“4–10 Tesema. Faaaliga 1–5: ‘Ia I Ai i le Tamai Mamoe le Viiga, ma le Malosi, e Faavavau,’” Sau, Mulimuli Mai ia te Au—Mo le Aoga Sa: Feagaiga Fou 2023 (2021)
“4–10 Tesema. Faaaliga 1–5,” Sau, Mulimuli Mai ia te Au—Mo le Aoga Sa: 2023
4–10 Tesema.
Faaaliga 1–5
“Ia I Ai i le Tamai Mamoe le Viiga, ma le Malosi, e Faavavau”
O le mauaina o uunaiga faaleagaga e fesoasoani e te iloa ai o loo manao le Agaga Paia e aoao ia te oe. O le tusifaamaumauina ma le mulimuli i na uunaiga e faaali atu ai e te faatauaina ia uunaiga ma e te manao e maua nisi uunaiga se tele.
Valaaulia le Fefaasoaai
A o e amataina se talanoaga, atonu e fesoasoani le valaaulia o tagata o le vasega e faasoa mai nisi o faamatalaga ua latou aoaoina e uiga i savali ua latou maua mai i le tusi o Faaaliga i le taimi o a latou suesuega patino po o suesuega faaleaiga. Mo se faataitaiga, o le a se mea na latou aoaoina e uiga i le fuafuaga a le Tama Faalelagi e laveai Ana fanau? O le a se mea na latou aoaoina e uiga i le Faaola ma Lana matafaioi i lenei fuafuaga? Fautuaina tagata o le vasega e vaavaai pea mo savali taua e uiga ia Iesu Keriso ma le ata o le faaolataga a o latou faaauau pea ona faitauina le Faaaliga i le fale. Tuu atu ia i latou se avanoa i se lesona i le lumanai e faasoa mai ai mea na latou maua.
Aoao Atu le Aoaoga Faavae
O Iesu Keriso o le Alo Soifua o le Atua Soifua.
-
O le vaaiga ma faailoga faatusatusa i le Faaaliga 1 o loo molimau manino mai ai o loo soifua Iesu Keriso ma o loo Ia taitaia Lana Ekalesia. Atonu e mafai e tagata o le vasega ona tusi i luga o le laupapa ni fasifuaitau se tele mai le Faaaliga 1 o loo aofia ai vaaiga po o faailoga faatusatusa ma faasoa mai po o le a se mea o aoao mai e ia fasifuaitau taitasi ia i latou e uiga ia Iesu Keriso. Mo se faataitaiga, o a ni mea ua tatou aoao mai i nei faailoga e uiga i le auala o loo taitai ai e Keriso ia Lana Ekalesia i aso nei? E faapefea ona faatusatusa le faamatalaga a Ioane o le Faaola i le faamatalaga o loo i le Mataupu Faavae ma Feagaiga 110:1–4?
E silafia patino i tatou e lesu Keriso ma o le a fesoasoani ia te i tatou e faatoilalo o tatou luitau.
-
O le faitauina o savali a le Alii i paranesi eseese o le Ekalesia i le Faaaliga 2–3 e mafai ona fesoasoani e faamautinoa ai i tagata o le vasega e silafia i latou e le Faaola. Atonu e mafai ona e valaaulia i latou e saili i nei mataupu e sue ai se faamaoniga na silafia e Iesu Keriso tofotofoga ma malosiaga o paranesi taitasi. E mafai foi ona latou faasoa mai ni aafiaga na faapea ona latou lagonaina ai, sa silafia lava e le Faaola o latou tulaga ese. O le a le fautuaga na tuuina mai e le Alii i le Au Paia lea e mafai foi ona fesoasoani ia i tatou e manumalo ai i o tatou tauiviga?
-
I nei lava foi mataupu, sa fofogaina ai e le Alii ni folafolaga musuia ia i latou o e manumalo. E mafai ona e valaaulia tagata o le vasega e galulue i ni paga e saili i le Faaaliga 2–3 e sue ai ni folafolaga a le Alii. Atonu foi e mafai ona latou tusia ni ata e faatusa i nisi o nei folafolaga, ona faasoa mai lea i le vaega mea latou te maua. E faapefea ona musuia e nei folafolaga i tatou ia faaauau ona tauivi e faatoilalo o tatou lava tofotofoga ma vaivaiga?
E nao Iesu Keriso ua mafai ai le fuafuaga a le Tama Faalelagi.
-
Faamata o le a fesoasoani se lesona faitino e malamalama ai lau vasega i le faatusaga i le Faaaliga 5 e uiga i le tatalaina e le Faaola o le tusi na faamauina? Atonu e mafai ona e aumaia se meaai i totonu o se apa ua lokaina e faasoa ma le vasega A o lei amataina le vasega, ia tuu atu faanana i se tagata le ki o le loka. Faamatala atu i le vasega le mea o loo i totonu o le apa, ma tuu atu i nisi o le vasega e taumafai e tatala le pusa ona faatoa tatala ai lea e le tagata o loo i ai le ki. Ona mafai lea ona faatusatusa e le vasega lenei lesona faitino i le Faaaliga 5. Atonu e fesoasoani fesili faapenei: E faapefea ona faapei le faaolataga o le fanau a le Tama Faalelagi o le apa na loka po o le tusi na faamauina? Aisea ua na o Iesu Keriso ai na mafai ona tatalaina ia faamau? (tagai i le upusii i le “Punaoa Faaopoopo”).
-
E pei o tagata fiafia o loo taua i le Faaaliga 5, o aso nei, e mafai foi ona sii a’e o tatou leo e vivii i le Faaola o Le ua agavaa e ofoina mai ia i tatou le faaolataga. Atonu e mafai e tagata o le vasega ona usu faatasi se viiga o le faamanu e fiafia i ai e uiga i le Faaola, e pei o le “Glory to God on High” (Hymns, no. 67). E mafai e tagata o le vasega ona faailoa mai upumoni o loo aoao mai e le viiga e uiga ia Iesu Keriso. O a ni mea e tutusa ai lo tatou vaai i savali o a tatou viiga o le faamanu ma folafolaga o loo i le Faaaliga 5:9–14?
Punaoa Faaopoopo
Ua na o Iesu Keriso lava na mafai ona togiola mo i tatou.
O le faamatalaina o mea na tutupu i le muai olaga, sa aoao mai ai Elder Jeffrey R. Holland:
“Sa ofo Keriso e faamamaluina le filifiliga saoloto o tagata uma, e pei foi ona Ia togiola ai mo a latou agasala. I le faatinoina, o le a Ia faafoi i le Tama le mamalu uma mo lena alofa faaola.
“O le Togiola e le gata a Keriso na mafai ona taunuu ona (1) Ua na o Ia le tagata ua ola i le lalolagi e leai sana agasala ma o le mea lea na le mafai ai ona oo i le oti faaleagaga, o le taunuuga o le agasala, (2) Ua na o Ia le Alo Pele o le Atua ma o lea na i ai ia te Ia uiga faa-atua na mafai ai ona Ia maua le mana e manumalo ai i le oti faaletino, ma (3) e foliga mai ua na o Ia sa lava le loto maualalo ma le naunautai i le fono tele i le muai olaga e muai faauuina i lena auaunaga” (“O Le Togiola a Iesu Keriso,” Liahona, Mat. 2008, 35).