O Iesu Keriso o loo faafeiloai atu i tagata i Lona Afio Mai Faalua

O Le Nuu e Faavavau, saunia e Keith Larson

25–31 Tesema

Faaaliga 15–22

“O Lē Manumalo e Maua e Ia Mea Uma”

O le a se mea ua aoao mai ia te oe e le taua i le va o le lelei ma le leaga o loo faamatalaina i le Faaaliga e uiga i le tāua o le mulimuli ia Keriso iinei i le lalolagi? A uma ona mafaufau loloto i lenei mataupu faavae, mafaufau i manaoga o tagata o lau vasega. O a ni upumoni mai le Faaaliga e mafai ona fesoasoani ia latou faia ai filifiliga amiotonu?

aikona o le fefaasoaai

Valaaulia le Fefaasoaai

Ao oo atu tagata o lau vasega i le faaiuga o la latou suesuega o le Feagaiga Fou, ia uunaia i latou e faasoa mai ni o latou manatu e uiga i le Feagaiga Fou. Valaaulia i latou e faasoa mai pe na faapefea e a latou suesuega o tusitusiga paia ona fesoasoani ia i latou e iloa atili ai Iesu Keriso ma avea atili ai e faapei o Ia.

aikona o le aoao atu

Aoao Atu le Aoaoga Faavae

Faaaliga 17–18

E tatau ona tatou vavaeese i tatou lava mai le amioleaga o le lalolagi.

• E matua le manaia tele le faitau e uiga i le amioleaga o Papelonia ma lona pau i le Faaaliga 17–18, ae e aoga ona e mafai ona avea Papelonia ma se faailoga o le lalolagi amioleaga o loo tatou ola ai nei. Atonu e mafai ona e vaevaeina nei mataupu i vaega i totonu o tagata o le vasega ma fai atu ia i latou e vaavaai mo tali i fesili faapenei: Aisea e tosina atu ai tagata i Papelonia, po o le faalelalolagi? Aisea e matautia ai Papelonia? O le a le mea o le a tupu i a Papelonia? O a ni lapataiga na tuuina mai e Ioane e fesoasoani ai ia i tatou e aloese mai i le iuga o Papelonia?

• A uma ona faitau le Faaaliga 18:4, e mafai ona talanoa tagata o le vasega i auala e mafai ona latou “o ese ai” mai Papelonia “ina ia aua nei auai i ana agasala.” E mafai ona latou faasoa ni mau po o ni savali mai taitai o le Ekalesia na fesoasoani ia i latou e tetee atu i faaosoosoga a Papelonia, po o le lalolagi? Mafaufau e matamata le vitio “Dare to Stand Alone” (ChurchofJesusChrist.org) pe faitau i le saunoaga a Elder Quentin L. Cook i le “Punaoa Faaopoopo.” E mafai e tagata o le vasega ona faasoa mai ni manatu e uiga i auala e faaaoga ai mataupu faavae e lua na ta‘ua e Elder Cook. E faapefea ona tatou “o ese” ai mai Papelonia? (tagai, mo se faataitaiga, Isaia 52:11; Mataupu Faavae ma Feagaiga 25:10). O le a se mea e mafai ona tatou faia e uunaia ai isi ia faia lea lava mea e tasi?

Faaaliga 19–20

E mafai ona tatou saunia mo le Afio Mai Faalua o le Alii ma le Aso o le Faamasinoga.

• O le Afio Mai Faalua o Iesu Keriso e masani ona ta’ua “o le aso tele ma le silisili o Ieova” (Ioelu 2:31), ma e faavae i le Faaaliga 19–20, o lena mea e foliga mai o se faamatalaga lelei lea. Mafaufau e tusi i luga o le laupapa nisi o mea e tutupu o loo faamatalaina i le Faaaliga 19:5–20:15. Valaaulia tagata o le vasega e sue fuaiupu o loo faamatala mai ai nei mea e tutupu. Aisea ua taua ai nei mea e tutupu e tele ma le silisili? O a ni mea tatou te aoao mai i nei fuaiupu e uiga i le Faaola ma i latou o e mulimuli ia te Ia? O a ni mea e mafai ona tatou faia i le taimi nei ina ia i ai faatasi ma i latou o e o le a olioli i le taimi o Lona afio mai?

• Ina ia musuia se talanoaga e uiga i le tusi o le ola, ma le faamasinoga mulimuli, e mafai ona e valaaulia tagata o le vasega e fai se tusi faigofie e ala i le gagau vaefa o se fasipepa. Ona latou faitau lea i le Faaaliga 20:12–15; 2 Nifae 9:14; 29:11 ma mafaufau loloto i mea latou te mananao e tusia e uiga ia i latou i le tusi o le ola. Valaaulia i latou e tusi na mea i a latou tusi, ma valaaulia ni nai tagata o le vasega e faasoa mai se mea na latou tusia. O a filifiliga e mafai ona tatou faia nei ina ia tusia nei mea i le tusi o le ola? Ina ia fesoasoani i tagata o le vasega ia le lagona le lotovaivai e uiga i lo latou lava alualu i luma faaleagaga, mafaufau e faasoa atu fautuaga mai le savali a Elder Jeffrey R. Holland “Ia Iu Lava — Ina Atoatoa Ona Lelei o La Outou Amio” (Liahona,, Nov. 2017, 40–42).

O Iesu ma tagata i le malamalama i Lona aao taumatau ma tagata i le pogisa i lona itu tauagavale

O Le Faamasinoga Mulimuli, saunia e John Scott

Faaaliga 21:1–22:5

Afai tatou te faamaoni, o le a faamanuiaina i tatou i le mamalu selesitila.

• E ui ua valoia o aso amuli o le a tumu i le amioleaga ma faigata, ae o le taui sa vaaia e Ioane mo e faamaoni e sili mamao atu nai lo o luitau e muamua atu ai. Ina ia fesoasoani i tagata o le vasega e suesue i lenei faaiuga matagofie i le Faaaliga, e mafai ona e valaaulia i latou e toe faamanatu le Faaaliga 21:1–22:5, ma vaavaai mo fasifuaitau e musuia ai i latou e tauivi mo le malo selesitila. O a folafolaga ua faia i e faamaoni? E fesoasoani faapefea lenei faamatalaga ia i tatou pe a tatou feagai ma o tatou luitau ma tofotofoga i le taimi nei?

aikona o punaoa

Punaoa Faaopoopo

Filifilia o le amiotonu nai lo o le amioleaga o Papelonia.

Na aoao mai Elder Quentin L. Cook:

“E le mafai ona tatou alo ese mai i le lalolagi. O se olaga punipuni, e le o le tali lea. I se lagona lelei, o le tatou saofaga i le lalolagi o se vaega lea o o tatou luitau ma e taua pe afai o le a tatou atinaeina a tatou taleni. …

… E tatau i tagata o le Ekalesia ona aofia i le lalolagi i se auala lelei. E faapefea la ona tatou faapaleniina le tatau ona saofaga lelei atu i le lalolagi ma ia le uai atu i agasala o le lalolagi? [Tagai i le Mataupu Faavae ma Feagaiga 25:10; 59:9.] E lua ni mataupu faavae o le a faia se eseesega tele.

1. Faailoa atu i tagata o oe o se tagata tuuto o le Au Paia o Aso e Gata Ai.

2. Ia e lagona le mautinoa e uiga i ai ma ola ai i ou talitonuga” (“Lessons from the Old Testament: In the World but Not of the World,” Ensign, Fep. 2006, 54–55).

Faaleleia o Lo Tatou Aoao Atu

Faaaloalo i filifiliga saoloto a isi “E sili atu ona faia e tagata ni suiga anoa i o latou olaga pe a oo mai na suiga mai lo latou lava faatinoina o le faitalia. A e tuuina atu ni valaaulia e faatino, ia mautinoa lou faaaloalo i le faitalia o i latou e te aoaoina” (Aoao Atu i le Ala a le Faaola,35).