Iesu Keriso o loo ataata a o saofafai ma tamaiti o loo ataata

Alofa Atoatoa, saunia e Del Parson

27 Novema–3 Tesema.

1–3 Ioane; Iuta

“O le Atua O Le Alofa Lava”

O a ni autu ma ni mataupu faavae e matilatila atu ia te oe a o e faitau i le 1–3 Ioane ma le Iuta? E mafai faapefea ona e faaaogaina e fesoasoani ai i tagata o lau vasega?

aikona o le fefaasoaai

Valaaulia le Fefaasoaai

Valaaulia ni nai tagata o le vasega e faasoa mai ni autu po o ni upumoni faapitoa na matilatila atu ia i latou a o latou suesueina Tusi a Ioane ma Iuta. O a ni savali mai nei tusi sa sili ona talafeagai ia i latou ma o latou aiga?

aikona o le aoao atu

Aoao Atu le Aoaoga Faavae

1 Ioane 1:5–10; 2:3–11; 3:1–3; 4:7–21; 5:1–3

O le Tama Faalelagi ma Iesu Keriso o faataitaiga atoatoa o le malamalama ma le alofa.

• E mafai faapefea ona e fesoasoani ia i latou o e aoaoina ina ia iloa le malamalama ma le alofa o le Atua i o latou olaga? Atonu e te amata i le tusia o upu malamalama ma le alofa i luga o le laupapa. Fai atu i tagata o le vasega e faasoa mai isi upu e oo atu i o latou mafaufau pe a latou mafaufau i nei upu e lua. Ona mafai lea e tagata taitoatasi o le vasega ona suesue se tasi o fuaitau nei o mau, ma vaavaai mo se mea o aoao mai e fuaiupu e uiga i le malamalama po o le alofa: 1 Ioane 1:5–10; 2:3–11; 3:1–3; 4:7–12; 4:16–21; 5:1–3. Fai i nisi o i latou e faasoa mai i le vasega mea na latou maua. E mafai foi ona e valaaulia tagata o le vasega e faasoa mai ni aafiaga o se taimi sa latou lagonaina ai le malamalama ma le alofa o le Atua.

• E mafai ona e valaaulia tagata o le vasega e tilotilo i se moli i le faalo po o le malamalama e sau mai i se faamalama ma faasoa mai se mea latou te iloa e uiga i le malamalama faaletino. E faapefea ona faapei le malamalama faaletino o le malamalama faaleagaga? E mafai e tagata o le vasega ona suesue mea nei e maua ai ni malamalamaaga faaopoopo i le ala e saunia ai e le Atua ma Lona Alo le malamalama i o tatou olaga: Salamo 27:1; Ioane 1:4–5; 1 Ioane 1:5–7; 3 Nifae 11:11; Mataupu Faavae ma Feagaiga 88:6–13; ma se viiga e faatatau i le malamalama, e pei “O Iesu Lo‘u Sulu” (Viiga, nu. 49). E mafai foi e tagata o le vasega ona faasoa mai ni aafiaga i se taimi na latou sailia ma maua ai le malamalama faaleagaga i o latou olaga.

1 Ioane 2:18–28; 4:3; 2 Ioane 1:7–11; 3 Ioane 1:9–11; Iuta

E tatau ona tatou “[tumau] i le mataupu faavae a Keriso.”

• O aoaoga a Ioane ma Iuta e uiga i le liliuese e mafai ona fesoasoani i tagata o le vasega e mafaufau ai pe faapefea ona faatumauina le malosi o lo latou faatuatua ia Iesu Keriso. Mafaufau e valaaulia le afa o le vasega e sailiili mo faamatalaga o aoaoga sese po o le liliuese i le 1 Ioane 2:18–23, 26–28; 4:3; 2 Ioane 1:7–11; 3 Ioane 1:9–11 ae o le isi afa e sailiili mo faamatalaga faapena i le Iuta. Pe e mafai foi ona latou vaavaai mo tali i fesili e pei o nei: O faapefea ona faamatalaina e Ioane ma Iuta se aneti-Keriso? (tagai foi Taiala i Tusitusiga Paia, “Anetikeriso,” scriptures. ChurchofJesusChrist.org).. Pe o i ai se mea i nei fuaiupu e foliga mai e faapitoa le faatatau i luitau o loo tatou feagai i aso nei? O le a le uiga o le “tumau i le mataupu a Keriso”? (2 Ioane 1:9).

• O loo faaaoga e Iuta ia ata mataina e faamatala ai faiaoga sese, po o i latou o e “upu leaga i mea latou te le iloa” (Iuta 1:10). Atonu e te valaaulia ni nai tagata o le vasega e tusi i luga o le laupapa nisi o ata o loo faamatalaina i le Iuta 1:12–13 ae mate e isi tagata o le vasega po o le fea le fasifuaitau o loo tusi e le tagata le ata. E faapefea ona avea nei ata ma faatusa o faiaoga sese ma aneti-Keriso? Mo se faataitaiga, e faapefea ona fai e faiga piopio ona fatu ai “papa i o [tatou] faigaai alofa”? O le a se mea e mafai ona tatou faia e puipui ai i tatou lava faasaga i “tagata tauemu”? (tagai Iuta 1:18–21)). Aisea atonu na fautua mai ai Iuta ia tatou “alofa atu” (Iuta 1:22) ia i latou o e tauemu i le talalelei?

tamaitai o loo fesoasoani i le tamaitiiti e faitau tusitusiga paia

“E leai so‘u olioli e sili i lo le faalogo ua savavali la’u fanau i le upumoni” (3 Ioane 1:4).

3 Ioane 1:1–4

E oo mai le olioli a o tatou fesoasoani i isi ia “savavali i le upumoni.”

• Atonu o loo i ai ni tagata i lau vasega o e e mafai ona fesootai i le mea na lagona e Ioane ina ua ia fai mai sa “leai [sona] fiafia e sili” nai lo le faalogo atu o loo savali Kaio (o se tasi o ana “fanau”) i le upumoni. Atonu o le a faamanuiaina tagata o le vasega mai le faalogo atu i aafiaga o le tasi ma le isi. Atonu e mafai ona e amata i le faitau faatasi o le 3 Ioane 1:1–4 ma mau o loo i le “Punaoa Faaopoopo.” O a mea o aoao mai e nei mau ia i tatou e uiga i le puna o le olioli moni? E mafai e tagata o le vasega ona talanoa e uiga i o latou lagona o ni matua, faifeautalai, taitai o le Ekalesia, po o faiaoga ina ua latou iloa o loo savavali tagata sa latou aoaoina i le upumoni. Atonu e te faafesootaia ni nai tagata o le vasega ao lei faia le vasega ma fai atu ia i latou e aumai ni ata o tagata sa latou fesoasoani e aumai ia Keriso ma faamatala e uiga i o latou aafiaga.

aikona o punaoa

Punaoa Faaopoopo

O mau e uiga i le fesoasoani i isi ia savavali i le upumoni.

• Teuteronome 6:6–7

• Faataoto 22:6

• Ioane 4:36

• 1 Tesalonia 3:9

• Mosaea 4:14–15

• Alema 17:1–2; 26:11–37

• Mataupu Faavae ma Feagaiga 18:10–16; 50:22

Faaleleia o Lo Tatou Aoao Atu

Tatalo mo tagata o lau vasega. E pei lava ona sa tatalo le Faaola mo Peteru (tagai Luka 22:32), e tatau ona e tatalo ma ta’u igoa o i latou o loo e aoaoina, saili ia malamalama i o latou manaoga faapitoa. A o e faia lea mea, o le a “saunia o latou loto” e le Tama Faalelagi (Alema 16:16) ma fesoasoani ia e iloa mea e aoao atu ina ia mafai ona ausia ai o latou manaoga (tagai Aoao Atu i le Ala a le Faaola,6).