“11–17 diciembre. Apokalipsis 6–14: “Xe’xq’ax ru sa’ xk’ab’a’ lix kik’el li Karneer,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“11–17 diciembre. Apokalipsis 6–14,” Kim, Taaqehin—Choq’ re li Dominkil Tzoleb’aal: 2023
Jalam-uuch xb’aan laj Eric Johnsen: Li Nimla Ch’utam, xb’aan laj Robert T. Barrett; xjalam-uucheb’ li chahim nachal rik’in li Agencia Espacial Europea
11–17 diciembre
Apokalipsis 6–14
“Xe’xq’ax ru sa’ xk’ab’a’ lix kik’el li Karneer”
Laj Jose Smith kixye naq li hu Apokalipsis “a’an jun reheb’ li hu li jwal saqen wi’chik ru taqlanb’il chi tz’iib’aak xb’aan li Dios (sa’ Journal, diciembre re 1842–junio re 1844; libro 2, 10 marzo 1843–14 julio 1843, 98, JosephSmithPapers.org). Chan ru taatenq’aheb’ li komon chixtawb’aleb’ li saqen ruhil yaal sa’eb’ li ch’ol a’in?
Xkanab’ankileb’ chi wotzok
Re xtenq’ankileb’ li komon chixjultikankil li na’leb’ xe’xtaw naq xe’ril Apokalipsis 6–14, tz’iib’a chiru li pizarron li ajl 6 toj sa’ 14. Eb’ li komon naru te’xtz’iib’a chixk’atq jun reheb’ li ajl a’an a’ yaal k’a’ru li na’leb’ xe’xtaw sa’ li ch’ol li aajel ru choq’ re junaq kristiaan sa’ roso’jikeb’ li kutan.
Xk’utb’al li tzolʼlebʼ
Li Jesukristo naxte lix tz’apleb’ li hu.
-
Re xtenq’ankileb’ li komon chixk’oxlankil li hu rik’in li wuqub’ chi tz’apleb’ (chi’ilmanq Apokalipsis 5:1), naru taach’olob’ naq najter li b’otb’ookil hu neke’tz’ape’ rik’in b’ayaq li sulul. Neke’xpitz’ li sulul naq toj maji’ nachaqik, li naraj naxye naq wan xwankil li kristiaan kik’ehok xtz’apb’al li hu ut ink’a’ naru natehe’ xb’aan junaq chik kristiaan maak’a’ xwankil. Eb’ li komon naru neke’xwotz li na’leb’ xe’xtaw naq xe’tzolok chirix li hu a’an sa’ Apokalipsis 6; Tzol’leb’ ut Sumwank 77:6–7; ut sa’ li tusleb’ aatin re li xamaan sa’ Kim, Taaqehin—Choq’ reheb’ li komon ut li junkab’al. K’a’ut naq aajel ru xnawb’al k’a’ru nareetali li hu a’an? K’a’ut naq aajel ru xnawb’al naq li Kolonel a’an li taatehoq re li junjunq chi tz’apleb’ re li hu? (chi’ilmanq Apokalipsis 5:1–9).
“Li Kristo taataqlanq sa’ xb’een li ruchich’och’.”
-
Maare ch’a’ajaq xtawb’al ru Apokalipsis 7–11. Jun reheb’ li rosob’tesihom li Dominkil Tzoleb’aal a’an naq eb’ li komon te’ruuq chixtenq’ankileb’ rib’ chirib’ileb’ rib’ chixtawb’aleb’ ru li loq’laj hu. Naru taatz’iib’a chixjunileb’ lix patz’om li komon chirixeb’ li ch’ol a’in ut taapatz’ reheb’ naq te’xwotz xna’leb’eb’ chirib’ileb’ rib’. Waklesi xch’ooleb’ chixjunileb’—li nim xnawomeb’ ut li neke’reek’a naq ink’a’ jwal nim xnawomeb’—naq te’xwotz xna’leb’eb’ chirixeb’ li ch’ol a’in.
-
Naru taatikib’ rik’in xpatz’b’al reheb’ li komon k’a’ru li na’leb’ k’iila sut xe’xtaw sa’ Apokalipsis 7–11. Naru te’xwotz li raqal b’ar wi’ wan li na’leb’ neke’xye ut te’xch’olob’ k’a’ru naraj naxye. Wi neke’raj xtenq’ankil, naru te’ril Apokalipsis 11:15–17. K’a’ru li na’leb’ neke’xtaw sa’eb’ li raqal a’an ut chan ru neke’yeeman ajwi’ a’an sa’ jalan chik raqal re Apokalipsis 7–11? Us ta eb’ li raqal neke’aatinak chirix li pleetik ut yajel, k’a’ru naqataw chi sa’ li naxk’e xkawil qach’ool ut qoyb’enihom rik’in li Jesukristo?
Xoonumta sa’ xb’een laj Satanas “sa’ xk’ab’a’ lix kikʼel li Karneer, jo’ ajwi’ rik’in li aatin kiqaye chi yaal.”
-
Rik’in tzolok chirix li pleet sa’ choxa, mas wi’chik naru naqataw ru li yu’am sa’ li ruchich’och’. Eb’ li komon naru te’ril JJS, Apokalipsis 12:7–11 re xk’eeb’al reetal chan ru naq xoonumta sa’ xb’een laj Satanas ut eb’ laj taaqenel re. K’a’ chik ru li na’leb’ naqataw rik’in li k’a’ru tz’iib’anb’il chirix li pleet sa’ choxa sa’ li K’utul Raqal reheb’ li Loq’laj Hu malaj sa’ Temas del Evangelio? (topics.ChurchofJesusChrist.org). K’a’ chik ru naqatzol li naru tooxtenq’a chi numtaak sa’ xb’een laj tza?
-
Sa’ Apokalipsis 13–14 nach’olob’aman li pleetik rik’in li us ut li ink’a’ us. Jo’ naxye sa’ li ch’ol 13, chan ru naq li dragon napleetik sa’ li pleet a’in? Jo’ naxye li ch’ol 14, chan ru naq li Karneer napleetik sa’ li pleet? Maare us raj xtz’iib’ankil chan ru naq li junjunq neke’pleetik sa’ li pleet a’in jo’ neke’xye li wiib’ chi ch’ol a’in. K’a’ru li juntaq’eet, ut k’a’ru li jalan naqil?
-
K’a’ru xyaalalil li “Karneer kikamsiik”? (Apokalipsis 13:8; chi’ilmanq ajwi’ Apokalipsis 5:6). Re xtenq’ankileb’ li komon sa’ laa tzoleb’aal chixtawb’al xsumenkil li patz’om a’in, naru taaye reheb’ naq te’ril ru Mosiah 3:13 ut Moises 7:47 jo’ tzoleb’aal? K’a’ru xyaalalil xq’axb’al ru laj Satanas “sa’ xk’ab’a’ lix kik’el li Karneer”? (Apokalipsis 12:11).
“Kiwil jun chik li anjel … wan chaq rik’in jun li chaab’il esilal li maak’a’ roso’jik”
-
Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naxye naq maare us raj tzolok chirixeb’ li jalan jalanq chi anjel li ke’k’ojob’an wi’chik re “li chaab’il esilal li maak’a’ roso’jik … re xpuktesinkil rik’ineb’ li wankeb’ sa’ ruuchich’och’ ” (Apokalipsis 14:6). Kanab’eb’ li komon chixwotzb’al li k’a’ru xe’xtzol. K’a’ru naxk’ut Tzol’leb’ ut Sumwank 133:36–40 chirix Apokalipsis 14:6–7? Chan ru nokotz’aqon sa’ lix k’anjel li anjel nayeeman sa’ Apokalipsis 14:6–7? Naru ajwi’ taak’ut li video “La obra en estos últimos días” (ChurchofJesusChrist.org).
Xkawresinkil qib’ jo’ aj k’utunel
Us ajwi’ xyeeb’al “ink’a’ ninnaw.” “Us ta naqaj xnawb’al lix sumenkil chixjunileb’ li patz’om, wan naq us ka’ajwi’ xyeeb’al, “Ink’a’ ninnaw. Chiqak’oxla li patz’om qajunes chiru li xamaan a’in, ut naru too’aatinaq chirix sa’ li tzolok chal re” ” (Li k’utuk jo’ li Kolonel, 24). Chirix a’an, ye reheb’ li komon naq te’sik’oq sa’eb’ li loq’laj hu ut xkomoneb’ chik k’anjeleb’aal re li Iglees re xtawb’al xsumenkil.