li Jesukristo naq tixk’uleb’ li tenamit sa’ li xkab’ xk’ulunik

Li junelikil tenamit, xb’aan laj Keith Larson

25–31 diciembre

Apokalipsis 15–22

“Ani taaq’axoq u, taareechani chixjunil a’ k’a’aq re ru a’in”

Rik’in li resilal li pleet li kiwan sa’ xyanqeb’ li us rik’in li ink’a’ us li yeeb’il resil sa’ Apokalipsis k’a’ru nakatzol chirix xtaaqenkil li Kristo arin sa’ li ruchich’och’? Chirix xk’oxlankil li na’leb’ a’in, k’oxla k’a’ru neke’raj ru li komon sa’ laa tzoleb’aal. K’a’ru li na’leb’ sa’ Apokalipsis li naru natenq’an chixsik’b’al ru li tiik?

reetalil li wotzok

Xkanab’ankileb’ chi wotzok

Naq eb’ li komon neke’wulak sa’ xraqik lix tzolomeb’ chirix li Ak’ Chaq’rab’, waklesiheb’ xch’ool chixwotzb’al k’a’ru neke’xk’oxla chirix li Ak’ Chaq’rab’. Patz’ reheb’ naq te’xwotz chan ru naq xe’tenq’aak xb’aan xtzolb’aleb’ li loq’laj hu chixnawb’al ru chi us li Jesukristo ut chi wulak jo’ a’an.

reetalil li k’utuk

Xk’utb’al li tzolʼlebʼ

Apokalipsis 17–18

Tento taqisi qib’ rik’in lix maa’usilal li ruchich’och’.

• Ink’a’ mas sa rilb’al resilal lix maa’usilal Babilonia ut lix t’anik sa’ Apokalipsis 17–18, a’ut naqataw qana’leb’ rik’in a’an, xb’aan naq Babilonia naru nawan choq’ reetalil li maa’us aj ruchich’och’ li wanko wi’ anajwan. Naru taajacheb’ ru li ch’ol a’in sa’ xyanqeb’ li komon, ut taaye reheb’ naq te’xsik’ xsumenkileb’ li patz’om jo’ a’in: K’a’ut naq wankeb’ li neke’aaleek chixtaaqenkil Babilonia, malaj li ruchich’och’il na’leb’? K’a’ut naq xiwxiw Babilonia? K’a’ru tixk’ul Babilonia? K’a’ru li qatijb’al kixk’e laj Jwan re naq ink’a’ taqak’ul li k’a’ru kixk’ul Babilonia?

• Chirix rilb’al Apokalipsis 18:4 eb’ li komon maare te’raj xtz’ilb’al rix chan ru naru “neke’el chaq” sa’ Babilonia ut ink’a’ “te’okenq sa’ lix maakeb’.” Naru te’xwotz raqal reheb’ li loq’laj hu malaj raatineb’ laj jolominel re li Iglees li xe’tenq’an reheb’ chixq’axb’al ru li aaleek li nachal chaq sa’ Babilonia, malaj li ruchich’och’. Naru teeril li video “Atrévete a lo correcto aunque solo estés” malaj “Apartémonos del mundo” (ChurchofJesusChrist.org) malaj teeril li raatin li Elder Quentin L. Cook sa’ “Xkomon chik li k’anjeleb’aal.” Eb’ li komon naru te’xwotz xna’leb’ chirix xk’anjelankileb’ li na’leb’ naxye li Elder Cook. Chan ru naq noko’el chaq Babilonia? (chi’ilmanq Isaias 52:11; Tzol’leb’ ut Sumwank 25:10). K’a’ru naru taqab’aanu re xtenq’ankileb’ li qas qiitz’in chib’aanunkil ajwi’ chi jo’kan?

Apokalipsis 19–20

K’a’ru naru taqab’aanu re xkawresinkil qib’ choq’ re li xkab’ xk’ulunik li Qaawa’, ut li raqb’a-aatin sa’ roso’jik?

• Li xkab’ xk’ulunik li Qaawa’ wan naq li “xnimal ru kutan ut q’axal xuwajel” yeeb’il re (Joel 2:31), ut rik’in li tz’iib’anb’il sa’ Apokalipsis 19–20, yaal ajwi’ a’an. Naru taatz’iib’a chiru li pizarron junjunq li k’a’ru taak’ulmanq jo’ yeeb’il resil sa’ Apokalipsis 19:5–20:15. B’oqeb’ li komon sa’ li tzoleb’aal chixtawb’aleb’ li raqal li neke’xye resil li taak’ulmanq. K’a’ut naq xnimal ru ut xuwajel nayeeman re li kutan a’an? K’a’ru naqatzol sa’eb’ li raqal a’in chirix li Kolonel ut eb’ li neke’taaqenk re? K’a’ru naru taqab’aanu anajwan re toowanq sa’ xyanqeb’ li te’saho’q sa’ xch’ool sa’ xkutankil lix k’ulunik?

• Re xtikib’ankil aatinak chirix lix huhil li yu’am, naru taaye reheb’ li komon naq te’xyiib’ jun li hu rik’in xb’asb’al jun perel li hu sa’ kaahib’ b’asal. Chirix a’an naru te’ril Apokalipsis 20:12–15; 2 Nefi 9:14; 29:11 ut te’xtz’il rix k’a’ raj ru te’raj naq taatz’iib’aaq chirixeb’ a’an sa’ li hu re li yu’am. Patz’ reheb’ naq te’xtz’iib’a li k’a’aq re ru a’an sa’eb’ lix kok’ hu ut patz’ reheb’ junjunq naq te’xwotz li xe’xtz’iib’a. K’a’ru naru naqab’aanu anajwan re naq te’tz’iib’amanq li k’a’aq re ru a’an sa’ li hu re li yu’am? Re xtenq’ankileb’ li komon naq ink’a’ te’raho’q xch’ool chirix lix musiq’ejileb’, naru taawotz li na’leb’ naxk’e li Elder Jeffrey R. Holland sa’ “Tz’aqalaq eere eeru—junaq kutan” (Jolomil ch’utub’aj-ib’ re octubre 2017).

li Jesus rik’ineb’ li kristiaan sa’ li saqen sa’ xnim ut li kristiaan sa’ li aak’ab’ sa’ xtz’e

Li raqb’a-aatin sa’ roso’jik, xb’aan laj John Scott

Apokalipsis 21:1–22:5

Wi tiiko chi paab’aank, too’osob’tesiiq rik’in li choxahil loq’alil.

• Us ta yeeb’il xb’aaneb’ li profeet naq li roso’jikeb’ li kutan te’wanq chi nujenaq rik’in maa’usilal ut xiw, lix q’ajkamunkileb’ li tiikeb’ chi paab’ank li kiril laj Jwan nim wi’chik chiru li rahilal li taawanq rub’elaj a’an. Re xtenq’ankileb’ li komon chixtz’ilb’al rix li chaq’al ru esilal sa’ roso’jik li hu Apokolipsis, patz’ reheb’ naq te’ril Apokalipsis 21:1–22:5, ut te’xsik’eb’ li ch’ol aatin li neke’xwaklesi xch’ooleb’ chixsik’b’al li choxahil loq’alil. K’a’ru li yeechi’inb’il reheb’ li tiikeb’ chi paab’ank? Chan ru naq li resil a’in nokoxtenq’a naq naqileb’ li ch’a’ajkilal ut lix yalb’al qix sa’eb’ li kutan a’in?

reetalil li kʼanjelebʼaal

Xkomon chik li k’anjeleb’aal

Xsik’b’al ru li tiikilal chiru lix maa’usilal Babilonia.

Li Elder Quentin L. Cook kixk’ut:

“Ink’a’ nokoru chi elk chaq sa’ li ruchich’och’. Ink’a’ nak’anjelak xtz’apb’al qib’ sa’ kab’l. Xb’een wa, jun k’anjel k’eeb’il qe a’an xchaab’ilob’resinkil li ruchich’och’, ut aajel ru a’an re taqanimob’resi li qaseeb’al. …

… Eb’ li komon sa’ li Iglees tento te’tz’aqonq sa’ li ruchich’och’ choq’ re li chaab’ilal. Chi jo’kan, chan ru naru nokok’anjelak re xchaab’ilob’resinkil li ruchich’och’, ut ink’a’ taqakanab’ qib’ chi q’unb’esiik xb’aaneb’ lix maak li ruchich’och’? [Chi’ilmanq Tzol’leb’ ut Sumwank 25:10; 59:9.] Wankeb’ wiib’ chi na’leb’ li toohe’xtenq’a sa’ a’in.

1. K’e chi nawmank naq xaqxookat chi paab’ank jo’ aj Santil Paab’anel sa’ Roso’jikeb’ li Kutan. …

2. Kawaq aach’ool, ut chayu’ami li k’a’ru nakapaab’ ” (“Lecciones del Antiguo Testamento: Estar en el mundo sin ser del mundo,” Liahona, febrero 2006, 40–41).

Xkawresinkil qib’ jo’ aj k’utunel

Chawoxloq’i li xtaql xch’ooleb’ laa was aawiitz’in. “Junaq komon q’axal wi’chik tixsik’ xjalb’al xyu’am naq li jalok nachal rik’in xtaql xch’ool a’an. Naq nakak’e jun b’oqok chi k’anjelak, k’e reetal naq taawoxloq’i xtaql xch’ooleb’ li ani tzolb’ileb’ aab’aan” (Li k’utuk jo’ li Kolonel, 35).