li k’utuk

Xk’utb’al li tzolʼlebʼ

Mateo 1:18–25; Lukas 1:26–38; 2:1–20

Li Jesukristo kixkub’si rib’ chi yo’laak sa’ li ruchich’och’.

• Sa’ Ralankil, us xk’oxlankil ut xninq’ehinkil naq li Kristo kixkub’si rib’—naq chi ink’a’ minb’il ru “choqʼ qe kiʼel chaq saʼ choxa; choqʼ qe joʼ winq kikam taqʼa” (“Nokochʼutla saʼ komonil,” Eb’ li B’ich, 111). Re xtikib’ankil li aatinak chirix a’in, naru taapatz’ reheb’ li komon k’a’ru xe’ril naq xe’tzolok chiru li xamaan a’in xjuneseb’ malaj sa’ junkab’al, chirix ani li Jesukristo rub’elaj naq kiyo’la (chi’ilmanq Jwan 17:5; Mosiah 7:27; Tzol’leb’ ut Sumwank 76:12–14, 20–24; Moises 4:2). Chirix a’an, taaruuq taak’ut li jalam-uuch sa’ li tusleb’ aatin re li xamaan a’insa’ Kim, Taaqehin—Choq’ reheb’ li komon ut li junkab’alnaq eb’ li komon sa’ li tzoleb’aal yookeb’ chirilb’al ru resil lix yo’lajik li Kolonel (chi’ilmanq Mateo 1:18–25Lukas 1:26–382:1–20 Waklesi xch’ooleb’ chixwotzb’al lix na’leb’eb’ ut reek’ahomeb’ naq neke’xjuntaq’eeta lix choxahilal li Kolonel naq maji’ nayo’la rik’in lix tuulanil yo’lajik.

• Jun patz’om jo’ kixpatz’ li anjel re laj Nefi sa’ 1 Nefi 11:16maare us raj re xtikib’ankil li aatinak sa’ li tzoleb’aal, a’ut maare taawaj xyeeb’al rik’in tz’aqal aawaatin. Maare tatruuq chixtz’iib’ankil chiru li pizarron, K’a’ru li naxkub’si rib’ li Dios chixb’aanunkil? ut taaye reheb’ li komon sa’ li tzoleb’aal naq te’xk’oxla li patz’om a’in naq yookeb’ chirilb’al ru 1 Nefi 11:17–33. Ye reheb’ naq te’xwotz li k’a’ru neke’xk’oxla chirix li Kolonel sa’ rilb’aleb’ li raqal a’in. K’a’ru li jalam-uuch tatruuq chixk’utb’al chiru li tzoleb’aal, li naxk’ut li k’a’ru yeeb’il chirix lix yu’am li Kolonel xb’aan laj Nefi? Eb’ li komon naru ajwi’ neke’xtz’il rix lix kub’sinkil rib’ li Kolonel naq te’ril jun video chirix lix yo’lajik, maare “Un regalo para el mundo,” “La Natividad,” malaj “Él es la dádiva” (ChurchofJesusChrist.org).

• Li b’ich k’a’jo’ naq naru chixk’eeb’al xb’oqb’al li Musiq’ej sa’ lee tzoleb’aal. Naru taapatz’ re junaq komon naq tixb’icha jun b’ich re Ralankil malaj ut, teeyaab’asi malaj teeb’icha junjunqeb’ li b’ich sa’ komonil (chi’ilmanq Eb’ li B’ich, 123–134). Eb’ li komon sa’ li tzoleb’aal te’ruuq chixsik’b’aleb’ li ch’ol aatin sa’eb’ li b’ich a’in ut sa’eb’ li raqal reheb’ li loq’laj hu li wankeb’ rub’eleb’ li b’ich, li taanimob’resinq re lix b’antioxihomeb’ chirix li Kolonel, ut chirix naq a’an kiwan xch’ool chi chalk sa’ li ruchich’och’.

li Jesus chi wiq’wo sa’ li awimq Getsemani

Getsemani, xb’aan laj J. Kirk Richards

Lukas 4:16–21; Jwan 3:16

Li Jesukristo kixtz’aqob’resi ru lix k’anjel, ut rik’in a’an nokoru chireechaninkil li junelik yu’am.

• Re xtenq’ankileb’ li komon chi aatinak chirix k’a’ut naq kiyo’la li Jesukristo, naru taaye reheb’ naq te’xsik’ ut te’xwotz junaq raqal sa’eb’ li loq’laj hu li naxye k’a’ru lix k’anjel (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al re xtawb’al junjunq). Maare eb’ li komon sa’ li tzoleb’aal te’ruuq chixsikb’al ut chirilb’aleb’ ru li raqal sa’ wiib’al malaj sa’eb’ li kok’ ch’uut. K’a’ru neke’xtzol chirix lix k’anjel li Kristo sa’eb’ li raqal xe’xtaw? K’a’ru naqatzol chirix lix k’anjel rik’ineb’ li k’iila k’ab’a’ej li k’ab’a’inb’il wi’ sa’eb’ li loq’laj hu?

• Eb’ li komon naru te’tzoloq chirix lix k’anjel li Kolonel rik’in rilb’al “Li Yo’yookil Kristo: Lix Ch’olob’ahomeb’ li Apostol” (ChurchofJesusChrist.org) ut te’xwotz li ch’ol aatin neke’xtaw li neke’xch’olob’ xyaalal k’a’ut naq kichal sa’ li ruchich’och’. Kanab’eb’ li komon sa’ li tzoleb’aal chiru junpaat chixk’oxlankil lix nawomeb’ xch’ool chirix li Jesukristo ut lix k’anjel. Ma naru te’xwotz li k’a’ru xe’xk’ul, malaj eb’ li esil chirix lix yu’am li Kolonel, li xnimob’resink re lix paab’aaleb’ chirix a’an malaj lix rahomeb’ choq’ re? Chan ru naq xextenq’aak sa’ li Ralankil a’in rik’in xtzolb’al li Ak’ Chaq’rab’ chiru li chihab’ a’in? Re rilb’al wi’chik junjunq reheb’ li seraq’ sa’ li Ak’ Chaq’rab’ li xetzol chiru li chihab’ a’in, naru taak’ut li video “De tal manera amó Dios al mundo” malaj “Yo para esto he nacido” (ChurchofJesusChrist.org).

Xkawresinkil qib’ jo’ aj k’utunel

Kanab’ xhoonalil re te’wotzoq li ani yookeb’ chi tzolok. “Naq eb’ li komon neke’xwotz li k’a’ru neke’xtzol, moko ka’aj ta wi’ neke’reek’a li Musiq’ej ut neke’xkawob’resi lix nawomeb’ xch’ool, neke’xwaklesi aj b’an wi’ xch’ooleb’ lix komoneb’ chixtawb’al li yaal xjuneseb’ rib’. … K’e xhoonaleb’ li komon chi wotzok sa’ li junjunq chi tzolok—wan naq taak’e reetal naq eb’ li hoonal re wotzok a’in, a’aneb’ ajwi’ li tz’aqal tz’olok” (Li k’utuk jo’ li Kolonel, 30).