O Iesu o loo tu i le lotolotoi o fetu

Ata na tuufaatasia e Eric Johnson: O Le Aufono Sili, saunia e Robert T. Barrett; aniva faaaloaloga a le European Space Agency

11–17 Tesema

Faaaliga 6–14

“Sa Latou Manumalo … e ala i le Toto o le Tamai Mamoe”

Sa faapea mai Iosefa Samita o le tusi o Faaaliga “o se tasi o tusi aupito manino na faia e le Atua ia tusia” (i le Journal, December 1842–June 1844; Tusi 2, 10 Mati 1843–14 Iulai 1843,98, JosephSmithPapers.org). E mafai faapefea ona e fesoasoani i tagata o le vasega ia maua upumoni manino i nei mataupu?

aikona o le fefaasoaai

Valaaulia le Fefaasoaai

Ina ia fesoasoani i tagata o le vasega e toefaamanatu nisi o manatu na latou maua a o latou suesueina le Faaaliga 6–14, tusi numera 6 e oo i le 14 i luga o le laupapa. E mafai e tagata o le vasega ona tusi i autafa o se numera soo se malamalamaaga na latou maua i le mataupu talafeagai e faatatau i se tasi o loo ola i aso e gata ai.

aikona o le aoao atu

Aoao Atu le Aoaoga Faavae

Faaaliga 6

Ua tatala e Iesu Keriso ia faamaufaailoga o le tusi.

• Ina ia fesoasoani i tagata o le vasega e vaai faalemafaufau i le tusi o i ai faamaufaailoga e fitu (tagai Faaaliga 5:1), e mafai ona e faamalamalama atu o tusitaai anamua sa masani ona faamauina i sina ele po o se gao. O se mama po o se faailogatusi o le a oomiina i totonu o le ele po o le gao a o lei malo, e faailoa atu ai le pule o le tagata na faamauina le tusitaai ma faalotovaivaia tagata e le faatagaina mai le tatalaina. Ona mafai lea e tagata o le vasega ona faasoa mai soo se manatu po o ni uunaiga na latou maua a o faitau e uiga i lenei tusi i le Faaaliga 6; Mataupu Faavae ma Feagaiga 77:6–7; ma le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Aisea e te manatu e taua ai le iloa o le uiga faafaatusa o lenei tusi? Aisea e te manatu ai e taua le iloa o le Faaola o le tagata lea e tatalaina faamaufaailoga taitasi o le tusi? (tagai Faaaliga 5:1–9).

Faaaliga 7–11

“O malo o lenei lalolagi ua avea ma malo o lo tatou Alii.”

• O leFaaaliga 7–11 e mafai ona faigata ona malamalama i ai. O se tasi o faamanuiaga o se vasega o le Aoga Sa o le mafai lea e tagata o le vasega ona fesoasoani le tasi i le isi ia malamalama i tusitusiga paia. E mafai ona e faia se lisi o fesili o loo i ai i tagata o le vasega e uiga i nei mataupu ma valaaulia i latou e fefaasoaai manatu i le tasi ma le isi. Uunaia tagata uma o le vasega—o i latou o e atonu e lagonaina le sili atu o le malamalama ma i latou o e atonu e lagonaina e le tele ni mea latou te iloa—e faasoa mai o latou malamalamaaga e uiga i nei mataupu.

• E mafai ona e amataina se talanoaga e ala i le fesili atu i tagata o le vasega po o a autu faifai pea na latou maua i le Faaaliga 7–11. E mafai ona latou faasoa mai fuaiupu o loo maua ai nei autu ma faamatala mai pe aisea e taua ai autu. Afai latou te manaomia se fesoasoani, e mafai ona e fautuaina i latou e faitau le Faaaliga 11:15–17. O a ni autu latou te maua i nei fuaiupu, ma e faapefea ona faaalia lenei autu i isi fuaiupu i le Faaaliga 7–11? E ui o nei mataupu o loo faamatalaina ai taua ma mala, o a mea ua tatou maua e aumaia ai ia i tatou le faamoemoe ma le talitonuga ia Iesu Keriso?

Faaaliga 12–14

E mafai ona tatou manumalo ia Satani “ona o le toto o le Tamai Mamoe, ma le upu a la [tatou] molimau.”

• O le aoao e uiga i le Taua i le Lagi e mafai ona fesoasoani tatou te malamalama lelei ai i le olaga i le lalolagi. E mafai ona faitau e tagata o le vasega le Faaliliuga a Iosefa Samita, Faaaliga 12:7–11 i le faaopoopoga i le Tusi Paia) ma faailoa mai pe faapefea ona tatou manumalo ia Satani ma ana au. O a nisi malamalamaaga tatou te maua mai tusitusiga e uiga i le Taua i le Lagi i le Bible Dictionary po o le Gospel Topics? (topics.ChurchofJesusChrist.org). O a ni mea ua tatou aoaoina e mafai ona fesoasoani tatou te faatoilalo ai le fili?

• O le taua i le va o le lelei ma le leaga o loo faamatalaina i le Faaaliga 13–14. O le a se mea o aoao mai e le mataupu 13 ia i tatou e uiga i le auala e tau ai e le tarako lenei taua? E tusa ai ma le mataupu 14, e faapefea ona tauina e le Tamai Mamoe? Atonu e manaia le fai o se lisi o auala e tau ai itu taitasi i lenei taua e tusa ai ma nei mataupu e lua. O a ni mea e tutusa ai ma ni mea e eseese ai ua tatou vaaia?

• O le a le uiga o le Tamai Mamoe na “fasia talu ona faavaeina o le lalolagi”? (Faaaliga 13:8; tagai foi i le Faaaliga 5:6). Mafaufau e fesoasoani atu i tagata o lau vasega i le sailia o tali i lenei fesili i le faitauina o le Mosaea 3:13 ma le Mose 7:47 o se vasega. O le a le uiga o le manumalo ia Satani “ona o le toto o le Tamai Mamoe”? (Faaaliga 12:11).

Faaaliga 14:6-7

“Sa ou vaai i se isi agelu … ua i ai le talalelei e faavavau.”

• O le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga o loo fautuaina mai ai le aoao e uiga i agelu eseese o e na toefuatai maia “le talalelei tumau-faavavau i … e nonofo i le lalolagi” (Faaaliga 14:6). Valaaulia tagata o le vasega e faasoa mai ni mea sa latou aoaoina. O le a se mea o aoao mai e le Mataupu Faavae ma Feagaiga 133:36–40 ia i tatou e uiga i le Faaaliga 14:6–7? E faapefea ona tatou auai i le galuega a le agelu o loo ta‘ua i le Faaaliga 14:6–7? E mafai foi ona e faaali atu le vitio “The Work of These Last Days” (ChurchofJesusChrist.org).

Faaleleia o Lo Tatou Aoao Atu

E le afaina le faapea atu “Ou te le iloa.” “E ui o le mea masani le manao e tali fesili uma, i nisi o tulaga e talafeagai le tau ona fai atu, ‘Ou te le iloa. Ia tatou suesue ai i tatou lava i le fesili lena i lenei vaiaso, ona tatou talanoa lea i ai i le isi taimi e sosoo ai’” (Aoao Atu i le Ala a le Faaola,24). Ona fai atu lea i tagata o le vasega e sailiili i tusitusiga paia ma isi punaoa o le Ekalesia mo tali.