Si Jesus nga nagtudlo didto sa bakilid sa bungtod

Ikaw Usa ka Magtutudlo sa Simbahan ni Jesukristo

Gitawag ka sa Dios sa pagtudlo sa Iyang mga anak sumala sa pamaagi sa Manluluwas. Gi-set apart ka niini nga calling pinaagi sa awtoridad sa Iyang balaan nga pagkapari. Bisan kon ikaw dili batid nga magtutudlo, samtang magpakabuhi ka nga takos, mag-ampo kada adlaw, ug magtuon sa mga kasulatan, ang Langitnong Amahan mohatag kanimo sa impluwensiya ug gahom sa Espiritu Santo aron motabang kanimo nga magmalamposon (tan-awa sa 2 Nephi 33:1).

Kadtong gisalig sa imong pag-atiman mao ang mga anak sa Langitnong Amahan, ug nasayod Siya kon unsay ilang gikinahanglan ug unsaon sa pagtabang nila sa labing maayong paagi. Kon ikaw mainampoon nga magtinguha sa impluwensiya sa Espiritu Santo, Siya mogiya kanimo sa imong pagpangandam ug samtang magtudlo ka. Siya mopadayag nganha kanimo kon unsa ang imong isulti ug unsa ang imong buhaton (tan-awa sa 2 Nephi 32:5).

Ang mahinungdanong katuyoan sa pagtudlo ug pagkat-on sa ebanghelyo mao ang mapalawman ang pagkakabig ngadto sa Langitnong Amahan ug ni Jesukristo. Ang imong tumong isip usa ka magtutudlo mao ang pagtabang niadtong imong tudloan nga mobuhat sa tanan kutob sa ilang mahimo aron mas makabig—usa ka paningkamot nga molapas pa sa oras sa klase. Dapita kadtong imong tudloan nga aktibong moapil diha sa pagkat-on mahitungod ni Jesukristo ug sa Iyang ebanghelyo ug mobuhat sa unsay ilang makat-onan. Awhaga sila sa paghimo sa ilang indibidwal ug pamilya nga pagtuon gawas sa klase nga maoy mag-unang tinubdan sa ilang pagkat-on sa ebanghelyo. Samtang mobuhat sila inubanan sa hugot nga pagtuo pinaagi sa pagtuon isip mga indibidwal ug mga pamilya, sila makadapit sa Espiritu ngadto sa ilang mga kinabuhi, ug ang Espiritu mao ang magdala og tinud-anay nga pagkakabig. Ang tanan nga imong buhaton isip magtutudlo kinahanglang mopunting ngadto niining sagrado nga katuyoan.

Itudlo lamang ang doktrina sa gipahiuli nga ebanghelyo ni Jesukristo sama sa makita diha sa mga kasulatan ug sa mga pulong sa mga propeta sa ulahing mga adlaw. Ang lunsay nga doktrina—mahangtoron, dili mausab nga kamatuoran nga gitudlo sa Dios ug sa Iyang mga sulugoon—magdapit sa Espiritu ug adunay gahom sa pag-usab og mga kinabuhi.

Ang calling sa pagtudlo usa ka sagradong pagsalig, ug normal ra nga mobati usahay nga mabug-atan. Apan hinumdomi nga ang imong Langitnong Amahan mitawag kanimo, ug dili gayod Siya mobiya kanimo. Kini ang buhat sa Ginoo, ug samtang magserbisyo ka “sa tibuok [nimo] nga kasingkasing, gah[o]m, hunahuna ug kusog” (Doktrina ug mga Pakigsaad 4:2), palamboon Niya ang imong mga kapasidad, mga gasa, ug mga talento, ug ang imong pagserbisyo makapanalangin sa kinabuhi niadtong imong tudloan.