O Mekisateko o loo tuuina atu se faamanuiaga ia Aperamo

Ua Faamanuia e Mekisateko ia Aperamo, saunia e Walter Rane. Meaalofa o le tusiata

6–12 Novema

Eperu 7–13

“O Le Faitaulaga Sili i Mea Lelei Atali”

A o e faitau i le Eperu 7–13, mafaufau loloto po o le a le savali a le Alii mo le Au Paia i Eperu. Ia vaavaai foi mo Ana savali ia te oe ma tagata o loo e aoaoina.

aikona o le fefaasoaai

Valaaulia le Fefaasoaai

A o lei amataina le vasega, valaaulia ni nai tagata o le vasega e o mai saunia e faasoa mai fuaiupu mai le Eperu 7–13 ua fesoasoani latou te “faalatalata atu [ai i le Atua] ma le loto faamaoni i le faatuatua ua mautinoa lava” (Eperu 10:22).

aikona o le aoao atu

Aoao Atu le Aoaoga Faavae

Eperu 7-10

O sauniga anamua ma onaponei e faasino atu ia Iesu Keriso.

• O le Otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga o loo fautuaina mai ai le suesueina o le Eperu 7 mo fuaitau o loo aoao mai ai e uiga i le Perisitua Mekisateko ma molimau atu ia Iesu Keriso. Valaaulia tagata o le vasega e faasoa mai ni mea sa latou mauaina. Pe e mafai foi ona e tuu atu ia i latou se taimi i le vasega e toefamanatu ai le mataupu e 7 ma sue fuaiupu o loo aoao mai ai lenei perisitua ma molimau atu e uiga i le Faaola. Na faapefea ona pei Mekisateko o Iesu Keriso? (tagai i faalaniga o Mekisateko i fuaiupu 1–2). E faapefea e sauniga o le Perisitua Mekisateko ona fesoasoani ia i tatou e o mai ai ia Keriso? Atonu e mafai e tagata o le vasega ona vaavaai mo ni tali talafeagai i Autu o le Talalelei, “Perisitua Mekisateko” (topics.ChurchofJesusChrist.org).

• E ui ina tatou le faia ni taulaga i manu vaefa, ae tatou te auai i sauniga i aso nei ia e faapea ona, i se auala e talitutusa lava, e faasino atu ai o tatou agaga ia Keriso ma tuuina atu “ni auala faatagaina ia e mafai ai e faamanuiaga ma mana o le lagi ona tafe mai i o tatou olaga taitoatasi” (David A. Bednar, “Faatumauina Pea le Faamagaloina o a Outou Agasala,” Liahona, Me 2016, 60). Atonu e mafai ona outou suesue faatasi pe faapefea e sauniga anamua o loo faamatalaina i le Eperu 8–10 ona faatusa i le taulaga togiola a le Faaola. Mo se faataitaiga, o le a le mea ua faatusa i ai le toto o povipoa ma oti? (tagai Eperu 9:13–14). O ai e faatusa i ai le faitaulaga sili? (tagai Eperu 9:24–26). E mafai ona fesoasoani le vitio “Sacrifice and Sacrament” (ChurchofJesusChrist.org). O faapefea ona faamanuiaina i tatou e sauniga i onaponei ma fesoasoani e faasino atu i tatou ia Iesu Keriso? O a ni mea e mafai ona tatou faia ia atili anoa ai nei sauniga ma taulai atu i le Faaola?

Eperu 10:34–38; 11

O le faatuatua e manaomia ai le faatuatuaina o folafolaga a le Atua.

• Ina ia fesoasoani i tagata o le vasega ia malamalama i aoaoga a Paulo e uiga i le faatuatua, e mafai ona e amata i le fai atu ia i latou e mafaufau pe faapefea ona latou faamatalaina le faatuatua i se fuaiupu se tasi. Ona, faitau lea ma talanoaina o se vasega le faauigaga na tuuina mai e Paulo i le Eperu 11:1. Ona mafai lea ona e tofia tagata taitasi e filifili se tasi o tagata o loo ta‘ua i le Eperu 11 e suesue i ai. E mafai e tagata o le vasega ona faaaoga ia vaefaamatalaga po o le Taiala i Tusitusiga Paia (scriptures.ChurchofJesusChrist.org) e iloilo ai aafiaga o le tagata i le Feagaiga Tuai, ona faasoa mai lea e se sui mai vaega taitasi i le vasega mea na latou maua. Na faapefea ona faaalia e nei tagata sa latou lagonaina se “faamautinoaga o mea e faamoemoe i ai”? (Faaliliuga Iosefa Samita, Eperu 11:1 [i le Eperu 11:1, vaefaamatalagae]). Atonu e mafai e tagata o le vasega ona faasoa mai isi faataitaiga o tagata faamaoni. O le a se taimi sa tatou faaalia ai le faatuatua i folafolaga ia e lei faataunuuina?

• O le fautuaga i le Au Paia i Eperu o e sa faaosoosoina e “tuumuli” mai lo latou faatuatua e mafai ona taua i tagata o le vasega o e atonu o loo tauivi ma a latou molimau. E mafai foi ona fesoasoani ia i latou o loo taumafai e fesoasoani i e pele ia i latou i se faaletonu o le faatuatua. Ina ia maua lenei fautuaga, e mafai ona faitau e tagata o le vasega le Eperu 10:34–38 ma le saunoaga a Elder Jeffrey R. Holland i le “Punaoa Faaopoopo.” Aisea e faaosoosoina ai i tatou i nisi taimi e lafoai ese lo tatou faamalosi (tagai Eperu 10:35) i le Alii ma Lana talalelei? O le a se mea e mafai ona tatou faia e atiina ae ma faatumau ai le faatuatua ma le faamalosi ia “maua le mea na folafolaina [e le Atua]”? (Eperu 10:36). E mafai ona faaopoopo atu vitio “Good Things to Come” ma le “An High Priest of Good Things to Come” (ChurchofJesusChrist.org) i le talanoaga lenei.

aikona o punaoa

Punaoa Faaopoopo

“Aua le laofai ai o outou faamalosi.”

E faatatau i le Eperu 10:32–39, na aoao mai Elder Jeffrey R. Holland:

“Ioe e faigata—ae e te le’i auai i le Ekalesia, a’o e taumafai e auai, ma ina ua e auai. O le mea lava lena sa i ai, o le faamatalaga lea a Paulo, ae aua le solomuli ai. Aua le popole ma foi i tua . Aua ne’i lafoai lou faamalosi. Aua ne’i galo le faalogona sa e lagonaina muamua. Aua e te le talitonuina le aafiaga na e maua. …

“Soo se faaiuga tele lava e i ai lapataiga ma faaeteetega e tatau ona faia, ae o le taimi lava na faamalamalamaina ai, faaeteete i faaosoosoga e aloese mai i se mea lelei. Afai na sa’o ina ua e tatalo ai, ma talitonuina ma ola ai, e sa’o foi i le taimi nei. Aua le fiu pe a faateleina le mamafa. … Faafetaia’i ou masalosaloga. Pulea ou atuatuvalega. ‘Aua le lafoai ai lo outou faamalosi.’ Tumau i le ala ma vaai i le matagofie o le olaga ua tatala atu mo oe” (“O le Mea Lea, Aua Le Lafoai ai Lo Outou Faamalosi,” Liahona, Iun. 2000, 8–9).

Faaleleia o Lo Tatou Aoao Atu

Alu muamua i tusitusiga paia. E tatau ona avea tusitusiga paia ma punaoa autu mo au suesuega ma tapenapenaga. E mafai e tuleiga a perofeta i onaponei ona faaopoopo atu i tusitusiga faavae (tagai Aoao Atu i le Ala a le Faaola,17).