talavou o loo faamamaina se puipui

13–19 Novema

Iakopo

“A ia Fai Outou ma E Anaana i le Upu ae Aua Le Na o le Faalogologo i ai”

A o lei faitauina le otootoga lenei, faitau le Tusi a Iakopo ma ia uai atu i uunaiga e te maua. O a ni mataupu faavae e te maua ai o le a faamanuia ai ma faagaeetia ai tagata o lau vasega?

aikona o le fefaasoaai

Valaaulia le Fefaasoaai

Valaaulia tagata o le vasega e faasoa mai ni fuaiupu mai le Iakopo e musuia ai i latou e avea ma “e anaana i le upu” (Iakopo 1:22). Afai e le patino tele, e mafai foi ona latou faasoa mea latou te manatu e tatau ona latou faatinoina, taitoatasi po o ni aiga.

aikona o le aoao atu

Aoao Atu le Aoaoga Faavae

Iakopo 1:5–6

A tatou ole atu i le faatuatua, o le a foai tele mai e le Atua.

• O mataupu faavae o loo aoaoina i le Iakopo 1:5–6 na taitai atu ai Iosefa Samita i se aafiaga faaleagaga sui-olaga, ma e mafai ona faamanuia ai i ni auala i tatou taitoatasi. Atonu e mafai ona e tusia ni fesili e pei o lenei i le laupapa ma fai atu i tagata o le vasega e mafaufau loloto filemu i ai: O le a se faatosinaga o le Iakopo 1:5–6 i lou olaga? O le a se mea ua aoaoina atu e le aafiaga a Iosefa Samita i nei fuaiupu ia te oe i le sailia o le poto e uiga ia oe lava fesili? (tagai Iosefa Samita—Talafaasolopito 1:10–17). O a ni aafiaga ua aoaoina ai oe faapea “e moni le molimau a Iakopo”? (Iosefa Samita—Talafaasolopito 1:26). Valaaulia ia tagata o le vasega e faasoa mai o latou manatu pe a uma ona mafaufau loloto i nei fesili.

• Atonu e mafai e tagata o le vasega ona faaupu le Iakopo 1:5–6 i a latou lava upu. E mafai faapefea ona fesoasoani lenei mea latou te malamalama lelei ai i nei fuaiupu? Atonu e te manao e talanoaina faatasi po o le a le uiga o nisi o upu mai nei fuaiupu.

Iakopo 1:2–4; 5:7–11

Afai tatou te tumau ma le onosai, o le a taitai i tatou e le Alii i le atoatoa.

• Ina ia amata se talanoaga i aoaoga a Iakopo i nei fuaiupu e uiga i le onosai, atonu e te valaaulia tagata o le vasega e faasoa mai ni aafiaga na tatau ai ona latou onosai ma mea na latou aoao mai i lena aafiaga. Ona mafai lea ona latou suesue le Iakopo 1:2–4; 5:7–11 mo ni mataupu faavae e fesootai i o latou aafiaga. Atonu e mafai foi ona latou maua ni mataupu faavae e talafeagai i le vitio “Continue in Patience” (ChurchofJesusChrist.org) po o le savali a Peresitene Dieter F. Uchtdorf “Faaauau i le Onosai” (Liahona, Me 2010, 56–59). E mafai e tagata o le vasega ona faasoa mai mea na latou aoaoina e uiga i le onosai a o latou iloaina le Tama Faalelagi ma le Faaola. O le a se mea na fesoasoani ia i tatou e atiina ae ai le onosai?

Iakopo 1:3–8, 21–25; 2:14–26

“E mate le faatuatua pe a aunoa ma galuega.”

• O se tasi o auala e talanoaina ai aoaoga a Iakopo e uiga i le faatuatua ma galuega, e mafai ona vaevae lau vasega i ni vaega se lua—o le tasi e suesue ai pe aisea e manaomia ai e le faatuatua ia galuega ae o le isi, pe aisea e manaomia ai e a tatou galuega le faatuatua. Ina ia faia lenei mea, e mafai ona latou faitaua le Mataio 7:21–23; Iakopo 1:6–8, 21–25; 2:14–26; ma le Iosefa Samita—Talafaasolopito 1:19. Ona faasoa mai lea e vaega taitasi mea na latou maua ma talanoa pe aisea e tatau ona i ai uma le faatuatua ma galuega.

  O Aperaamo o loo tatalo i fafo o lona faleie

  “Na faatuatua Aperaamo i le Atua, ona ta’ua ai lea ia te ia e fai ma amiotonu” (Iakopo 2:23). Aperaamo i Laufanua o Mamere, saunia e Grant Romney Clawson

• Ina ia fesoasoani i tagata o le vasega ia mafaufau loloto atili i le fuaiupu e manatua pea “E mate le faatuatua, pe a leai ni galuega” (Iakopo 2:26), e mafai ona e tusia le fuaiupu lenei i luga o le laupapa: O le faatuatua ae leai ni galuega e pei o le leai . Valaaulia tagata o le vasega e mafaufau i ni auala fatufatuai e faauma ai le fuaiupu, ma tuu atu ia i latou e tusi o latou manatu i luga o le laupapa. O le a le mea e mafai ona tatou faia ia galulue ai pea lava i lo tatou faatuatua ia Iesu Keriso?

Iakopo 2:1–9

I le avea ai ma ni soo o Iesu Keriso, e tatau ona tatou alolofa i tagata uma, e tusa lava po o a o latou tulaga.

• Ina ia fesoasoani e musuia tagata o le vasega ia faaali atu le alofa faaKeriso i tagata uma e tusa lava po o a tulaga po o foliga faaalia o isi tagata, e mafai ona e fai atu i tagata o le vasega e feauauai i le faitauina o fuaiupu mai le Iakopo 1:9–11; 2:1–9; 5:1–6. Talanoa i fesili e pei o nei: O le a le uiga o le “faailogaina o tagata”? (Iakopo 2:9). Aisea e ese ai ona tatou faia i nisi o taimi i latou e i ai tupe, lauiloa, po o le pule nai lo i latou e le o i ai na mea? E mafai faapefea ona tatou aloese mai le ese o le faiga o isi e faavae i o latou tulaga o i ai? O a ni auala ua avea ai soo faamaoni o le Faaola ma e e sili ona mauoa? (tagai Iakopo 2:5).

Iakopo 3

O upu tatou te faaaogaina e i ai le mana e faatiga pe faamanuia ai isi.

• O vaaiga mamana na faaaoga e Iakopo e mafai ona tuuina mai ai ni faamanatu aoga ma ni uunaiga e faaaoga upu—tautala ma tusitusi—e siitia ai isi. Mafaufau e valaaulia tagata o le vasega e suesue vave i le Iakopo 3, e vaavaai ai mo faatusa na faaaoga e Iakopo e faamatala ai auala e mafai ai e upu ona faatiga pe faamanuia ai isi; atonu e fiafia isi tagata o le vasega e tusi ni ata o nei faatusa. O faapefea ona faaalia i nei ata ia faatonuga a Iakopo i lenei mataupu? Mo se faataitaiga, e mafai faapefea ona pei a tatou upu o se afi? Atonu e mafai e tagata o le vasega ona faasoa mai ni aafiaga e faaalia ai le mana e mafai ona i ai i le gagana. E mafai ona e valaaulia tagata o le vasega e mafaufau loloto pe faapefea ona latou faaaogaina le fautuaga a Iakopo.

Faaleleia o Lo Tatou Aoao Atu

Uunaia se siosiomaga faaaloalogia. “Fesoasoani i tagata o lau vasega ia malamalama o i latou taitoatasi e aafia ai le agaga o le vasega. Faamalosiau ia i latou e fesoasoani ia te oe e fausia se siosiomaga faamaoni, alofagia, ma faaaloalogia ina ia lagona e tagata uma le saogalemu e faasoa o latou aafiaga, fesili, ma molimau” (Aoao Atu i le Ala a le Faaola,15).