O Iesu Keriso o loo talai atu le talalelei i le lalolagi o agaga

O Keriso o loo Talai Atu i le Lalolagi o Agaga, saunia e Robert T. Barrett

20–26 Novema

1 ma le 2 Peteru

“Fiafia ma le Olioli e Le Mafaamatalaina ma le Tumu i le Mamalu”

Ia manatua o lou faamoemoega o le aoao o tagata, ae le na o le tuuina atu o se lesona. A o e faitau i Tusi a Peteru, mafaufau i tagata taitoatasi o le vasega. O a ni mataupu faavae o le a fesoasoani ia i latou e atinae ai o latou faatuatua?

aikona o le fefaasoaai

Valaaulia le Fefaasoaai

Tusi ulutala 1 Peteru ma le 2 Peteru i luga o le laupapa. Tuu atu i tagata o le vasega se taimi e toefaamanatu ai nei tusi, ma valaaulia i latou e tusi i lalo o nei ulutala upu po o fasifuaitau anoa na latou maua. Ona faaaoga lea o le lisi e valaaulia ai tagata e faasoa mai o latou malamalamaaga.

aikona o le aoao atu

Aoao Atu le Aoaoga Faavae

1 Peteru 1:3–9; 2:19–24; 3:14–17; 4:12–19

E mafai ona ou maua le olioli i taimi o tofotofoga ma puapuaga.

• O se tasi o auala e toefaamanatu ai le fautuaga a Peteru i le 1 Peteru 1:3–9; 2:19–24; 3:14–17; ma le 4:12–19 o le valaaulia lea o tagata o le vasega e mafaufau e uiga i se tasi latou te iloa o loo feagai ma se tofotofoga. Tuu atu ia i latou se taimi i le vasega e tusi ai se tusi i lena tagata, e aofia ai upumoni mai nei fuaiupu o le a uunaia ai lena tagata (tagai foi Mataupu Faavae ma Feagaiga 121:1–8; 123:17). Ona mafai lea ona talanoa tagata o le vasega e uiga i upumoni na latou filifilia.

1 Peteru 1:13–20; 2:1–12

Ua valaaulia i tatou e avea ma “nuu o le Atua.”

• O aoaoga a Peteru i le 1 Peteru 1:13–20 ma le 2:1–12 e mafai ona avea o se faamanatu musuia o le ala e silafia ai e le Alii tatou—Lona nuu—ma mea ua Ia faamoemoe ia tatou faia. Atonu e mafai ona e valaaulia tagata o le vasega e suesue nei fuaiupu ma vaavaai mo faamatalaga o le uiga o le avea ai ma “nuu o le Atua” (1 Peteru 2:10) ona talanoaina lea o mea latou te maua. E mafai ona e faamalamalama atu o le upu “faatauina mai” i le 1 Peteru 2:9 o lona uiga o le “faatauina” po o le “faasaoina” (tagai vaefaamatalagaf). O le a le mea ua aoao mai e le mau ia i tatou e uiga i lagona o le Atua ia i tatou ma le auala o loo Ia finagalo tatou te ola ai?

1 Peteru 3:18–20; 4:6

O loo talai atu le talalelei i e ua maliliu ina ia mafai ai ona faamasinoina i latou ma le tonu.

• O le Tusi Muamua a Peteru o loo i ai se tasi o nai mau faasino i le Tusi Paia i le asiasiga a Iesu Keriso i le lalolagi o agaga ina ua mavae Lona maliu—o se mea na tupu ua fesoasoani ai faaaliga i onaponei tatou te malamalama atoatoa atili i ai. Ina ia fesoasoani i tagata o le vasega ia loloto lo latou malamalama i le lalolagi o agaga, e mafai ona e valaaulia i latou e faitau mau nei ma tusi mea ua latou aoaoina i luga o le laupapa: Ioane 5:25; 1 Peteru 3:18–20; 4:6; Alema 40:7–14, 21; Mataupu Faavae ma Feagaiga 138:11–32 (tagai foi “Punaoa Faaopoopo.”) Aisea e taua ai le malamalama i le asiasiga a le Faaola i le lalolagi o agaga? E faapefea e lenei malamalama ona aafia ai o tatou lagona e uiga i le Atua ma Lana fuafuaga o le faaolataga?

2 Peteru 1:1–11

E ala i le mana o Iesu Keriso, e mafai ai ona tatou atinaeina o tatou natura paia.

• Ina ia faamalosia i latou o loo e aoaoina i a latou taumafaiga ia avea atili e pei o Iesu Keriso, e mafai ona e valaaulia i latou e faailoa mai uiga faaKeriso o loo faamatalaina i le 2 Peteru 1:1–11. Mafaufau e tusi nei uiga i luga o le laupapa ma fai atu i le vasega e faauiga. Ona mafai lea ona talanoa tagata o le vasega pe faapefea e le atinaeina o se tasi uiga ona taitai atu i le atinaega o isi uiga. Tuu atu se taimi mo i latou e mafaufau loloto ai po o le fea o uiga latou te mananao e atinae atoatoa.

o se ie lalaga felavesai

O uiga taitasi faaKeriso tatou te atinaeina e fesoasoani tatou te lalagaina ai se ie lalaga faaleagaga o le avea ai ma soo.

aikona o punaoa

Punaoa Faaopoopo

O le galuega o le faaolaina o e ua maliliu e molimau mai i le misiona a Keriso.

Na aoao mai Elder D. Todd Christofferson:

“O le a le taunuuga o le faitau piliona o e sa ola ma maliliu e aunoa ma se malamalamaaga ia Iesu? Faatasi ai ma le Toefuataiga o le talalelei a Iesu Keriso, ua oo mai ai le malamalama i le faaolaina o i latou ua maliliu ae lei papatisoina ma le avea ai o le Atua ma ‘se Atua ua atoatoa, faamasinotonu, ma se Atua alofa mutimutivale foi’ [Alema 42:15].

“Ae peitai a o i ai i le soifuaga lenei, sa valoia e Iesu e faapea, o le a Ia talai atu foi i e ua maliliu [tagai Ioane 5:25]. Ua tau mai e Peteru o lenei mea na tupu i le va o le Faasatauroga ma le Toetu o le Faaola [tagai 1 Peteru 3:18–19]. Sa molimauina e Peresitene Iosefa F. Samita i se faaaliga e faapea na asiasi atu le Faaola i le lalolagi o agaga [tagai Mataupu Faavae ma Feagaiga 138:30, 33]. …

“O lo tatou naunau ina ia faaolaina e ua maliliu, ma le taimi ma punaoa o loo tatou faaaogaina mo lena tautinoga, e sili atu i loo mea uma, o se faaaliaina o a tatou molimau e uiga ia Iesu Keriso. E faaalia ai se faamatalaga e sili ona mamana e mafai ona tatou faia e uiga i Lona tagata ma Lana misiona paia. Ua molimau mai, muamua, i le Toetu o Keriso; lona lua, i le aapa atu e lē gata o Lana Togiola; tolu, o Ia o le puna e tasi o le faaolataga; lona fa, ua Ia faavaeina tuutuuga mo le faaolataga; ma le lona lima, o le a Ia toe afio mai (“The Redemption of the Dead and the Testimony of Jesus,“ Ensign, Nov. 2000, 9–10).

Faaleleia o Lo Tatou Aoao Atu

Aoao atu le “aisea.” “O isi taimi i tagata aoao—aemaise lava le autalavou—e mafaufau pe faapefea ona fesootai mataupu faavae o le talalelei ia i latou ma pe aisea e tatau ai ona latou usiusitai i nisi o poloaiga. E ui i lea, afai latou te malamalama i le fuafuaga e faavavau a le Tama Faalelagi mo le fiafia o Lana fanau, o le a sili atu foi ona manino mafuaaga mo mataupu faavae o le talalelei ma poloaiga ma o le a faateleina le faaosofia e usiusitai” (Aoao Atu i le Ala a le Faaola,20).