“4–10 diciembre. Apokalipsis 1–5: “Li Karneer, chiwanq taxaq xnimal xloq’al ut xkawilal,” ” Kim, Taaqehin—Choq’ re li Dominkil Tzoleb’aal: Li Ak’ Chaq’rab’ 2023 (2022)
“4–10 diciembre. Apokalipsis 1–5,” Kim, Taaqehin—Choq’ re li Dominkil Tzoleb’aal: 2023
4–10 diciembre
Apokalipsis 1–5
“Li Karneer, chiwanq taxaq xnimal xloq’al ut xkawilal”
Wi nakak’ul li musiq’anb’il na’leb’, tatxtenq’a chixk’eeb’al reetal li k’a’ru naraj li Santil Musiq’ej chixk’utb’al chawu. Wi nakatz’iib’a ut naqataaqe li musiq’anb’il na’leb’ a’in, yookat chixk’utb’al naq naqak’e xloq’al ut naq nakawaj xk’ulb’al chik li na’leb’.
Xkanab’ankileb’ chi wotzok
Re xtikib’ankil aatinak, maare us raj naq taapatz’ reheb’ li komon naq te’xwotz junjunq na’leb’ xe’xtaw sa’ li hu Apokalipsis naq xe’tzolok xjuneseb’ malaj jo’ junkab’al. K’a’ru xe’xtzol chirix lix k’uub’anb’il na’leb’ li qaChoxahil Yuwa’ re xkolb’aleb’ li ralal xk’ajol? K’a’ru xe’xtzol chirix li Kolonel ut chirix lix k’anjel sa’ li k’uub’anb’il na’leb’ a’an? Waklesi xch’ooleb’ chixsik’b’al xkomoneb’ xna’leb’ chirix li Jesukristo ut lix k’uub’anb’il na’leb’ re li kolb’a-ib’ naq yooqeb’ chirilb’al Apokalipsis sa’ kab’l. K’eheb’ xhoonal sa’ junaq chik li tzolok chalel re te’xwotz li te’xtaw.
Xk’utb’al li tzolʼlebʼ
Li Jesukristo a’an li yo’yookil Ralal li yo’yookil Dios.
-
Eb’ li jaljookil ru aatin ut eb’ li eetalil sa’ Apokalipsis 1 neke’xch’olob’ xyaalal naq yo’yo li Jesukristo ut naq naxb’eresi lix Iglees. Eb’ li komon naru te’xtz’iib’a chiru li pizarron wiib’ oxib’ ch’ol aatin isinb’il chaq sa’ Apokalipsis 1 wan wi’ li eetalil malaj li jaljookil ru aatin, ut te’xwotz k’a’ru naxk’ut li junjunq chirix li Jesukristo. Qayehaq, k’a’ru naqatzol rik’ineb’ li eetalil a’in chirix chan ru naq li Kristo naxb’eresi lix Iglees sa’ li kutan a’in? Chan ru naq lix yehom laj Jwan chirix li Kolonel chanchan li yeeb’il sa’ Tzol’leb’ ut Sumwank 110:1–4?
Li Jesukristo naxnaw qu ut tooxtenq’a chixq’axb’al ru lix yalb’al qix.
-
Rilb’aleb’ lix na’leb’ li Qaawa’ choq’ reheb’ li k’iila uq’ej re li Iglees sa’ Apokalipsis 2–3 naru natenq’an re xjultikankil reheb’ li komon naq ink’a’ neke’tz’eqtaanaak xb’aan li Kolonel. Naru taapatz’ reheb’ naq te’rileb’ wi’chik li ch’ol a’an ut te’xsik’ reetalil naq li Jesukristo naxnaw k’a’ru xch’a’ajkilaleb’ ut xchaab’ilaleb’ li junjunq chi uq’ej. Naru ajwi’ te’xwotz li xe’xk’ul sa’ li xe’reek’a wi’ naq li Kolonel naxk’e reetal chan ru naq wankeb’. K’a’ru li na’leb’ kixk’e li Qaawa’ reheb’ laj santil paab’anel li taaruuq chi tenq’ank qe re toonumtaaq sa’ xb’een li qach’a’ajkilal?
-
Sa’eb’ li ch’ol ajwi’ a’in, wan k’a’ru kixyeechi’i li Qaawa’ reheb’ li te’numtaaq. Naru taapatz’ reheb’ li komon naq te’k’anjelaq sa’ ka’kab’il re xtz’ilb’al rix Apokalipsis 2–3 re xtawb’aleb’ lix yeechi’ihom li Qaawa’. Maare te’ruuq chixyiib’ankileb’ li jalam-uuch re xk’utb’al xyaalal junjunq li yeechi’ihom a’in, ut te’xwotz rik’in li tzoleb’aal li k’a’ru xe’xtaw. Chan ru naq eb’ li yeechi’ihom a’in nokohe’xmusiq’a chixyalb’al qaq’e chi numtaak sa’ xb’eeneb’ lix yalb’aleb’ qix ut li qamajelal?
Ka’ajwi’ li Jesukristo kiru chixk’eeb’al chi uxmank lix k’uub’anb’il na’leb’ li qaChoxahil Yuwa’.
-
Ma taak’anjelaq jun ch’ina k’anjel re xtenq’ankileb’ li wankeb’ sa’ laa tzoleb’aal chixtawb’aleb’ ru li eetalil sa’ Apokalipsis 5 chirix chan ru naq li Kolonel kixte li hu li wankeb’ tz’apleb’ chirix? Maare naru taak’am chaq sa’ li tzoleb’aal jun li k’uuleb’aal li tz’aptz’o rik’in laaw. Rub’elaj li tzoleb’aal, k’e xlaawil li k’uuleb’aal re jun komon. Ye reheb’ li wankeb’ sa’ li tzoleb’aal k’a’ru wan sa’ li k’uuleb’aal, ut kanab’eb’ wiib’ oxib’ li komon chixyalb’al xteeb’al li k’uuleb’aal, ut chirix a’an li ani xk’uluk re li laaw taaruuq chixteeb’al. Chirix a’an, eb’ li wankeb’ sa’ li tzoleb’aal te’ruuq chixjuntaq’eetankil li ch’ina k’anjel a’in rik’in Apokalipsis 5. Maare usaq li patz’om jo’ a’in: Chan ru naq lix kolb’aleb’ li ralal xk’ajol li qaChoxahil Yuwa’ chanchan li k’uuleb’aal li tz’aptz’o, malaj li hu li wankeb’ tz’apleb’ chirix? K’a’ut naq ka’ajwi’ li Jesukristo kiru chi tehok re li tz’apleb’? (chi’ilmanq li na’leb’ natawman sa’ “Xkomon chik li k’anjeleb’aal”).
-
Jo’eb’ li ke’xjap re sa’ Apokalipsis 5anajwan laa’o ajwi’ nokoru chixtaqsinkil xyaab’ qakux re xnimankil ru li Kolonel jo’ li jun ajwi’ li xk’ulub’ chixk’eeb’al qe li kolb’a-ib’. Eb’ li komon naru te’xb’icha jun b’ich nawulak chiruheb’ re xloq’oninkil ru li Kolonel, maare “Nim li Qaawaʼ tzʼaqal” (Eb’ li B’ich, 36). Naru ajwi’ neke’aatinak chirixeb’ li yaal naxk’ut li b’ich chirix li Jesukristo. Chan ru naq li k’a’ru yeeb’il sa’eb’ li qab’ich re nimank-u chanchan li yeeb’il sa’ Apokalipsis 5:9–14
Xkomon chik li k’anjeleb’aal
Ka’ajwi’ li Jesukristo kiru chixtojb’al rix li qamaak.
Naq yoo chi aatinak chirix li k’a’ru kik’ulman sa’ li yu’am naq maji’ nokoyo’la, li Elder Jeffrey R. Holland kixk’ut:
“Li Kristo kixyeechi’i rib’ re xnimankil lix taql xch’ooleb’ chixjunileb’ li winq naq yoo chixtojb’al rix lix maakeb’. Sa’ xb’aanunkil a’an, kixk’e re li Yuwa’b’ej chixjunil li loq’alil li taachalq xb’aan xnimal li rahok a’in.
“Kiru chi uxmank lix tojb’al rix li maak xb’aan li Kristo, xb’aan naq (1) ka’ajwi’ a’an kiwan chi maak’a’ xmaak sa’ li ruchich’och’ a’in, ut chi jo’kan moko wan ta sa’ xb’een a’an li musiq’ejil kamk li nachal xb’aan li maak, (2) a’an li Junaj Chirib’il chiru li Yuwa’b’ej, ut rik’in a’an wan rik’in a’an li diosilal li kixk’e xwankil sa’ xb’een lix kamik li tz’ejwalej, ut (3) maare ka’ajwi’ a’an kiwan chi tz’aqal tuulan ut chi tz’aqal k’eek’o xch’ool sa’ li ch’utub’aj-ib’ rub’elaj li yu’am a’in re taak’ojob’amanq re xb’aannunkil li k’anjel a’an” (“La expiación de Jesucristo,” Liahona, marzo 2008, 35).
Xchaab’ilob’resinkil li qak’utum
Oksiheb’ li loq’laj hu ut li raatineb’ li profeet sa’ roso’jikeb’ li kutan. “Li Qaawa’ nokoxtaqla “chixk’utb’al li tzol’leb’ re li awa’b’ejihom chiqib’il qib’ [Tzol’leb’ ut Sumwank 88:77] ut chiroksinkileb’ li loq’laj hu re “xk’utb’al li jar raqal chi na’leb’ re lix evangelio” [Tzol’leb’ ut Sumwank 42:12]. Eb’ li loq’laj hu ut li raatineb’ li profeet ut apostol sa’ roso’jikeb’ li kutan a’aneb’ xyo’leb’aal li yaal naqak’ut” (Li k’utuk jo’ li Kolonel, 21).