“30 Oketopa–5 Novema. Eperu 1–6: ‘O Iesu Keriso, “o le Tupuga o le Ola e Faavavau’’” Sau, Mulimuli Mai ia te Au—Mo le Aoga Sa: Feagaiga Fou 2023 (2021)
“30 Oketopa–5 Novema. Eperu 1–6,” Sau, Mulimuli Mai ia te Au—Mo le Aoga Sa: 2023
30 Oketopa–5 Novema.
Eperu 1–6
O Iesu Keriso “o le Tupuga o le Ola e Faavavau”
Mafaufau e faasoa atu i tagata o lau vasega nisi o uunaiga e te maua mai i le Agaga Paia e uiga i le Eperu 1–6. O le faia o lena mea e musuia ai i latou e saili a latou lava uunaiga a o latou suesue i tusitusiga paia.
Valaaulia le Fefaasoaai
O nisi o tagata o le vasega o e le masani ona faasoa soo i totonu o le vasega, atonu e pau lava le mea e manaomia o se valaaulia faapitoa ma sina taimi laitiiti e sauni ai. E mafai ona e faafesootaia ni isi o i latou i le tasi pe lua ni aso ao lei oo i le aso e fai ai ma fai atu ia i latou e omai saunia e faasoa mai se fuaiupu mai le Eperu 1–6 e anoa ia i latou.
Aoao Atu le Aoaoga Faavae
O Iesu Keriso o “le tupuga o le ola e faavavau.”
-
E mafai faapefea ona e faamalosiau i tagata o le vasega e faasoa mai ni mau anoa e uiga ia Iesu Keriso na latou maua i a latou suesuega patino ma faaleaiga i lenei vaiaso? Mafaufau e tusi ni koluma se lima i luga o le laupapa, e taitasi le koluma mo mataupu taitasi o mataupu muamua e lima o Eperu. Valaaulia tagata o le vasega e tusi i le koluma talafeagai ni fasifuaitau mai nei mataupu sa faapea ona latou aoao ai e uiga ia Iesu Keriso ma le numera o le fuaiupu sa latou mauaina ai. E faapefea e le malamalama i nei mea e uiga i le Faaola ona aafia ai o tatou faatuatua ma le naunau e mulimuli ia te Ia?
Sa tiga Iesu Keriso i mea uma ina ia mafai ona Ia malamalama ma fesoasoani ia i tatou pe a tatou tiga.
-
O leEperu 2:9–18; 4:12–16; 5:7–8 e mafai foi ona fesoasoani i tagata o e maitauina puapuaga i le lalolagi ma mafaufau ai pe o silafia pe popole foi i ai le Atua. Atonu e mafai e tagata o le vasega ona sailiili i nei fuaiupu e sue ai ni upumoni o le a fesoasoani i fesili faapena. O le a se mea o loo aoao mai e nei fuaiupu e uiga i le ala e tali mai ai le Faaola i puapuaga o tagata? Atonu foi e fesoasoani le valaaulia o tagata o le vasega e faasoa mai ni faataitaiga mai tusitusiga paia sa lagolagoina ma faamafanafana ai e Iesu Keriso tagata i o latou tiga (tagai “Punaoa Faaopoopo”) pe faaali le vitio “Mountains to Climb” (ChurchofJesusChrist.org). E mafai e tagata o le vasega ona talanoa i mea ua latou aoaoina e uiga i le ala e mafai ai e le Faaola ona fesoasoani ia i tatou pe a tatou feagai ma luitau faigata.
O loo avanoa faamanuiaga a le Atua mo i latou o e “lē faamaaaina o [latou] loto.”
-
O leEperu 3 ma le4 o loo i ai se augani i le Au Paia ina ia le faamaaaina o latou loto ma faapea ai ona teena faamanuiaga sa finagalo le Atua e avatu ia te i latou. A o outou faitau ma lau vasega i le Eperu 3:7–4:2; talanoa i auala e mafai ona faatatau ai aafiaga o Isaraelu anamua ia i tatou i aso nei, e pei foi ona faatatau ia Eperu i le Ekalesia anamua (tagai i anomea e suesue ai e uiga i nei fuaiupu i le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga). O a ni mea e mafai ona tatou faia e faatumau ai le malu o o tatou loto ma tali vave atu i le finagalo o le Alii? (tagai Faataoto 3:5–6; Alema 5:14–15; Eteru 4:15). E mafai e tagata o le vasega ona faasoa mai pe na faapefea ona faamanuiaina i latou po o nisi latou te iloa, ona sa ia i latou ni loto malu ma le salamo.
O i latou o e auauna atu i le malo o le Atua, e tatau ona valaauina e le Atua.
-
O le savali i le Eperu 5 e uiga i e umia le perisitua ua valaauina e le Atua e mafai ona faatatau ia i latou uma o e ua vaetofiaina e le pule o le perisitua e auauna atu ai i valaauga o le Ekalesia. Ina ia fesoasoani i lau vasega ia iloa le uiga o le “valaauina e le Atua e pei o Arona foi,” mafaufau e valaaulia i latou e toe faamanatu le tala o le mauaina e Arona o lona valaauga i le Esoto 4:10–16, 27–31; 28:1. O a ni malamalamaaga manino mai lenei tala e fesoasoani tatou te malamalama ai i le Eperu 5:1–5? E mafai e tagata o le vasega ona faasoa mai pe na faapefea ona latou mauaina le faamautinoaga faapea ua valaauina se tasi e le Atua e faataunuu se valaauga patino—e aofia ai, atonu, ma i latou lava. Na faapefea ona fesoasoani lena faamautinoaga ia i latou e lagolago lelei ai lena tagata i lona valaauga?
“E le fai fua foi e se tasi lenei faiva mamalu, tau o le ua filifilia e le Atua, e faapei o Arona foi” (Eperu 5:4). Ua Valaau e Mose Arona mo le Galuega, saunia e Harry Anderson.
Punaoa Faaopoopo
O faataitaiga mai tusitusiga paia o tagata sa faamafanafanaina e Iesu Keriso.
-
Ioane 8:1–11: Sa faamafanafanaina e le Alii le fafine sa molia i le mulilua.
-
Ioane 11:1–46: Sa faamafanafanaina e le Alii Maria ma Mareta ina ua maliu lo laua tuagane o Lasalo.
-
Enosa 1:4–6: Sa faamagalo e le Alii agasala a Enosa ma aveese lona tausalaina.
-
Mosaea 21:5–15: Sa faamaluluina e le Alii loto o sa Lamana ina ia latou faamamaina avega a le nuu o Limae.
-
Mosaea 24:14–15: Na faamalosia e le Alii le nuu o Alema ina ia mafai ona latou tauaveina a latou avega.
-
Eteru 12:23–29: Sa faamafanafanaina Moronae i fetalaiga a le Alii.
-
3 Nifae 17:6–7: Sa faamaloloina e le Faaola sa Nifae i mea sa latou vaivai ai.
-
Mataupu Faavae ma Feagaiga 121:7–10: Sa faamafanafanaina e le Alii ia Iosefa Samita (tagai foi Mataupu Faavae ma Feagaiga 123:17).
Faaleleia o Lo Tatou Aoao Atu
Faatupu se siosiomaga faaleagaga. Pe a e faaaogaina se siosiomaga toafilemu ma le agaalofa i lou potuaoga, o le a sili atu ona faigofie ona pai atu le Agaga i loto o i latou e te aoaoina. O le a se mea e mafai ona e faia e valaaulia ai le uunaiga a le Agaga i totonu o lou potuaoga? Faamata e mafai ona e toe faatulagaina nofoa pe faaaoga ata po o musika e valaaulia ai le Agaga? (Tagai Aoao Atu i le Ala a le Faaola,15.)